ភ្នំពេញ ៖ ទោះបីស្ថានភាពជំនន់ទឹកភ្លៀងមកដល់ពេលនេះបានថមថយស្រកចុះទៅវិញ នៅតំបន់មួយចំនួនហើយក៏ដោយ ប៉ុន្តែ គិតមកដល់វេលាម៉ោង៦:២១នាទីរសៀលថ្ងៃទី១៩តុលានេះ សប្បុរសជននានានៅតែបន្តចូលរួមជាមួយរាជរដ្ឋាភិបាលដោយបរិច្ចាកនូវថវិកាផ្ទាល់ខ្លួនដើម្បីជួយដល់ប្រជាពលរដ្ឋរងគ្រោះដោយជំនន់ទឹកភ្លៀងសរុបថវិកាបានចំនួនជាង៧លានដុល្លារអាមេរិកហើយ។

តាមរយៈហ្វេសប៊ុករបស់សម្តេច នៅវេលាម៉ោង៦:២១នាទីល្ងាចថ្ងៃទី១៩តុលា សម្តេចនៅតែបង្ហាញការអរគុណចំពោះសប្បុរសជនដែលបាន ចូលរួមជាបន្តបន្ទាប់ជួយប្រជាជន ក្នុងគ្រោះជំនន់ទឹកភ្លៀងដែលកំពុង កើតមាននៅក្នុងប្រទេស។

សម្តេច បានបញ្ជាក់ថា គិតត្រឹមម៉ោង ៦:២១ នាទីថ្ងៃរសៀល ថ្ងៃទី១៩ តុលា ២០២០នេះថវិកាទទួលបាន 7,035,549 ដុល្លារ , 407,025,000 រៀល និង ៥.០០០€ (ប្រាំពាន់អឺរ៉ូ)។

ជាមួយនឹងការបង្ហាញនាមសប្បុរសជនជាច្រើនដែលមានរហូតដល់លេខរៀង១៥៦ហើយនោះសម្តេចបានបញ្ជាក់ថា ថវិកាដែលសប្បុរសជនចូលរួមនេះនឹងចាត់ចែងជួយសង្រ្គោះបន្ទាន់តាមរយៈគណៈកម្មាធិការជាតិគ្រប់គ្រងគ្រោះមហន្តរាយ។

ក្នុងករណីមានសប្បុរសជនចង់ចូលរួមបន្ថែមទៀតសូមទាក់ទងលោកសេង ទៀង រដ្ឋលេខាធិការទីស្តីការគណៈរដ្ឋមន្ត្រី។

ជាមួយនឹងមោទនភាពជាតិដែលតែងតែប្រកាន់ខ្ជាប់នូវវប្បធម៌ចែករម្លែកនេះសម្តេចនៅតែបញ្ជាក់នូវសុភាសិតមួយឃ្លាថា “ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក”៕