សមាគមគ្រូពេទ្យស្ម័គ្រចិត្តយុវជនសម្ដេចតេជោ(TYDA)នៅថ្ងៃទី២២ ខែតុលា ឆ្នាំ២០២២នេះ បាន​បានបន្តចុះព្យាបាលជំងឺដល់កងទ័ព គ្រួសារកងទ័ព និងប្រជាពលរដ្ឋ​ដោយឥត​គិតថ្លៃ​ចំនួន​ជាង​ ៣០០០នាក់នៅក្នុងឃុំសេកុង ស្រុកសៀមប៉ាង ខេត្តស្ទឹងត្រែង ដោយកម្មវិធី​មនុស្ស​នេះ​ក៏​មាន​ការ​ចូលរួមពីសំណាក់អាជ្ញាធរដែនដី យុវជនកាកបាទក្រហមកម្ពុជា យុវជន ស.ស.យ.ក និស្សិត​សមាគមអាហារូបករណ៍ អ.ម.ត និងផ្នែកដែលពាក់ព័ន្ធជាច្រើនទៀតផងដែរ។

ថ្លែងនៅក្នុងកម្មវិធីនោះ លោកវេជ្ជបណ្ឌិត ស៊ូ ស៊ីផាណ្ណា ប្រធានប្រតិបត្តិ​សមាគម​គ្រូពេទ្យ​ស្ម័គ្រ​ចិត្ត​យុវជន​សម្តេចតេជោ(TYDA) បានលើកឡើងថា សម្ដេចតេជោ ហ៊ុន សែន និងសម្ដេចកិត្តិ​ព្រឹទ្ធ​បណ្ឌិត តែងតែគិតគូរសុខទុក្ខចំពោះសុខភាព និងការរស់នៅរបស់បងប្អូនប្រជាពលរដ្ឋ និងតែង​តែបង្កលក្ខណៈងាយស្រួលក្នុងការព្យាបាលជំងឺជូនប្រជាពលរដ្ឋដល់ទីកន្លែង និងគ្រប់​ទី​កន្លែង។ ជាក់ស្តែងនៅថ្ងៃនេះ តាមរយៈការយកចិត្តទុកដាក់ពីសំណាក់ឯកឧត្តម ហ៊ុន ម៉ាណែត និង​លោកជំទាវ ពេជ ចន្ទមុន្នី ប្រធានអនុ​ប្រធាន​ក្រុម​ប្រឹក្សា​ភិបាល​សមាគម TYDA​ បាន​ឲ្យ​ក្រុម​ការងារ និង​កម្លាំង​ស្ម័គ្រចិត្ត​ នៃ​សមាគម​ចុះ​មកព្យាបាល​ជូន​គ្រួសារ​កងទ័ព និង​ប្រជាពលរដ្ឋ​ឥត​គិត​ថ្លៃ​ប្រកប​ដោយ​ទឹក​ចិត្ត​មន​សិការវិជ្ជាជីវៈក្តីស្រឡាញ់ និងការយក​ចិត្ត​ទុក​ដាក់​ចំពោះ​ប្រជាពលរដ្ឋ​។

លើសពីនេះ ព្រមទាំងបញ្ជូនប្រជាពលរដ្ឋដែលមានករណីធ្ងន់ធ្ងរចំនួន ៣៨ នាក់​មក​ព្យាបាល​នៅ​រាជ​ធានី​ភ្នំពេញ ក្រោមការឧបត្ថម្ភទាំងស្រុងរបស់សម្ដេចតេជោ និងសម្ដេចកិត្តិព្រឹទ្ធ​បណ្ឌិត​តាម​រយៈ​ឯកឧត្តម បណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី និងក្រុមការងារ​សមាគម​គ្រូពេទ្យ​ស្ម័គ្រចិ​ត្តយុវជនសម្តេចតេជោផងដែរ៕ អត្ថបទ៖ បាន ចក់