កំពង់ឆ្នាំង ៖ ថ្លែងនៅក្នុងកិច្ចប្រជុំផ្សព្វផ្សាយ និងជម្រុញការធ្វើប័ណ្ណកម្មសិទ្ធិលើដីរដ្ឋនៅក្នុងខេត្តកំពង់ឆ្នាំង ឯកឧត្តម សរ សុវណ្ណ រដ្ឋលេខាធិការក្រសួងរៀបចំដែនដីនគររូបណីយកម្មនិងសំណង់ បានបញ្ជាក់ទៅកាន់អាជ្ញាធរ ឃុំសង្កាត់ និង ស្រុក ក្រុង ត្រូវបន្តកិច្ចសហការជាមួយនិងមន្រ្តីជំនាញ ក្នុងការពន្លឿន លើកិច្ចការងារចុះកណត់អត្តសញ្ញាណដីធ្លី របស់រដ្ឋ តាមភូមិសាស្រ្តនីមួយៗ ដើម្បីរៀបចំរៀបចំនីតិវិធី នៃការផ្តល់បណ្ណកម្មសិទ្ធិលើដីរបស់រដ្ឋ ។

ឯកឧត្តម បានបន្តទៀតថា ក្រសួង នឹងជំរុញល្បឿនចុះបញ្ជីដីធ្លី និងការផ្តល់ប័ណ្ណកម្មសិទ្ធិដីធ្លីរបស់រដ្ឋអោយបានលឿន ដើម្បីបន្តអនុវត្តកាន់​តែស៊ីជម្រៅលើការ​កែទម្រង់ដីធ្លីដើម្បីរួមចំណែក​កាត់បន្ថយភាពក្រីក្រ ការធានាសន្តិសុខស្បៀង ការការពារបរិស្ថាន និងធនធានធម្មជាតិ និងការអភិវឌ្ឍសង្គមសេដ្ឋកិច្ចប្រកបដោយចីរភាព ស្របតាមផែនការនិង របស់ក្រសួងនិង រាជរដ្ឋាភិបាល ។

ឯកឧត្តមបានបន្តថា : មកទល់ពេលនេះលិខិតបទដ្ឋានជាច្រើន សម្រាប់ការងារដីធ្លីត្រូវរាជរដ្ឋាភិបាលសម្រេច និងដាក់ឲ្យអនុវត្តជាបន្តបន្ទាប់ ដូចជាការចុះបញ្ជីដីធ្លីមានលក្ខណៈជាប្រព័ន្ធ ការចុះបញ្ជីដីធ្លីមានលក្ខណៈដាច់ដោយដុំ ការគ្រប់គ្រង់ដីរដ្ឋ ការផ្តល់សម្បទានដីសង្គមកិច្ច ដើម្បីឆ្លើយតបទៅនឹងការអភិវឌ្ឍន៍សង្គម និង ធានាឱ្យបាននូវការកាន់កាប់ដីធ្លីដោយស្របច្បាប់ តាមរយៈនៃការផ្តល់បណ្ណកម្មសិទ្ធិដីធ្លី ឈានទៅលុបបំបាត់ទំនាស់នៃការកាន់កាប់ដីធ្លីមិនច្បាស់លាស់ ។ យោងតាមផែនការ របស់ក្រសួងរៀបចំដែនដីនគររូបនីយកម្មនិងសំណង់ គ្រោងនឹង​ផ្តល់បណ្ណកម្មសិទ្ធិដីធ្លីទាំងរដ្ឋនិងឯកជន នៅទូរទាំងប្រទេស ឱ្យបានអស់នៅឆ្នាំ២០២៣ខាងមុខនេះ ដើម្បីឆ្លើយតបទៅនឹងផែនការនេះ មន្រ្តីជំនាញនិងអាជ្ញាធរត្រូវ​តែសហការគ្នា​ដើម្បីបង្កើនល្បឿន​នៃការចុះបញ្ជីធ្លីតាមមូលដ្ឋានរបស់ខ្លួនតាមនីតិវិធី និងប្រជាពលរដ្ឋមានសិទ្ធគ្រប់គ្រាន់ក្នុងការគ្រប់គ្រងថែរក្សាដីធ្លី ដែលជាកម្មសិទ្ធិរបស់របស់ខ្លួនស្របទៅតាមច្បាប់ ៕ ហុង វាស្នា