បាត់ដំបង៖ ឯកឧត្តម សុខ លូ អភិបាលខេត្តបាត់ដំបង បានស្នើដល់លោក ព្យែរ ដូមីនិក វាំងសង់ ទីប្រឹក្សាសហប្រតិបត្តិការ និងកិច្ចការវប្បធម៌ នៃស្ថានទូតបារាំងប្រចាំនៅកម្ពុជា ​ជួយកៀរគរអ្នក​វិនិយោគ​ជនជាតិ បារាំង ឱ្យមកបណ្ដាក់ទុនរកស៊ីនៅក្នុងខេត្តបាត់ដំបង ​ខណៈអាជ្ញាធរ បានត្រៀម​លក្ខណៈជានិច្ចសម្រាប់ផ្ដល់កិច្ចសហការ។

ក្នុងជំនួបពិភាក្សាការងារជាមួយលោក ព្យែរ ដូមីនិក វាំងសង់ កាលពីថ្ងៃទី២០ ខែតុលា ម្សិលមិញ នៅ​សាលាខេត្តបាត់ដំបង ឯកឧត្តម សុខ លូ បានលើកឡើងថា​ ខេត្តបាត់ដំបង ត្រូវការការគាំទ្រ​លើផ្នែកបច្ចេកទេសពី ​ស្ថានទូតបារាំង​ ដើម្បីអភិរក្សសំណង់អគារជាច្រើន ដែលបានបន្សល់ទុក​ពីសម័យបារាំង។

ឯកឧត្តម បានសំណូមពរដល់ភាគីបារាំង ​ជួយកៀរគរវិនិយោគិនបារាំងមកបណ្ដាក់ទុករកស៊ី នៅ ក្នុងខេត្តបាត់ដំបង ​ព្រោះខេត្តបាត់ដំបងមានសក្ដានុពលខ្ពស់លើវិស័យកសិកម្ម ​និងទេសចរណ៍។

ជាកិច្ចឆ្លើយតប លោក ព្យែរ ដូមីនិក វាំងសង់ បានអះអាងថា អ្នកជំនួញបារាំងមួយក្រុម ​គ្រោងនឹង មកកាន់​ខេត្តបាត់ដំបង នៅពេលខាងមុខ ដើម្បីស្វែងយល់ពីសក្ដានុពលរបស់ខេត្ត។

លោកទីប្រឹក្សាស្ថានទូតបារាំង បានបញ្ជាក់បន្ថែមថា ​ការអភិវឌ្ឍក្រុងបាត់ដំបងទៅជាទីក្រុងបៃតង និងឆ្លាតវៃសម្រាប់បង្កលក្ខណៈងាយស្រួលដល់ការស់នៅរបស់ប្រជាជន ​គឺល្អប្រសើរមែនទែន ព្រោះបាត់ដំបង ជាខេត្តដ៏ធំមួយរបស់កម្ពុជា​ បើប្រៀបធៀបជាមួយបណ្ដាខេត្តផ្សេងៗ៕អត្ថបទ៖ នឿត សុភក្ត្រ