ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី២៤ ខែតុលានេះ បានប្រកាស​បើកការ​ប្រកួត​ប្រជែងជំនាញថ្នាក់ជាតិ លើកទី៨ ឆ្នាំ២០២២ ដោយមានបេក្ខជនចំនួន ៦១នាក់ មកពី ១៣គ្រឹះស្ថាន ចូលរួមប្រកួតប្រជែងលើមុខជំនាញចំនួន៨ នៅរាជធានីភ្នំពេញ។

យោងតាមរបាយការណ៍របស់អគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ បាន​ឲ្យ​ដឹងថា ការប្រកួតប្រជែងជំនាញថ្នាក់ជាតិនេះ មានរយៈពេល៥ថ្ងៃ គិតចាប់ពីថ្ងៃទី២៤ ដល់២៨ ខែតុលា ឆ្នាំ២០២២។

កម្មវិធីនេះដែរ រៀបចំឡើងក្នុងគោលបំណងសំខាន់៤៖

១. ជំរុញការប្រកួតប្រជែងជំនាញប្រកបដោយប្រសិទ្ធភាព និងយុត្តិធម៌

២. លើកកម្ពស់ការអភិវឌ្ឍគុណភាពជំនាញបច្ចេកទេស និងវិជ្ជាជីវៈ និង​លើកតម្លៃ​ការងារ​របស់​យុវជន និងកម្មករជំនាញ

៣. ពង្រឹង និងជំរុញកិច្ចសហប្រតិបត្តិការរវាងគ្រឹះស្ថានអប់រំបណ្តុះ បណ្តាលបច្ចេកទេស និង​វិជ្ជាជីវៈសាធារណៈ ឯកជន និងអង្គការមិនមែនរាជរដ្ឋាភិបាលលើវិស័យអប់រំបណ្តុះបណ្តាល បច្ចេកទេស និងវិជ្ជាជីវៈ

៤. ផ្តល់ជាមធ្យោបាយទទួលស្គាល់គុណភាព សមត្ថភាព​ សម្រាប់​ការងារ​ល្អប្រសើរ​របស់​ពលករ​ជំនាញ​។

សូមជម្រាបថា មុខជំនាញទាំង៨ ដែលៀបចំក្នុងកម្មវិធីប្រកួតប្រជែងនេះ រួមមាន៖ ជំនាញ​ត​បណ្តាញ​អគ្គិសនី, ជំនាញរៀបឥដ្ឋ, ជំនាញផ្សារ,ជំនាញសរសេរកម្មវិធីកុំព្យូទ័រធុរកិច្ច បេក្ខជន​ចំនួន​, ជំនាញរចនាគេហទំព័រ, ជំនាញរចនាក្រាហ្វិក, ជំនាញរៀបការ៉ូ និង​ជំនាញ​ម៉ាស៊ីន​ស្វ័យ​ប្រវត្តិកម្ម។

ដោយឡែក ចំពោះបេក្ខជនដែលជាប់ចំណាត់ថ្នាក់ទទួលបានមេដាយនឹងត្រូវទទួលបាន រង្វាន់​លើក​ទឹកចិត្តពីរាជរដ្ឋាភិបាល ដែលមេដាយមាសត្រូវទទួបានរង្វាន់ចំនួន ៣លានរៀល មេដាយ​ប្រាក់​ទទួល​បានប្រាក់រង្វាន់ ២លានរៀល និងមេដាយសំរឹទ្ធិទទួលបានរង្វាន់ ១លានរៀល។ ជាមួយគ្នានេះ បេក្ខជនជ័យលាភី នឹងមានឱកាសក្នុងការចូលរួមប្រកួតប្រជែងជំនាញជាអន្តរជាតិ ថ្នាក់តំបន់ និងសាកលលោកផងដែរ៕