ក្រចេះ៖ ពិធីប្រណាំងទូក «ង» ប្រពៃណី ខ្នាតអន្តរជាតិរយៈពេល៣ថ្ងៃ នៅខេត្តក្រចេះបាន​បញ្ចប់​ដោយ​ជោគជ័យ ​នៅល្ងាចថ្ងៃទី២៣ ខែតុលា ឆ្នាំ២០២២នេះ ឯកត្តម វ៉ា ថន អភិបាលខេត្តក្រចេះ និងលោកជំទាវ ក៏បានអញ្ជើញ​ជាអធិបតីភាព​ផ្ដល់​នូវ​រង្វាន់ជ័យ​លាភី​ដល់​កីឡាករ​ចំណុះ​ទូក​ផង​ដែរ ។

ពិធីប្រណាំងទូក «ង» ប្រពៃណី ខ្នាតអន្តរជាតិនេះ មានរយៈពេល៣ថ្ងៃ គឺពីថ្ងៃទី២១ ដល់ថ្ងៃ​ទី​២៣ ខែតុលា ឆ្នាំ២០២២ និងបានបញ្ចប់ដោយជោគជ័យ ព្រម​ទាំង​បង្ក​លក្ខណៈ​ឱ្យ​មាន​ភាព​សប្បាយ​រីករាយយ៉ាងខ្លាំងដល់ប្រជាពលរដ្ឋមកពីគ្រប់ទិសទី ដោយមានភ្ញៀវទេសចរជាតិ និងអន្តរ​ជាតិ​ចូល​រួមទស្សនា និងដើរលេងកម្សាន្តយ៉ាងច្រើនកុះករ។

លោក គ្រុយ ទូច ជាប្រជាពលរដ្ឋបានលើកឡើងពីអារម្មណ៍សប្បាយរីករាយ ក្រោយ​ពេល​បាន​ចូល​រួម​ទស្សនាការប្រណាំងទូក «ង» ប្រពៃណី និងមានប្រជាពលរដ្ឋ ចូលរួមយ៉ាងច្រើនកុះករ ។ ដោយ​លោក​បានស្នើរសុំឱ្យអាជ្ញាធរខេត្ត ព្រមទាំងថ្នាក់ដឹកនាំគ្រ​ប់​ជាន់​ថ្នាក់​បង្កើ​តនូ​វ​កម្ម​ពិធី​អុំទូ​ក​នេះ​ឡើង​ជារៀងរាល់ឆ្នាំនៅខេត្តក្រចេះ ។

យោងតាមរបាយការណ៍របស់លោក ឡាយ បូរ៉ា ប្រធានមន្ទីរអប់រំ យុវជន និងកីឡាខេត្តក្រចេះ បានបញ្ជាក់ថា គណៈកម្មការរៀបចំប្រណាំងទូកខេត្តក្រចេះ បានរៀបចំប្រណាំងទូក«ង» ចំនួន ១៣គូ ស្មើរនិង ២៦ទូក ដែលជាលទ្ធផលទូកជាប់ចំណាត់ថ្នាក់លេខ១ មានចំនួន ៧ទូក លេខ២ មានចំនួន ៧ទូក ចំណាត់ថ្នាក់លេខ៣ មានចំនួន ៦ទូក និងចំណាត់លេខ៤ មានចំនួន ៦ទូក ។ ក្នុងនោះចំណុះកីឡាករទូក«ង» សរុបមានចំនួន ២៦ទូក មកពីតាមបណ្តាស្រុក/ក្រុងទាំង៦ ក្នុង​ខេត្តក្រចេះ រួមមាន ស្រុកព្រែកប្រសព្វ ស្រុកសំបូរ ស្រុកឆ្លូង ស្រុកចិត្របុរី ស្រុកស្នួល និ​ង​ក្រុង​ក្រចេះ ។

ក្នុង​ឱកាសនោះដែរ ឯកឧត្តម វ៉ា ថន បានបញ្ជាក់ថា ទោះបីជាការប្រណាំងទូក បានបញ្ចប់ក៏​ពិត​មែន​ តែនៅរាត្រីថ្ងៃទី២៣ តុលា ក៏នៅមានការប្រគំតន្រ្តី និងអុជកាំជ្រូចជូនពលរដ្ឋ និងភ្ញៀវ​ទស្សនា​បន្ត​ទៀត ហើយឯកឧត្តមក៏សូមចូលរួមអបអរសាទរជាមួយនិងកីឡាករទូកទាំអស់ ទោះ​ចំណាត់​ថ្នាក់​បានលេខ ១ក្ដី និងលេខ ២ ឬលេខ៣ លេខ៤ក្ដី សុទ្ធតែឈ្នះទាំងអស់គ្នា ឈ្នះក្នុង​ន័យគាំទ្រ​ប្រពៃណីរបស់យើង ។

ក្នុងពិធីប្រណាំង​ទូក​នេះរដ្ឋបាលខេត្តបានផ្ដល់ជូនប្រាក់រង្វាន់ដល់ទូកជាប់ចំណាត់ថ្នាក់លេខ១ ចំនួន ៧ទូក ក្នុង១ទូក ទទួលបានថវិការចំនួន ៣លានរៀល ទូកជាប់លេខ២ ចំនួនចំនួន ៧ទូក ក្នុង១ទូក ទទួលបានថវិការចំនួន ២លាន ៥សែនរៀល រីឯទូកជាប់ចំណាត់ថ្នាក់លេខ៣ និងលេខ៤ ចំនួន ៦ទូក ក្នុង១ទូក ទទួលបានថវិការ ២លានរៀលផងដែរ ។ ឯកឧត្តមអភិបាលខេត្តក៏បានអរព្រះគុណ និងអរគុណដល់ព្រះគ្រូចៅអធិការវត្ត គណៈកម្មការទូក និងក្រុមកីឡាករដែលបានចូលរួម និងសូមថ្លែងអំណរគុណដល់ឯកឧត្តម លោកជំទាវ ឧកញ៉ា លោក លោកស្រី និងសប្បុរសជននានាដែលបានចូលរួមឧបត្ថម្ភកម្មវិធីផងដែរ៕ ដោយ សេង ម័រ