ភ្នំពេញ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុថា សេដ្ឋកិច្ចកម្ពុជា កំពុងស្ថិតនៅលើគន្លងនៃការងើបឡើងវិញ បន្ទាប់ពីកម្ពុជាសម្រេចបាននូវភាពសុំាក្នុងសហគមយ៉ាងឆាប់រហ័ស តាមរយៈការដាក់ចេញនូវយុទ្ធសាស្ត្រ វ៉ាក់សាំងដ៏ត្រឹមត្រូវ និងទាន់ពេល ក៏ដូចជាបានគ្រប់គ្រង និងដោះស្រាលផលប៉ះពាល់នៃវិបត្តិជំងឺកូវីដ-១៩ មកលើសង្គម-សេដ្ឋកិច្ចបានល្អប្រសើរ។
ឯកឧត្ដម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ លើកឡើងក្នុងកម្មវិធីពិភាក្សា ជាមួយសភាពាណិជ្ជកម្មអ៊ឺរ៉ុបនៅកម្ពុជា (EuroCham) ដើម្បីលើកកម្ពស់សហ គ្រាសធុនតូច និងមធ្យម (SMEs) និងធុរកិច្ចថ្មី (Start-Ups) នៅកម្ពុជា នៅថ្ងៃទី១៩ ខែ តុលា ឆ្នាំ ២០២២ ថា ដោយសារភាពរឹងម៉ាំនៃវិស័យផលិតកម្ម និងការនាំចេញ ជាពិសេសការនាំចេញទៅកាន់ទីផ្សារអាមេរិក និង សហភាពអឺរ៉ុប និងការងើបឡើងវិញជាបណ្តើរៗ នៃវិស័យទេសចរណ៍ ព្រមទាំងការស្ទុះឡើងនៃសកម្មភាពសេដ្ឋកិច្ច និងការប្រើប្រាស់ក្នុងស្រុក បច្ចុប្បន្នសេដ្ឋកិច្ចកម្ពុជា កំពុងស្ថិតនៅលើគន្លងនៃការងើបឡើងវិញ។
ឯកឧត្តម បន្តថា សេដ្ឋកិច្ចកម្ពុជា ក៏ដូចជាសេដ្ឋកិច្ចតំបន់ និងពិភពលោក បាននិងកំពុងប្រឈម នឹងហានិភ័យ និងភាពមិនប្រាកដប្រជាធំៗមួយចំនួនដូចជា៖ ការកើនឡើងខ្ពស់នៃអត្រាអតិផរណា, ការអូសបន្លាយនៃសង្គ្រាម រវាងរុស្ស៊ី និងអ៊ុយក្រែន, ការឡើងថ្លៃប្រាក់ និងអត្រាការប្រាក់ដុល្លារអាមេរិក និងការរឹតបន្តឹងគោលនយោបាយ រូបិយវត្ថុ, ការថមថយសេដ្ឋកិច្ចរបស់ប្រទេសចិននិងភាពតានតឹងនៃទំនាស់ភូមិសាស្ត្រនយោបាយ រវាងប្រទេស មហាអំណាច នៅក្នុងតំបន់អាស៊ីផងដែរ។
ឯកឧត្តម វង្សី វិស្សុត បានគូសបញ្ជាក់ថា រាជរដ្ឋាភិបាលមានការប្តេជ្ញាចិត្តខ្ពស់ ក្នុងការប្រែក្លាយវិបត្តិកូវីដ-១៩ ទៅជាឱកាសសម្រាប់កំណែទម្រង់ស៊ីជម្រៅ សំដៅកសាងប្រព័ន្ធសេដ្ឋកិច្ចសង្គម ឱ្យកាន់តែរឹងមាំ និងធន់ជាងមុនទៅនឹងវិបត្តិ នាពេលខាងមុខ ដោយបានដាក់ចេញនូវ ក្របខ័ណ្ឌយុទ្ធសាស្ត្រ និងកម្មវិធីស្តារនិងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣ ដើម្បីស្ដារ និងពង្រឹងសក្តានុពលនៃចន្ទល់កំណើនសេដ្ឋកិច្ចឱ្យរស់រវើក និងត្រឡប់ទៅគន្លងនៃកំណើនជាសក្ដានុពល ប្រកបដោយចីរភាព និងបរិយាបន្ន៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
