ឧត្តរមានជ័យ៖ មន្ទីរធនធានទឹក និងឧតុនិយមខេត្តឧត្តរមានជ័យ ធ្វើការបិទទ្វារទំនប់បង្ហៀរទឹក នៅតាមបណ្តាលអាងស្តុបទឹកសំខាន់ៗមួយចំនួនក្នុងខេត្ត ដើម្បីរក្សាប្រភពទឹកទុកសម្រាប់​ឲ្យ​ប្រជា​កសិករ​ធ្វើកសិកម្ម​នៅរដូវប្រាំង ​ខណៈជំនន់ទឹកភ្លៀងបានស្រក។

លោក ញឺន កួន ប្រធានមន្ទីរធនធានទឹក និងឧតុនិយមខេត្តឧត្តរមានជ័យ​ បញ្ជាក់ថា ដើម្បីរក្សា​ប្រភព​ទឹក​សម្រាប់​ទុក​ស្រោចស្រព​ផល​ដំណាំ​កសិកម្មរបស់កសិករ​ មន្រ្តីជំនាញ​បានធ្វើការ​បិទទ្វារ​ទឹកមួយចំនួន ក្នុងតំបន់ទំនប់អាងស្តុបទឹកស្ទឹងស្រែង១​ ស្ទឹងស្រែង២ ​អាងទឹកទំនប់ថ្មី អាងទំនប់ទឹក០៥ ​ស្រុកត្រពាំងប្រាសាទ​ នឹងអាងស្តុបទឹកត្រពាំងវេង​ ក្រុងសំរោង ក្នុង​ភូមិសាស្រ្ត​ខេត្តឧត្តរមានជ័យ ​ដើម្បីរក្សា​ប្រភពទឹក​កុំឲ្យមានការ​ខ្វះខាត​នៅពេលខាងមុខ។

លោកបានឲ្យដឹងថា ទំនប់អាងស្តុបប្រភពទឹកស្ទឹងស្រែង១ ស្ទឹងស្រែង២ នឹងអាងទឹកទំនប់ថ្មី អាង​ស្តុប​ប្រភពទឹកទាំង៣ ​ទីតាំងបច្ចុប្បន្នអាចស្តុបប្រភពទឹកបានរហូតដល់​ទៅចំនួន ៥៦៤លានម៉ែត្រ​គីប ​ក្នុងនោះអាងស្តុបទឹកស្ទឹងស្រែង១ មានប្រភពទឹកចំនួន ​១៥៨លានម៉ែត្រគីប អាងស្តុប​ទឹកស្ទឹងស្រែង២ មានចំនួន១៥៣លានម៉ែត្រគីប ​និងអាងទឹកទំនប់ថ្មី ​មានចំនួន ១៥៣លានម៉ែត្រគីប សំរាប់​ជាប្រយោជន៍រួមជួយ​ដល់​ប្រជាកសិករធ្វើស្រែ​ចំការ​និង​ផលដំណាំផ្សេងៗ​បាន​ទាំង​រដូវប្រាំ និងវស្សា ។

លោកបន្តថា ទំនប់អាងស្តុបប្រភពទឹកទាំងបី​ទីតាំង​ខាងលើនេះ វា​មាន​សក្ដានុពល​អាច​ជួយ​ស្រោច​ស្រព​លើ​ការងារ​កសិកម្ម​ការបង្ករបង្កើន​ផល​ដាំ​ដំណាំ​របស់​ប្រជា​កសិករ​បានច្រើន​នៅ​តាម​បណ្តា​មូល​ដ្ឋាន​ក្នុងស្រុកចំនួន៣ស្រុក ​និងខេត្ត២ ក្នុង​នោះមានស្រុកចុងកាល់ ស្រុកអន្លង់វែង ស្រុកត្រពាំងប្រាសាទ ។ ខេត្តចំនួន២ទៀតគឺខេត្តសៀមរាប ស្រុកស្រីស្នំ និងខេត្តបន្ទាយមានជ័យ ស្រុកភ្នំស្រុក លើផ្ទៃដីកសិកម្មជាង ៣៥ ០០០ហិកតា ៕ អត្ថបទ៖ ឃិន សារិទ្ធ