ភ្នំពេញ ៖ ហ្វេសប៊ុកផ្ទាល់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៅថ្ងៃទី២០ ខែតុលា បានផ្សព្វផ្សាយឱ្យដឹងថា ពិព័រណ៍ការងារ និងផលិតភាពជាតិ ២០២២ ដែលសហការរៀបចំដោយទីភ្នាក់ជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ, ស.ស.យ.ក រាជធានីភ្នំពេញ និង GMAC នឹងត្រូវរៀបចំឡើងនៅអគារពិព័រណ៍កោះពេជ្រ រយៈពេលពីរថ្ងៃ គឺថ្ងៃ ទី២៨-២៩ ខែតុលា ឆ្នាំ ២០២២ ចាប់ពីម៉ោង ៨ ព្រឹក ដល់ ៨ យប់។ រកការងារ! រើសបុគ្គលិក! សម្ភាសភ្លាមៗ!

ឱកាសការងារជាងពីរម៉ឺនកន្លែង ពីក្រុមហ៊ុនធំៗ ១៥០ ក្នុងវិស័យសំខាន់ៗរួមមាន៖ ធនាគារ គ្រឹះស្ថានមី ក្រូ ហិរញ្ញវត្ថុ និងធានារ៉ាប់រង, សេវាកម្មលក់ដុំ និងរាយ, ទេសចរណ៍ និងបដិសណ្ឋារកិច្ច, ម្ហូបអា ហារ និងភេសជ្ជៈ, អចលនទ្រព្យ, សេវាកម្ម ព្រមទាំងវិស័យឧស្សាហកម្ម និងកម្មន្តសាល។

ក្រៅពីទទួលបានឱកាសការងាររាប់ម៉ឺនកន្លែង បងប្អូន កូន ក្មួយ ក៏អាចចូលរួមក្នុងសិក្ខាសាលាលើកកម្ពស់ផលិតភាពក្រោមប្រធានបទស្តីពី៖ «ការលើកកម្ពស់កម្លាំងពលកម្មជំនាញ ឌីជីថលនីយកម្ម និងផលិតភាព» ផងដែរ។

ដូច្នេះ សូមបងប្អូនជនរួមជាតិទាំងអស់ ជាពិសេសក្មួយៗ យុវជន សិស្ស/និស្សិត និងអ្នកស្វែងរកការ ងារ អញ្ជើញចូលរួមឱ្យបានច្រើនកុះករ ដើម្បីអាចជួបពិភាក្សា ស្វែងយល់ និងដាក់ពាក្យស្នើសុំការងារជាមួយអនាគតនិយោជកដែលមានឱកាសការងាររាប់ម៉ឺនកន្លែង ព្រមទាំងអាចទទួលបានគន្លឹះ និងចំណេះដឹងស្ដីពីការលើកកម្ពស់ផលិតភាពការងារ។ កុំភ្លេចត្រៀម CV ឱ្យបានច្រើន! ដើម្បីដាក់ពាក្យស្នើសុំការងារបានកាន់តែច្រើនជម្រើស៕អត្ថបទ ៖ គង់ ឌីន