បន្ទាយមានជ័យ៖ អគ្គនាយកដ្ឋានសុខភាពសត្វ ​និងផលិតកម្មសត្វ ចុះចាក់វ៉ាក់សាំងបង្ការការពារ​ជំងឺ​អ៊ុតក្តាម ​លើគោ ក្របី ចំនួន ១០០០ក្បាល ជូនដល់ប្រជាពលរដ្ឋរស់​នៅ​ចំណុចឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ​ នៅរសៀលថ្ងៃទី២១ ខែតុលាឆ្នាំ២០២២នេះ។

ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកដ្ឋានសុខភាពសត្វ និង​ផលិតកម្ម​សត្វ ​បាន​បញ្ជាក់ថា ​អគ្គនាយកដ្ឋានសុខភាពសត្វ ​និង​ផលិតកម្មសត្វ ​ផ្តើម​ធ្វើការ​វ៉ាក់សាំង​ដើម្បីបង្ការការពារជំងឺឆ្លង ​អ៊ុតក្តាម ដល់​សត្វពាហណៈ​គោ ​ក្របី ​របស់​ប្រជាពលរដ្ឋនៅតាម មូលដ្ឋាន​ ដើម្បី​បង្ការ​ទប់ស្កាត់​នូវរាល់​បញ្ហា​ប្រឈម​ជំងឺ​ឆ្លង​នានា​ ដែល​អាច​កើតឡើង​រាតត្បាត​លើ​សត្វពាហណៈ បន្ទាប់​ពី​ទឹកជំនន់​បាន​ស្រក​នោះ ។

ទន្ទឹមគ្នានោះ ឯកឧត្តម បាន​អំពាវ​នាវ​ដ​ល់ប្រជា​ពលរដ្ឋត្រូវ​បន្តការ​យកចិត្តទុកដាក់​ក្នុង​ការ​តាមដាន​ជា​ប្រចាំ​ចំពោះ​សត្វពាហណៈ​ណា​ដែល​មាន​សុខភាព​មិន​ប្រក្រតី​នោះ​ ត្រូវ​ប្រញាប់​រួសរាន់​ផ្តល់​ដំណឹង​ដល់​មន្រ្តីជំនាញ​ក្នុងមូលដ្ឋាន​ឲ្យឆាប់ ​ដើម្បី​ធ្វើការ​សង្គ្រោះ​ឱ្យ​បាន​ទាន់​ពេលវេលា​ជៀសវាង​ការ​ខាតបង់​របស់​បងប្អូន៕ អត្ថបទ៖ ឃិន សារិទ្ធ