កំពង់ឆ្នាំង ៖ ទីលានបាញ់គ្រាប់ពិត របស់តំបន់អភិវឌ្ឍន៍យោធភូមិភាគពិសេស ស្ថិតក្នុងភូមិ​ចំបក់​ប្រាសាទ ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ​សម្រេចការសាងសង់​​បានប្រមាណ ៣០​ភាគ​រយ​ហើយ។​ នេះ​បើតា​ម​ការ​បញ្ជាក់​អោយ​ដឹង​ពី​លោក​វរសេ​នីយ​ឯក ជុំ ណារិន នាយតំបន់អភិវឌ្ឍន៍យោធភូមិភាគពិសេស នៅថ្ងៃទី២០ ខែតុលា ឆ្នាំ២០២២ ។

លោកវរសេនីយ៍ឯក ជុំ ណារិន បានថ្លែងថា ទីលានបាញ់គ្រាប់ពិតនេះ ស្ថិតនៅភូមិសាស្ត្រ​ភូមិ​ចំបក់​ប្រាសាទ ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ។ ដើមឡើយតំបន់នេះជាព្រៃ តែ​ក្រោយ​មក ដោយសារកំណើនប្រជាជន ព្រៃនៅតំបន់នេះ ត្រូវរងការកាប់ទន្ទ្រានរិចរិល។

ទីលានបាញ់គ្រាប់ពិតនេះ ត្រូវសាងសង់ទីលានបាញ់ស៊ីបកំពស់១៥ម៉ែត្រ ទទឹងខ្នងលើ២០ម៉ែត្រ បាតក្រោម២៥ម៉ែត្រ។ ចំណែកចំងាយបាញ់ស៊ីបមានប្រវែងជិត២០០ម៉ែត្រ បើគិតពីចំណុចបាញ់​ចេញ​​មក​។ ការសាងសង់ទីលានបាញ់គ្រាប់ពិតនាពេលនេះ គឺដើម្បីហ្វឹកហ្វឺនដល់​កងកម្លាំង​យោធា អោយ​​មា​ន​សមត្ថភាពខ្ពស់ក្នុងការបាញ់ចំគោលដៅ។

លោកឧត្ដម​សេនីយទោ ប៉ូ វណ្ណៈ មេបញ្ជាការរង និងជានាយសេនាធិការ​យោធភូមិភាគ​បាន​បញ្ជាក់ថា ការដ្ឋានសំណង់នេះ នឹងរួមចំណែក​សំខាន់​បន្ថែម​ទៀត​ដល់​ការ​កសាង​សមត្ថភាព​ការពារជាតិ ការពារសន្តិសុខ សណ្តាប់ធ្នាប់សាធារណៈ សម្រាប់កម្ពុជាផ្ទាល់ផងដែរ។

ការហ្វឹកហ្វឺនបម្រើដល់គ្រប់កងឯកភាពក្នុងកងយោធពល ខេមរភូមិន្ទ​សំដៅ​រួម​ចំណែក​លើក​កម្ពស់​សមត្ថភាពកងទ័ព ក្នុងការការពារបូរណភាពទឹកដី អធិបតេយ្យភាព ឯករាជ្យជាតិ សន្តិសុខ សណ្តាប់ធ្នាប់ និងរបៀបរៀបរយសង្គម បង្ការ ទប់ស្កាត់នូវរាល់ទង្វើបំផ្លិចបំផ្លាញ អំពើភេរវ កម្ម និងឧក្រិដ្ឋកម្មផ្សេងៗ ការពារសុខ សន្តិភាពជូនប្រជាជនកម្ពុជាទូទៅ ភ្ញៀវទេសចរ និង​អ្នក​វិនិយោគ​ព្រម​ទាំងមន្ត្រី ស្ថាប័នអន្តរជាតិ ស្ថានទូតនានានៅកម្ពុជា ផងដែរ៕ អត្ថបទ​៖ ហុង វាស្នា