កំពង់ចាម៖ នាព្រឹកថ្ងៃទី២៣ ខែតុលា ឆ្នាំ២០២២ ឯកឧត្តម វេង សាខុន ប្រធានក្រុមការងារគណបក្សចុះមូលដ្ឋានស្រុកតំបែរ ខេត្តត្បូងឃ្មុំ និងស្រុកកំពង់សៀម ខេត្តកំពង់ចាម រួមជាមួយឯកឧត្តម លន់ លឹមថៃ សមាជិករដ្ឋសភា និងជាតំណាងរាស្ត្រមណ្ឌលកំពង់ចាម និងសហការីបានអញ្ជើញចុះពិនិត្យមើលវឌ្ឍនភាព នៃការសាងសង់ព្រះវិហារនៅវត្តគង់វង្សរង្សី ហៅវត្តកោះកុក ស្ថិតក្នុងភូមិកោះកុក ឃុំកោះទន្ទឹម ខេត្តកំពង់ចាម។
ឆ្លៀតយកឱកាសនេះ ឯកឧត្តមប្រធានក្រុមការងារបានមានមតិសំណេះសំណាលជាមួយពុទ្ធបរិស័ទចំណុះជើងវត្តដោយបានពាំនាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹកពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត មកជូនពុទ្ធបរិស័ទទាំងអស់ ដែលមានវត្តមាននៅទីនេះ និងបងប្អូននៅទូទាំងខេត្តកំពង់ចាម ជាពិសេសសម្តេចបានអរគុណ និងវាយតម្លៃខ្ពស់ចំពោះសមាជិកទាំងអស់ដែលបានបន្តគាំទ្រ គណបក្សប្រជាជនកម្ពុជា ជាពិសេសបងប្អូននៅក្នុងស្រុកកំពង់សៀម ខេត្តកំពង់ចាម។
ឯកឧត្តមបានថ្លែងការកោតសរសើរ និងវាយតម្លៃខ្ពស់ជូន ចំពោះសប្បុរសជន និងពុទ្ធបរិស័ទជិតឆ្ងាយទាំងអស់ដែលមានសធាជ្រះថ្លាបានចូលរួមបរិច្ចាកថវិកា និងសម្ភារសាងសង់ សរុបថវិកាបានចំនួន ៧៩ ៧០០ដុល្លារ (មិនរួមតម្លៃសម្ភារសំណង់) ក្នុងពិធីបុណ្យបញ្ចុះបឋមសិលាសាងសង់ព្រះវិហារកាលពីថ្ងៃទី១០ ខែកញ្ញា ឆ្នាំ២០២២ កន្លងទៅ។ ឯកឧត្តម ក៏បានផ្តាំផ្ញើដល់ប្រជាជននៃស្រុកកំពង់សៀម និងទូទាំងខេត្តកំពង់ចាមទាំងអស់ត្រូវបន្តចូលរួមថែរក្សាសុខសន្តិភាព ដោយត្រូវចូលរួមគាំទ្រសម្តេចតេជោ ដែលជានាយករដ្ឋមន្រ្តី និងបោះឆ្នោតជូនគណបក្សប្រជាជនកម្ពុជាជានិរន្ត ក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ខាងមុខនេះ។
នាព្រឹកថ្ងៃដដែល ឯកឧត្តមប្រធាន និងសហការីបានបន្តដំណើរមកឃុំអូរស្វាយ ខេត្តកំពង់ចាម ដើម្បីពិនិត្យវឌ្ឍនភាព នៃការសាងសងកុដិ សម្រាប់សមណៈសិស្សពុទ្ទិកបឋមសិក្សានៅវត្តខែលជ័យ និងប្រគេនថវិកាចំនួន ៥ ០០០ ដុល្លារអាមេរិកបន្ថែមទៀតដល់ព្រះចៅអធិការវត្តជាទីសក្ការៈដ៏ខ្ពង់ខ្ពស់ ដើម្បីបន្តការសាងសង។
ក្នុងពិធីសំណេះសំណាលនាព្រឹកនេះ ឯកឧត្តមប្រធានក្រុមការងារបានសន្យាថា និងខិតខំស្វះស្វែងរកថវិកាក្នុងការជួយកសាងហេដ្ឋារចនាសម្ព័ន្ធទាំងពុទ្ធចក្រ និងអាណាចក្រ ហើយសន្យាថានឹងបន្តផ្តល់ការជួយគាំទ្រ ធ្វើយ៉ាងណាធ្វើការកសាងកុដិ សម្រាប់សមណៈសិស្សពុទ្ទិកបឋមសិក្សានេះឱ្យបានចប់សបគ្រប់ក្នុងរយៈពេលដ៏ខ្លីខាងមុខនេះ ដើម្បីព្រះតេជគុណព្រះសង្ឃ អាចនិមុន្តគង់នៅបានសមរម្យ សម្រាប់បន្តការសិក្សារៀនសូត្របានខ្ពង់ខ្ពង់នាពេលអនាគត សម្រាប់ប្រជាជនយើងរស់នៅក្នុងឃុំអូរស្វាយ និងស្រុកកំពង់សៀមយើងទាំងអស់គ្នា អាចពឹងពាក់អាស្រ័យ។ ទន្ទឹមនឹងនេះ ឯកឧត្តមក៏បានវាយតម្លៃខ្ពស់ចំពោះក្រុមការងារ ជាពិសេសកិច្ចសហការយ៉ាងល្អប្រពៃជាមួយព្រះសង្ឃគ្រប់ឋានានុក្រមនៅស្រុកកំពង់សៀម ដែលបាននិមន្តចូលរួមយ៉ាងសកម្មជាមួយក្រុមការងារគណបក្សប្រជាជនលើសកម្មភាពការងារមនុស្សធម៌ជូនដល់ប្រជាជនដែលមានជីវភាពខ្វះខាត និងគ្មានទីពឹងនាពេលកន្លងមក។
ឯកឧត្តមបន្ថែមថា ថ្ងៃនេះគឺជាថ្ងៃប្រវត្តិសាស្ត្រ និងជាថ្ងៃមួយដែលប្រជាជនខ្មែរយើងទាំងអស់គ្នាបានចងចាំ និងចូលរួមអបអរសាទរខួបទី៣១ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា (១៩៩១-២០២២) ដែលមានសម្តេចតេជោ ជាម្ចាស់ហត្ថលេខីមួយដែរ ដើម្បីឈានទៅបញ្ចប់សង្រ្គាមស៊ីវិលនៅកម្ពុជា។ តែអកុសល កម្ពុជានៅមិនទាន់អាចបញ្ចប់សង្គ្រាមស៊ីវិលបាននៅឡើយទេ ដោយសារពួកខ្មែរក្រហមបានបន្តធ្វើសង្រ្គាមប្រឆាំងនឹងរាជរដ្ឋាភិបាល ។ ប្រកដណាស់ថា ដើម្បីបញ្ចប់សង្រ្គាមស៊ីវិលទាំងស្រុង នៅទូទាំងប្រទេសកម្ពុជា ហើយទទួលបាននូវសន្តិភាពពេញលេញ និងសម្បូរសប្បាយរហូតមកដល់សព្វថ្ងៃនេះ ក៏ដោយសារការឈ្លាសវៃបំផុតរបស់សម្តេចតេជោ តាមរយៈការដាក់ចេញនូវនយោបាយ ឈ្នះ-ឈ្នះ នៅឆ្នាំ១៩៩៨ យ៉ាងមានប្រសិទ្ធភាពបំផុត។ ហេតុនេះ យើងត្រូវរួមគ្នាបន្តការពារ ថែរក្សាសុខសន្តិភាព ឲ្យទទួលបានការអភិវឌ្ឍថ្មីៗបន្ថែមទៀត ដែលយើងទាំងអស់គ្នាចាំបាច់ត្រូវរួមគ្នាបន្តគាំទ្រសម្តេចតេជោ ជានាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជាជារៀងរហូត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
