តាកែវ៖ រដ្ឋបាលខេត្តតាកែវ នឹងរៀបចំប្រារព្ធព្រះរាជពិធីបុណ្យអ៊ុទូក បណ្តែតប្រទីប និងសំពះព្រះខែ អកបំបុក នៅទន្លេបាទី ស្រុកបាទី រយៈពេល២ថ្ងៃ ចាប់ពីថ្ងៃទី ០៦ ០៧ ខែវិច្ឆិកា ឆ្នាំ២០២២ ខាងមុខនេះ ។

ថ្លែងនៅក្នុងកិច្ចប្រជុំមួយជាមួយលោកអភិបាលរងខេត្ត ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំង ៣ប្រភេទ អភិបាល អភិបាលរងក្រុងស្រុក ​និងមន្រ្ទីជំនាញពាក់ព័ន្ធ នៅ​ព្រឹកថ្ងៃព្រហស្បត្តិ៍ ទី២០ ខែវិច្ឆិកា ឆ្នាំ២០២២នេះ ​នៅសាលប្រជុំរដ្ឋបាលខេត្ត ឯកឧត្តម អ៊ូច ភា អភិបាល​ខេត្តតាកែវ ​បានណែនាំឱ្យលោកអភិបាលក្រុងស្រុក ​ត្រូវមានទូកប្រណាំងក្នុងមួយ​ក្រុងស្រុក ត្រូវមានទូកចំនួន២ចូលរួមប្រកួត ​ហើយយើងក៏មានការជ្រើសរើសអ្នកឈ្នះ យកពីលេខ១ ដល់លេខ៤ផងដែរ​ ម្យ៉ាងទៀតទន្ទឹមនឹងការរៀបចំពិធីបុណ្យអុំទូកនេះដែរ យើង​ក៏នឹងរៀបចំជាការតាំងពិពិរណ៍ផងដែរ។

ឯកឧត្តមអភិបាលខេត្ត ​ក៏បានធ្វើការណែនាំបន្ថែមទៀត​ទៅដល់អស់លោកលោកស្រី និង​អ្នក​ពាក់ព័ន្ធនៅក្នុងគណៈកម្មការ ​និងអនុគណៈកម្មការខេត្តរៀបចំព្រះរាជពិធីបុណ្យអុំទូកនេះ សូម​ចូលរួមសហការគ្នាឱ្យបានល្អ ធ្វើយ៉ាងណាឱ្យដំណើរការនៃការរៀបចំព្រះរាជពិធីបុណ្យអ៊ុទូក បណ្តែតប្រទីប និងសំពះព្រះខែ អកបំបុក នៅទន្លេបាទី ស្រុកបាទី​ រយៈពេល២ថ្ងៃនេះ ប្រព្រឹត្តទៅ​ដោយរលូន ពិសេសសូមអាជ្ញាធរក្រុងស្រុក ក្នុងនាមគណៈបញ្ជាការឯកភាពរដ្ឋបាលក្រុងស្រុក និងកងកម្លាំងប្រដាប់អាវុធទាំង៣ប្រភេទ ​ត្រូវតែពង្រឹងសន្តិសុខឱ្យបានល្អរឹងមាំ ដើម្បីធានាបាននូវ​សុខ​សុវត្ថិភាពជូនបងប្អូនប្រជាពលរដ្ឋ ​ដែលពួកគាត់អញ្ជើញមកទស្សនាពិធីបុណ្យអុំទូកនេះ ពិសេស​ក៏ត្រូវតែត្រៀមក្រុមគ្រូពេទ្យប្រចាំការផងដែរ ។

ឯកឧត្តម អ៊ូច ភា ក៏​បានធ្វើការអំពាវនាវដល់​បងប្ងូនប្រជាពលរដ្ឋនៅក្នុង​ខេត្តតាកែវរួម​និង​ប្រជាពលរដ្ឋ​ដែលរស់នៅជាប់ខេត្តតាកែវ ​ជាពិសេសបងប្អូន​ប្រជាពលរដ្ឋដែលរស់នៅ​រាជធានី​ភ្នំពេញ សូមអញ្ជើញមកចូលរួម​លេង​កម្សាន្ត​នៅ​រមណីយដ្ឋាន​ទន្លេបាទី​ស្រុកបាទី ដែលមាន​ការ​រៀបចំ​ពិធីបុណ្យអុំទូក នាពេលខាងមុខឲ្យបានច្រើនកុះករ៕