អ៊ីរ៉ង់៖ អង្គការថាមពលបរមាណូអ៊ីរ៉ង់បាននិយាយកាលពីថ្ងៃអាទិត្យថា រោងចក្រនុយក្លេអ៊ែរ Natanz ត្រូវបានវាយប្រហារដោយអំពើភេរវកម្ម មួយម៉ោងបន្ទាប់ពីខ្លួនបាននិយាយថា "ឧបទ្ទវហេតុ" បានបណ្ដាលមកពីការដាច់ចរន្តអគ្គិសនីនៅទីនោះ។
ហេតុការណ៍នេះបានកើតឡើង មួយថ្ងៃបន្ទាប់ពីសាធារណរដ្ឋអ៊ីស្លាមមួយនេះបាននិយាយថា ខ្លួនបានចាប់ផ្ដើមបង្កើតម៉ាស៊ីន ចម្រាញ់សារធាតុអ៊ុយរ៉ានីញ៉ូមទំនើបនៅទីនោះ ដោយរំលោភលើការប្តេជ្ញាចិត្តរបស់ខ្លួនក្រោមកិច្ចព្រមព្រៀងឆ្នាំ២០១៥ ដែលមានបញ្ហាជាមួយមហាអំណាចពិភពលោក។ នៅក្នុងសេចក្ដីថ្លែងការណ៍មួយ ដែលត្រូវបានផ្សាយដោយទូរទស្សន៍រដ្ឋ លោក អាលី អាកបា សេឡេហ៊ី ប្រធានអង្គការថាមពលបរមាណូអ៊ីរ៉ង់ (IAEO) បានថ្កោលទោសចំពោះទង្វើឥតប្រយោជន៍ ខណៈដែលទទូចដល់សហគមន៍អន្តរជាតិ ឲ្យតតាំងនឹងភេរវកម្មប្រឆាំងនឹងនុយក្លេអ៊ែរនេះ។ លោកបាននិយាយថា ការវាយប្រហារនេះត្រូវបានធ្វើឡើងដោយក្រុមអ្នកប្រឆាំងនៃវឌ្ឍនភាពឧស្សាហកម្ម និងនយោបាយរបស់ប្រទេសដែលមានគោលដៅ រារាំងការអភិវឌ្ឍឧស្សាហកម្មនុយក្លេអ៊ែរកំពុងរីកចម្រើន ដោយមិនបានបញ្ជាក់ពីប្រទេសណាមួយ ឬអង្គភាពណាមួយអាចស្ថិតនៅពីក្រោយការបំផ្លិចបំផ្លាញនោះទេ។
អ្នកនាំពាក្យរបស់អង្គការថាមពលបរមាណូអ៊ីរ៉ង់ លោក Behrouz Kamalvandi បានរាយការណ៍ពីឧបទ្ទវហេតុមួយ នៅឯរោងចក្រចម្រាញ់សារធាតុអ៊ុយរ៉ានីញ៉ូម ដែលបណ្ដាលមកពី "ការដាច់ចរន្តអគ្គិសនី"។ ទីភ្នាក់ងារសារព័ត៌មានផ្លូវការ Fars បានរាយការណ៍ដោយដកស្រង់សំដីអ្នកនាំពាក្យរូបនេះថា គ្មាននរណាម្នាក់រងរបួស និងមិនមានការសាយភាពជាតិវិទ្យុសកម្មទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
