ភ្នំពេញ៖ នៅឆ្នាំ២០២៣ មន្ត្រីរាជការគ្រប់ប្រភេទ នឹងត្រូវដំឡើងប្រាក់បៀវត្សរ៍អប្បបរមាប្រចាំខែ រួមទាំងក្រុមប្រឹក្សានៅថ្នាក់រដ្ឋបាលក្រោមជាតិផងដែរ។ នេះបើតាមការឱ្យដឹងរបស់ ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ ។
ក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល៥ឆ្នាំ របស់ក្រសួងមុខងារសាធារណៈ” ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅថ្ងៃទី២០ ខែតុលា នេះ ឯកឧត្តម ព្រំ សុខា បានបញ្ជាក់ថា ប្រាក់បៀវត្សរ៍ ដែលនឹងត្រូវដំឡើង ក្នុងនោះ មន្ត្រីរាជការស៊ីវិល ក្នុងវិស័យរដ្ឋបាល ទូទៅ បច្ចេកទេស និងការទូត នឹងឡើងដល់១លាន៣សែនរៀល ធៀបនឹងឆ្នាំ២០២២ ជាង១លាន១សែនរៀល, មន្ត្រីអប់រំ និងសុខាភិបាល នឹងឡើងដល់១លាន៤សែនរៀល ធៀបនឹងឆ្នាំ២០២២ ជាង១លាន២សែនរៀល, មន្ត្រីនគរបាល នឹងឡើងដល់ជាង១លាន៣សែន៨ម៉ឺនរៀល ធៀបនឹងឆ្នាំ២០២២ ជាង១លាន២សែនរៀល និងយោធិន នឹងឡើងដល់ជាង១លាន៣សែនរៀល ធៀបនឹងឆ្នាំ២០២២ ជាង១លាន២សែនរៀល។
ឯកឧត្តម បានបញ្ជាក់ទៀតថា ទោះបីត្រូវប្រឈមនឹងបញ្ហាជំងឺកូវីដ-១៩ និងវិបត្តិផ្សេងៗទៀតក៏ដោយ ការបើកផ្តល់បៀវត្សរ៍ ត្រូវបានអនុវត្តជាធម្មតា ទាន់ពេលវេលា និងទៀងទាត់ រៀងរាល់ពីរសប្តាហ៍ម្តង ព្រមទាំងទទួលបានប្រាក់ឧបត្ថម្ភបន្ថែមចំនួន៥ម៉ឺនរៀល នៅរៀងរាល់ពិធីបុណ្យចូលឆ្នាំថ្មី និងបុណ្យភ្ជុំបិណ្ឌ។
ដោយឡែក ការចំណាយបន្ទុកបុគ្គលិកនៅក្នុងឆ្នាំ២០២២ មានសមមាត្រស្មើនឹង៤៥,៣% នៃចំណាយចរន្តថវិកាជាតិ ឬ ៦,៩៧% នៃផលិតផលក្នុងស្រុកសរុប។
របាយការណ៍របស់ក្រសួងមុខងារសាធារណៈ បានបង្ហាញថា បច្ចុប្បន្ន មន្ត្រីរាជការស៊ីវិលនៅទូទាំងប្រទេស មានចំនួនជាង២២ម៉ឺននាក់ ក្នុងនោះ ថ្នាក់ជាតិ មានចំនួនជិត៥ម៉ឺននាក់ និងថ្នាក់ក្រោមជាតិជាង១៧ម៉ឺននាក់ ៕ អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
