សៀមរាប៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បាននាំយកអំណោយរាជរដ្ឋាភិបាលកម្ពុជា ជូនគ្រួសាររងគ្រោះងាយរងគ្រោះ និងចាស់ជរាក្រីក្រ ចំនួនជាង ១០០គ្រួសារ ក្នុងឃុំចំនួន៣ នៃស្រុកក្រឡាញ់ ដែលរងផលប៉ះពាល់ដោយជំនន់ទឹកភ្លៀង។
ឯកឧត្តម សុខ ប៊ុនថា រដ្ឋលេខាធិកាក្រសួងសង្គមកិច្ច អតីតយុទ្ធជន និងយុវនីតិសម្បទា បានពាំនាំការសួរសុខទុក្ខពីសំណាក់ប្រមុខរាជរដ្ឋាភិបាល សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរ និងប្រឹងប្រែងដោះស្រាយការលំបាករបស់ប្រជាពលរដ្ឋគ្រប់ទីកន្លែង គ្រប់ពេលវេលា ព្រមទាំងបានសម្តែងការសោកស្តាយចំពោះផលប៉ះពាល់ដោយសារជំនន់ទឹកភ្លៀងកន្លងមកថ្មីៗនេះផងដែរ។
ឯកឧត្តម បានលើកឡើងថា ការជន់លិចដោយសារជំនន់ទឹកភ្លៀងឆ្នាំនេះ គឺជួបប្រទះស្ទើរតែទូទាំងប្រទេស ជាមួយគ្នានេះរាជរដ្ឋាភិបាល បានដោះស្រាយ និងឆ្លើយតបក្នុងភាពបន្ទាន់ ទៅតាមដំណាក់ៗ និងជាជំហានៗជូនគ្រួសាររងគ្រោះ និងងាយរងគ្រោះ។
ឯកឧត្តម បានផ្តាំផ្ញើដល់មេភូមិ រដ្ឋបាលឃុំ ស្រុក ត្រូវសហការគ្នា ស្រង់ និងកំណត់មុខសញ្ញាគ្រួសារក្រីក្រ និងងាយរងហានិភ័យ ដើម្បីផ្តល់ប្រាក់ឧបត្ថម្ភពីរាជរដ្ឋាភិបាល ដែលជាកម្មវិធីថ្មីសម្រាប់ឧបត្ថម្ភ សាច់ប្រាក់ជូនគ្រួសារក្រីក្រ និងងាយរងហានិភ័យ ។
លោកស្រី ម៉ននី រង្សី អភិបាលរងខេត្តសៀមរាប បានបញ្ជាក់ថា ភ្លៀងធ្លាក់ជាបន្ដបន្ទាប់ បណ្តាល ឱ្យមានជំនន់ និងប៉ះពាល់ដល់ស្រុកចំនួន៩ ក្នុងចំណោម១២ក្រុងស្រុករបស់ខេត្តសៀមរាប ហើយគ្រោះធម្មជាតិនេះ បានប៉ះពាល់ទៅលើលំនៅឋាន ដំណាំស្រូវ និងហេដ្ឋារចនាសម្ព័ន្ធនានា ក្នុងមូលដ្ឋានជាច្រើន ហើយស្រុកដែលប៉ះពាល់ធ្ងន់ធ្ងរ និងយូរថ្ងៃជាងគេ គឺស្រុកស្រីស្នំ និងស្រុកក្រឡាញ់ នេះ៕ អត្ថបទ៖ ឈិត សាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
