ភ្នំពេញ៖ តំណាងស្ថានទូតចិន ប្រចាំនៅកម្ពុជា អាជ្ញាធរជាតិប្រយុទ្ធប្រឆាំងគ្រឿងញៀន និង​ក្រសួងអប់រំយុវជន និងកីឡា នៅល្ងាចថ្ងៃទី២១ ខែតុលានេះ បានអញ្ជើញចុះត្រួតពិនិត្យ ការរៀបចំ​និងការត្រៀមបើកដំណើរការបណ្ណាល័យគ្រឿងញៀន ស្ថិតក្នុងបណ្ណាល័យសម្តេច ហ៊ុន សែន នៅ​ក្នុងបរិវេណវិទ្យាល័យបឹងត្របែក ​រាជធានីភ្នំពេញ ដើម្បីបើកឱកាសឲ្យសិស្ស និងអ្នកសិក្សានានា សិក្សាស្រាវជ្រាវចំណេះដឹងពាក់ព័ន្ធនឹងគ្រឿងញៀន។

ក្នុងដំណើរចុះទស្សនកិច្ចនេះ លោក លី ស៊ាងមីង ទីប្រឹក្សាទំនាក់ទំនងកិច្ចការនគរបាលប្រចាំ ស្ថាន ទូត ចិន នៅកម្ពុជា ថ្លែងសន្យាថា នឹងបង្កើនការកៀងគរជំនួយ និងគ្រឿងបំពាក់នានាពីខាង​ប្រទេស​ចិន​ដើម្បីជួយវិស័យអប់រំ ​ផ្តល់ចំណេះដឹងពាក់ព័ន្ធនឹងគ្រឿងញៀន និងការប្រយុទ្ធប្រឆាំង​គ្រឿង​ញៀននៅកម្ពុជា។

យ៉ាងណាក៏ដោយ ​លោក លី ស៊ាងមីង បានកោតសសើរដល់កម្ពុជាដែលបានផ្តល់កិច្ច​សហការ​យ៉ាង​ល្អលើគ្រប់វិស័យជាភាគីចិន ​ពិសេសកិច្ចសហប្រតិបត្តិការបង្ការ ទប់ស្កាត់ បង្រ្កាប បទល្មើស​គ្រឿងញៀន ហើយការបង្កើតបណ្ណាល័យគ្រឿងញៀននាពេលនេះគឺពិតមានសារ​សំខាន់​បំផុត​ចូលរួមចំណែកជួយយុវជនឱ្យទទួលបានចំណេះដឹងនិងចាកផុតពីបញ្ហាគ្រឿងញៀន។

លោកជំទាវបណ្ឌិត សឿ សុជាតា អនុរដ្ឋលេខាធិការ ក្រសួងអប់រំ យុវជន និងកីឡា ថ្លែងថា បណ្ណាល័យ​គ្រឿងញៀន ​ជាប្រភេទបណ្ណាល័យឌីជីថល ​និងបណ្ណាល័យដំបូងគេ ដែលត្រូវបាន​បង្កើតឡើង​បម្រើដល់ការសិក្សាស្រាវជ្រាវ ​ចំណេះដឹងពាក់ព័ន្ធនឹងគ្រឿងញៀនរបស់​សិស្ស​និង​អ្នកសិក្សា។

បន្ថែមលើការងារនេះដែរ ​លោក ជំទាវ សឿ សុជាតា ​បានស្នើសុំដល់ភាគីមិត្តចិន​ជួយ​បណ្តុះ​បណ្តាល​ធនធានមនុស្សពាក់ព័ន្ធគ្រឿងញៀន ​ដើម្បីជំរុញការគ្រប់គ្រង ​ការអប់រំ និងប្រយុទ្ធប្រឆាំង​គ្រឿងញៀន ​មានប្រសិទ្ធភាព។

សូមបញ្ជាក់ថា បណ្ណាល័យគ្រឿងញៀន ជាប្រភេទបណ្ណាល័យឌីជីថល​ ហើយគ្រប់អ្នកសិក្សាទាំង​អស់​អាច​ចូល​សិក្សាស្រាវជ្រាវតាមសៀវភៅនានា​ដែល​ដាក់តំកល់ក្នុង​បណ្តាល័យផង ដាក់នៅក្នុង​ប្រព័ន្ធកុំព្យូទ័រផង​ និងអាចចូលអានសិក្សាស្រាវជ្រាវ​នៅតាមប្រព័ន្ធទូរសព្ទដៃផងដែរ៕អត្ថបទ ស៊ុម សុខជា