ភ្នំពេញ៖ ប្រតិភូរាជរដ្ឋាភិបាលកម្ពុជា អមដំណើរដោយសហគ្រិនក្នុងស្រុកជាច្រើននាក់ បានទៅទស្សនកិច្ចនៅប្រទេសកូរ៉េខាងត្បូងដើម្បីចូលរួមកម្មវិធីនៃគម្រោងTask Project និងដើម្បីស្វែងយល់បច្ចេកវិទ្យាថ្មីៗ ហើយនិងស្វែងរកឱកាសទាក់ទាញវិនិយោគិនកូរ៉េឲ្យមកធ្វើជាដៃគូវិនិយោគ នៅប្រទេសកម្ពុជាបន្ថែមទៀតផងដែរ។
ដំណើរទស្សនកិច្ច រយៈពេលមួយសប្តាហ៍ គឺចាប់ពីថ្ងៃទី១៥-២១ ខែតុលា ឆ្នាំ២០២២នេះ ដែលដឹកនាំដោយលោកស្រី ហង្ស លីណា ប្រតិភូរាជរដ្ឋាភិបាល ទទួលបន្ទុកអគ្គនាយកវិទ្យាស្ថានជាតិស្ថិតិ។
សូមបញ្ជាក់ថា Task Project គឺជាគម្រោងក្រោមកិច្ចសហប្រតិបត្តិការ និងជំនួយរវាងសហគ្រិន និងរដ្ឋាភិបាលកូរ៉េ ជាមួយនិងសហគ្រិន និងរាជរដ្ឋាភិបាលកម្ពុជា ក្នុងគោលដៅដើម្បីជួយទៅលើផ្នែកបច្ចេកទេស ក៏ដូចជាគម្រោងវិនិយោគផ្សេងៗលើវិស័យវាយនភណ្ឌក្នុងប្រទេសកម្ពុជាឲ្យកាន់តែមានភាពទំនើបកម្មបន្ថែមទៀត។
លោក លី សំណាង ជាវិនិយោគិនក្នុងស្រុកមួយរូបនៃក្រុមហ៊ុនអប្សារា ហ្គាមេន ដែលចូលរួមក្នុងកម្មវិធីនេះដែរបានថ្លែងថា កម្មវិធីទស្សនកិច្ចនេះ គឺជាជំនួយក្រោមកិច្ចសហការរវាងក្រសួងឧស្សាហកម្ម និងសមាគមវាយនភ័ណ្ឌកូរ៉េ តាមរយៈគំរោងTASK ដែលសម្របសម្រួលដោយមជ្ឈមណ្ឌល DyeTech ។ សព្វថ្ងៃគំរោងនេះកំពុងដំណើរការជាមួយប្រទេសកំពុងអភិវឌ្ឍចំនួន៥ នាពេលបច្ចុប្បន្នផងដែរ។
លោកបន្ថែមថា ការស្រាវជ្រាវលើផ្នែកវាយនភ័ណ្ឌនៅប្រទេសកូរ៉េខាងត្បូង មិនផ្តោតតែលើសំលៀកបំពាក់ តែមួយមុខប៉ុណ្ណោះនោះទេ គឺផ្តោតលើ Fiber ដែលគេអាចផលិតជាសំលៀកបំពាក់ដែលផ្សារភ្ជាប់ជាមួយឧស្សាហកម្ម 4.0 ដែលជាបច្ចេកវិទ្យាទំនើប និងផ្តល់អត្ថប្រយោជន៍ជាច្រើនដល់អ្នកប្រើប្រាស់។ Fiber ដែលផលិតធ្វើជាខោអាវបានភ្ជាប់ជាមួយ Sensor ផ្តល់ពត៌មានទៅទិន្នន័យ Cloud និងមានមុខងារក្នុងការរុញការវិភាគស្ថានភាពសុខភាពរបស់មនុស្សទៅកាន់មន្ទីរពេទ្យ ដែលជាសេវាកម្មថែរក្សា និងគាំពារសុខភាពរបស់អ្នកប្រើប្រាស់។ មិនតែប៉ុណ្ណោះ Fiber គេអាចផលិតធ្វើជា ឆ្អឹង ឬបេះដូងសប្បនិមិត្ត , ផលិតផលគ្រឿងសំអាង , កង់ឡាន , សម្លៀកបំពាក់ឯកទេស , និងសំភារៈប្រើប្រាស់ជាច្រើនទៀត។
បើតាមការបញ្ជាក់ពីលោក លី សំណាង ក្នុងឱកាសដំណើរទស្សនកិច្ចនេះ ក្រុមសហគ្រិនដទៃទៀត ក៏បានជួបពិភាក្សាជាមួយនាយកក្រុមហ៊ុនល្បីៗប្រចាំប្រទេសកូរ៉េជាច្រើន និងបានស្វែងយល់អំពីលក្ខណៈបច្ចេកវិជ្ជាទំនើបចុងក្រោយ រួមទាំងអត្ថប្រយោជន៍ជាច្រើន នៃគម្រោងទាំងនេះ ហើយលោកក៏បានលើកឡើងអំពីសក្តានុពលនៃវិស័យវាយនភណ្ឌក្នុងប្រទេសកម្ពុជា ការលើកទឹកចិត្តរបស់រាជរដ្ឋាភិបាលសម្រាប់វិនិយោគិនក្រៅស្រុក និងបានបង្ហាញពីភាពខ្លាំងរបស់វិនិយោគិនម្ចាស់ស្រុក ក្នុងគោលបំណងជំរុញលើកទឹកចិត្តដល់វិនិយោគិនក្រៅប្រទេស អាចមានឱកាសចូលមកវិនិយោគនៅក្នុងប្រទេសកម្ពុជាផងដែរ។
បើតាមការបញ្ជាក់ពីក្រុមប្រតិភូបានឲ្យដឹងថា ភាគីកូរ៉េខាងត្បូង ពិតជារីករាយ និងមានចំណាប់អារម្មណ៍យ៉ាងខ្លាំងចំពោះគោលដៅវិនិយោគនៅក្នុងប្រទេសកម្ពុជា ដោយផ្អែកលើសក្តានុពលនៃវិស័យវាយនភណ្ឌ គោលនយោបាយរបស់រាជរដ្ឋាភិបាល រួមនិងកិច្ចសហការភាពជាដៃគូនៃក្រុមអ្នកវិនិយោគិនក្នុងប្រទេសកម្ពុជា ហើយក្រុមអ្នកវិនិយោគកូរ៉េក៏នឹងអញ្ជើញមកទសន្សកិច្ចនៅកម្ពុជា ក្នុងពេលឆាប់ៗខាងមុខនេះ ដើម្បីពិនិត្យគំរោងវិនិយោគរបស់កម្ពុជា និងនាំយកបច្ចេកវិជ្ជាទំនើបចុងក្រោយ ដែលអាចជួយដល់វិស័យវាយនភណ្ឌនៅក្នុងប្រទេសកម្ពុជាផងដែរ ។
សូមបញ្ជាក់ថា ដំណើរទស្សនកិច្ចរបស់ប្រតិភូ និងក្រុមអ្នកវិនិយោគរបស់កម្ពុជានេះគឺមានគោល បំណងចំនួន៥ដូចជា ១-ទស្សនកិច្ចនៅមជ្ឍមណ្ឌល DyeTech ដែលជាមជ្ឍមណ្ឌលស្រាវជ្រាវ និងបណ្តុះបណ្តាលបច្ចេកទេសលើវិស័យវាយនភ័ណ្ឌរបស់កូរ៉េ, ២-ទស្សនកិច្ចមន្ទីរពិសោធន៍ និងក្រុមហ៊ុនផលិតក្រណាត់ ក្នុងសួនឧស្សាហកម្ម DaeGu, ៣-ទស្សនកិច្ច និងជំនួបជាមួយក្រុមវិនិយោគក្រុមហ៊ុនកូរ៉េល្បីៗចំនួន៦, ៤-ទស្សនកិច្ចនៅសារមន្ទីរវាយនភ័ណ្ឌកូរ៉េ និង ៥-កម្មវិធីពិព័រអន្តរជាតិផ្នែកសំលៀកបំពាក់ ស្បែកជើង ការច្នៃម៉ូត និងបច្ចេកវិទ្យាសំលៀកបំពាក់ ឆ្នាំ២០២២នៅទីក្រុងប៊ូសានប្រទេសកូរ៉េជាដើម៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
