ភ្នំពេញ ៖ មហាវិទ្យាល័យសង្គមសាស្រ្ត មនុស្សសាស្ត្រ នៃសាកលវិទ្យាល័យភូមិន្ទភ្នំពេញ បានរៀបចំសិក្ខាសាលាចំនួន៣ថ្ងៃចាប់ពីថ្ងៃទី ១៩-២១ ខែតុលា នៅទីរួមខេត្តកំពង់ចាម ស្ដីពីការបិទបញ្ចប់ការធ្វើបច្ចុប្បន្នភាពថ្នាក់បរិញ្ញាបត្រ សង្គមវិទ្យា ទស្សនវិទ្យា និងចិត្តវិទ្យា ក្រោមគម្រោងថ្នាក់ជាតិមួយស្ដីពីការកែលម្អការអប់រំឧត្តមសិក្សា HEIP។

វិស័យអប់រំគឺជាសូចនាករដ៏សំខាន់មួយក្នុងផែនការអភិវឌ្ឍន៍ជាតិ។ យុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលក៏បាន​កំណត់យក​ធនធានមនុស្ស​ជាអាទិភាពចម្បង​គេក្នុងគោលនយោបាយជាតិហើយជាមួយគ្នានេះដើម្បីកសាងធនធានមនុស្សប្រកបដោយគុណភាព ក្រសួងអប់រំ យុវជន និងកីឡា ដែលជាសេនាធិការឱ្យរាជរដ្ឋាភិបាល បានយកចិត្តទុកដាក់ជាខ្លាំងក្នុងការពង្រឹងគុណភាពអប់រំ ធ្វើយ៉ាងណាកែលម្អកម្មវិធីសិក្សាគ្រប់កម្រិតដើម្បីសម្របខ្លួនទៅនឹងនិន្នាការរបស់សាកលភាវូបនីយកម្ម។ ក្នុងនោះដែរដើម្បីឆ្លើយតបនឹងគោលនយោបាយជាតិក្រសួងអប់រំយុវជន និងកីឡា បានដាក់ចេញកម្មវិធីថ្នាក់ជាតិមួយ ដើម្បីកែលម្អការអប់រំឧត្តមសិក្សា HEIP ដែលមានការគាំទ្រហិរញ្ញប្បទានពីធនាគារពិភពលោក ដោយអនុវត្តគម្រោងរយៈពេល ៦ឆ្នាំ ចាប់ពីឆ្នាំ ២០១៨-២០២៤ ។

ក្នុងនោះសាកលវិទ្យាល័យភូមិន្ទភ្នំពេញ ដែលជាថ្នាលបណ្ដុះបណ្ដាលធនធានមនុស្សដ៏ធំជាងគេមួយនៅកម្ពុជា មានមហាវិទ្យាល័យធំៗពីរ គឺមហាវិទ្យាល័យវិទ្យាសាស្រ្ត និង មហាវិទ្យាល័យសង្គមសាស្រ្ត-មនុស្សសាស្រ្ត ក៏ទទួលបានការអនុវត្តគម្រោងដ៏មានសារៈសំខាន់នេះ ដើម្បីកសាងសមត្ថភាពសាស្រ្តាចារ្យ និងធនធានមនុស្ស​សម្រាប់បំពេញ​ត្រូវការទីផ្សារការងារនៅក្នុងសង្គម។

លោកបណ្ឌិត អុប វណ្ណា សាស្ត្រាចារ្យនៃសាកលវិទ្យាល័យភូមិន្ទភ្នំពេញ និងជាអ្នកគ្រប់គ្រងគម្រោង HEIP ក្នុងភាពជដៃគូរវាងមហាវិទ្យាល័យសង្គមសាស្ត្រ មនុស្សសាស្ត្រ និងសាកលវិទ្យាល័យសកាំង បានលើកឡើងថា តាមរយៈគម្រោង HEIP នេះ មហាវិទ្យាល័យសង្គមសាស្រ្ត មនុស្សសាស្រ្ត នៃសាកលវិទ្យាល័យភូមិន្ទភ្នំពេញ ទទួលបានកញ្ចប់ថវិកា ៧៦ ម៉ឺនដុល្លារ ក្នុងការអនុវត្តកម្មវិធីកែលម្អលើកកម្ពស់គុណភាពអប់រំថ្នាក់បរិញ្ញាបត្រសង្គមវិទ្យា ទស្សនវិទ្យា ចិត្តវិទ្យា និងថ្នាក់បណ្ឌិតខេមរសិក្សា ដោយផ្ដោតលើការកែលម្អកម្មវិធីសិក្សារួមមាន ការបង្រៀន ការរៀន ការស្រាវជ្រាវ និងបង្កើនសមត្ថភាព និងគុណវុឌ្ឍិសាស្រ្តាចារ្យ។

លោកបណ្ឌិតបានបន្តថា គម្រោង HEIP ដែលអនុវត្តសម្រាប់មហាវិទ្យាល័យសង្គមសាស្រ្ត មនុស្សសាស្រ្ត បានចាប់ផ្ដើមកាលពីឆ្នាំ ២០២១ និងបញ្ចប់នៅឆ្នាំ ២០២៣ ក្រោមកិច្ចសហការក្នុងភាពជាដៃគូរវាងសាកលវិទ្យាល័យសកាំងនៃសាធារណរដ្ឋកូរ៉េ ដែលកន្លងទៅសាកលវិទ្យាល័យទាំង២បានធ្វើការយ៉ាងជិតស្និទ្ធជាមួយគ្នាក្នុងការចែករំលែក និងផ្លាស់ប្ដូរបទពិសោធន៍អប់រំជាមួយគ្នា។

រយៈពេលកន្លង នៃការអនុវត្តគម្រោង ជាលទ្ធផលមហាវិទ្យាសង្គមសាស្រ្ត មនុស្សសាស្រ្ត នៃសាកលវិទ្យាល័យភូមិន្ទភ្នំពេញ ទទួលបានវឌ្ឍនភាពគួរឱ្យកត់សម្គាល់ ដោយក្នុងនោះ​ប្រមូលបាន​នូវធាតុចូលសំខាន់ៗជាច្រើនដើម្បីធ្វើបច្ចុប្បន្នភាពកម្មវិធីសិក្សារបស់ខ្លួន ព្រមទាំងបានលើកកម្ពស់គុណវុឌ្ឍិសាស្រ្តាចារ្យដល់ថ្នាក់បណ្ឌិត និងរៀបចំវគ្គសិក្ខាសាលាបណ្ដុះបណ្ដាលវិធីសាស្រ្តបង្រៀន ការសិក្សាស្រាវជ្រាវបែបវិទ្យាសាស្រ្ត ព្រមទាំងធ្វើបច្ចុប្បន្នភាពការស្រាវជ្រាវវិទ្យាសាស្ត្រ និងទ្រឹស្ដីវិវត្តថ្មីៗនៅក្នុងវិទ្យាសាស្ត្រសង្គម៕ អត្ថបទ៖ កញ្ញ ចេន សុជាតា