​បាល់ទាត់៖ ​Tottenham Hotspurs បាន​រង​បរាជ័យ​ក្រោម​ថ្វី​ជើង​ក្រុម​ភ្ញៀវ Manchester United ៣-១ យប់មិញ​ក្នុង​សប្តាហ៍​ទី៣១ នៃ​ក្របខណ្ឌ English Premier League​។ ​​នេះ​ជា​បរាជ័យ​ទី ១០ របស់ Spurs នៅក្នុង​លី​គ​រដូវ​កាល​នេះ និង​ជា​លើកដំបូង​នៃ​អាជីព​ដឹកនាំ​របស់ Jose Mourinho ដែល​ដឹកនាំ​ក្រុម​ចាញ់ ១០ប្រកួត​ក្នុង​មួយ​រដូវ​កាល​។

​​ខ្សែប្រយុទ្ធ​កូរ៉េ Heung-min Son បើក​ការ​នាំមុខ​ឲ្យ Spurs នៅ​ចុង​វគ្គ​ទី១​។ ​​តែ​ចូល​វគ្គ​ទី២ Manchester United បាន​វាយបក​ ៣​គ្រាប់​វិញ​ដោយ Fred, Edinson Cavani និង Mason Greenwood​។ ​​បរាជ័យ​នេះ​ធ្វើឲ្យ Spurs កាន់តែ​លំបាក​ក្នុងការ​ដណ្តើម​កៅអី Top4 ដើម្បី​ឱកាស Champions League រដូវ​កាល​ក្រោយ ​ដោយ​នៅពេលនេះ​កំពុង​ឈរ​លេខ៧ ដេញ​ពីក្រោយ​ក្រុម​លេខ៤ West Ham ៦ពិន្ទុ​។ ​​ចំណែក Manchester United ជ័យជំនះ​ធ្វើឲ្យ​ពួកគេ​បន្ត​ឈរ​លេខ២ តែ​កាត់បន្ថយ​ការនាំ​មុខ​របស់ Manchester City មក​ត្រឹម ១១ពិន្ទុ ​និង​នៅ​សល់​ ១​ប្រកួត​ក្នុង​ដៃ បន្ទាប់ពី​ក្រុម​របស់លោក Pep Guardiola ចាញ់ Leeds United ក្នុង​ទឹកដី​ខ្លួនឯង ២-១​។

​​ងាក​មក​ការប្រកួតប្រជែង​តំណែង Top4 វិញ​ក្រុម​ញញួរ​ធំ West Ham បាន​យកឈ្នះ Leicester City ៣-២​។ ​​ក្រុម​របស់លោក David Moyes បាន​នាំ​មុន​ដល់​ទៅ ៣គ្រាប់​ដោយ ២​គ្រាប់​របស់​កីឡាករ​ខ្ចី​ជើង​ពី Manchester United, Jesse Lingard និង Jarrod Bowen ខណៈ Leicester City តាម​ពីក្រោយ​វិញ​ដោយ​ខ្សែប្រយុទ្ធ Kelechi Iheanacho​។ ​​ជ័យជំនះ​នេះ​ធ្វើឲ្យ West Ham ឡើងមក​លេខ៤ វិញ​មាន ៥៥ពិន្ទុ​ដេញ​ពីក្រោយ Leicester តែ ១ពិន្ទុ​ប៉ុណ្ណោះ​ ខណៈ​នៅសល់ ៧ប្រកួត​ទៀត​ចប់​រដូវ​កាល​៕

​អត្ថបទ​៖​នាង សុភា​វុ​ធ