ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានលាតត្រដាងអំពីល្បិចកល របស់ជនក្បត់ជាតិ ដែលម្តងបំផុស បំផុលមិនឲ្យពលរដ្ឋខ្មែរ ចាក់វ៉ាក់សាំងរបស់ចិន ហើយចុងក្រោយនេះ បានញុះញង់ឲ្យពលរដ្ឋនាំគ្នាទៅចាក់វ៉ាក់សាំងវិញ ស្របពេលដែលវ៉ាក់សាំងថ្មី មិនទាន់មកដល់ទៀតនោះ ដែលការបំផុសបំផុលនេះ គឺដើម្បីបញ្ឆេះការរិះគន់របស់ពលរដ្ឋមកលើរាជរដ្ឋាភិបាល។
សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈសារសំឡេងមួយ នារំលងអាធ្រាត្រ ឈានចូលថ្ងៃទី១២ ខែមេសា នេះ បានហៅការអំពាវនាវរបស់ជនក្បត់ជាតិបែបត្រឡប់ ត្រឡិន ម្ដងកុំឱ្យពលរដ្ឋចាកវ៉ាក់សាំងចិន និងម្ដងទៀតឱ្យពលរដ្ឋទៅចាក់វ៉ាក់សាំងចិន គឺជាផែនការពិស ពុល ក្នុងការជំរុញឱ្យប្រជាពលរដ្ឋទៅដណ្ដើមវ៉ាក់សាំង ខណៈដែលមិនទាន់មានវ៉ាក់សាំងគ្រប់គ្រាន់ សម្រាប់ចាក់។ អំពើញុះញង់នេះ ដើម្បីឱ្យពលរដ្ឋរិះគន់រាជរដ្ឋាភិបាលថា គ្មានលទ្ធភាពក្នុងការទិញវ៉ាក់សាំង ចាក់ជូនពលរដ្ឋ ខណៈក្រុមជនក្បត់ជាតិទាំងនោះ បានលួចទៅចាក់វ៉ាក់សាំងចិនរួចហើយ។
យ៉ាងណាក៏ដោយ តាមរយៈសារនេះ សម្តេចតេជោ ក៏បានអំពាវនាវដល់ប្រជាពលរដ្ឋខ្មែរទាំអស់ ឲ្យរក្សាភាពនឹងនរចិត្ត ព្រោះរាជរដ្ឋាភិបាល នឹងធ្វើការចាក់វ៉ាក់សាំងជូនពលរដ្ឋឲ្យបានគ្រប់ៗគ្នា តាមលំដាប់លំដោយ ជាអាទិភាព ហើយកុំជឿទៅតាមការញុះញង់របស់ពួក ក្បត់ជាតិទាំងនោះឲ្យសោះ។ វ៉ាក់ សាំង នឹងមកដល់បន្តបន្ទាប់ទៀតឆាប់ៗនេះ។
សម្តេចតេជោ បានបញ្ជាក់ប្រាប់ប្រជាពលរដ្ឋជាថ្មីទៀតថា មនុស្សអាយុ៥៩ឆ្នាំចុះ នឹងត្រូវចាក់ វ៉ាក់ សាំងស៊ីណូហ្វាម។ អាយុពី១៨ឆ្នាំឡើងលើ ចាក់ស៊ីណូវ៉ាក់ និងអាយុ៦០ឆ្នាំឡើងលើ ចាក់អាស្ត្រាហ្សេនី កា។ នេះជាផែនការមេរបស់រាជរដ្ឋាភិបាល។
បន្ទាប់ពីវ៉ាក់សាំងចិន បានមកដល់ប្រទេសកម្ពុជានោះ ក្រុមឧទ្ទាមក្រៅច្បាប់ ដែលកំពុងស្ថិតនៅ ក្រៅប្រទេសនោះ បានញុះញង់ពលរដ្ឋ កុំឱ្យទៅចាក់វ៉ាក់សាំងរបស់ចិននោះឡើយ ដោយបានព្យាយាម បំភ័យថា វ៉ាក់សាំងនេះ នឹងបង្កបញ្ហាដល់សុខភាព ឬគ្រោះថ្នាក់ដល់ជីវិត។ ទោះបីជាមានការញុះញង់ របស់ជនក្បត់ជាតិទាំងនោះក្តី ក៏ប្រជាពលរដ្ឋខ្មែរ មិនបានស្តាប់នោះឡើយ ដោយបាននាំគ្នាទៅចាក់វ៉ាក់ សាំងជាបន្តបន្ទាប់តាមការស្ម័គ្រចិត្ត ដែលរហូតមកដល់ពេលនេះ គឺបានចំនួនមួយលាននាក់ហើយ៕
អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
