ឧត្តរមានជ័យ៖ សត្វស្លាបចម្រុះគ្រប់ប្រភេទ ចាប់ផ្តើមមានវត្តមាន​រស់នៅក្នុងតំបន់បឹងស្នោរឡើងវិញ ខណៈអាជ្ញាធរខេត្តបានអភិរក្សការពារតំបន់បឹងស្នោរនេះ មិនឱ្យ​មានការដាក់អន្ទាក់ និង​បរបាញ់​សត្វនោះឡើយ។

ក្នុងនោះដែរ ឯកឧត្តម ប៉ែន កុសល្យ អភិបាលខេត្តឧត្តរមានជ័យ បានចាត់ទុកតំបន់បឹងស្នោរ ដែល​មាន​ផ្ទៃដី​រហូតដល់១១១ហិកតា ដែលជាទីតាំងដ៏​សំខាន់មួយសំរាប់ធ្វើការអភិរក្សជម្រក​សត្វស្លាប​ចម្រុះគ្រប់ប្រភេទ ដើម្បីជាការទាក់ទាញទេសចរក្នុងភូមិសាស្រ្តខេត្តឧត្តរមានជ័យ។

ឯកឧត្តម បានបន្តថា កន្លងមកនៅក្នុងតំបន់បឹងស្នោរនេះ ​គេពុំដែលបានឃើញមានវត្តមាន​ប្រភេទ​សត្វ​ស្លាបចម្រុះទាំងអស់នេះមករស់នៅធ្វើជាជម្រកនៅក្នុងតំបន់នេះឡើយ ប៉ុន្តែដោយសារតែ​បច្ចុប្បន្ន​អាជ្ញាធរខេត្ត​បានធ្វើការអភិរក្ស​ និងបង្កើនការដាំកូនឈើបន្ថែមគ្រប់ប្រភេទ​ឡើងវិញ នៅ​ក្នុងតំបន់បឹងស្នោរនេះ​ ដើម្បីជាជម្រកដ៏សំខាន់សំរាប់ទុក​ឲ្យ​សត្វស្លាប​ចម្រុះគ្រប់ប្រភេទ​មក​រស់នៅ​ទើប​បច្ចុប្បន្នមានវត្តសត្វស្លាបជាច្រើនបានវិលត្រឡប់មករស់នៅធ្វើជាជម្រក​ក្នុង​តំបឹងស្នោរ បាន​យ៉ាងច្រើន​កុះករ​យ៉ាងដូច្នេះ។

ដោយឡែកលោក ផួង លីណា ប្រធានមន្ទីរបរិស្ថានខេត្តឧត្តរមានជ័យ បានលើកឡើងថា បច្ចុប្បន្ន​សត្វស្លាបដ៏​កម្រ​ចម្រុះជាច្រើនគ្រប់ប្រភេទ បានមកធ្វើជម្រករស់នៅក្នុងតំបន់បឹងស្នោរ​ដែលជា​បឹងធម្មជាតិដ៏​ធំមួយរបស់ខេត្តឧត្តរមានជ័យ ក្នុងនោះភាគច្រើនរួមមានប្រភេទសត្វ កុក ក្រសា ប្រវឹក សត្វក្អែក ទាទឹក នាល និងជីវះចំរុះជាច្រើនគ្រប់ប្រភេទទៀត។

ជីវះចម្រុះសត្វស្លាបគ្រប់ប្រភេទ​ទាំងអស់នេះ​ វា​អាច​បង្កើតជា​ការ​ទាក់ទាញ​ការ​ចាប់​អារម្មណ៍​ខ្លាំង​ពី​សំណាក់​ភ្ញៀវទេសចរណ៍​ក្នុង​ស្រុកនានាផងដែរ៕ អត្ថបទ៖ ឃិន សារិទ្ធ