ភ្នំពេញ៖ ការចុះឈ្មោះនិងពិនិត្យឈ្មោះបោះឆ្នោត គឺចាប់ផ្ដើមពីថ្ងៃទី ២០ ខែតុលា រហូតដល់ថ្ងៃទី ៨ ខែធ្នូ ឆ្នាំ២០២៣ សម្រាប់ការបោះឆ្នោតឆ្នាំ២០២៣ខាងមុខ។

ប្រជាពលរដ្ឋទើបគ្រប់អាយុបោះឆ្នោត ​ក៏ដូចជាប្រជាពលរដ្ឋផ្លាស់ទីលំនៅជាច្រើន ក៏បាន​បន្តទៅចុះឈ្មោះបោះឆ្នោតនៅតាមទីស្នាកការ​ គជប ​នៅតាមសង្កាត់ដែលខ្លួនរស់នៅ។

ដំណើរការ ការចុះឈ្មោះបោះឆ្នោត ​និងពិនិត្យបញ្ជីរឈ្មោះបោះឆ្នោតសម្រាប់ ការបោះឆ្នោត​ជ្រើសរើស​តំណាងរាស្រ្ត ក្នុងឆ្នាំ ២០២៣ខាងមុខ ​គឺបាននឹងកំពុងចាប់ផ្ដើមទូទាំងប្រទេសចាប់ពីថ្ងៃទី ២០ ខែតុលា ​និងបន្តរហូតដល់ថ្ងៃទី ​៨ខែធ្នូឆ្នាំ ២០២២។

កំឡុងពេលនៃចាប់ផ្ដើមដំណើរការសប្ដាហ៍ដំបូងនេះ ​ប្រជាពលរដ្ឋទាំងយុវជនទើបគ្រប់អាយុ ក៏​ដូចជា​ប្រជាពលរដ្ឋផ្លាស់ទីលំនៅ ​បានបន្តទៅចុះឈ្មោះបោះឆ្នោត​ នៅតាមការិយាល័យ គជប នៅតាមសង្កាត់ដែលខ្លួនកំពុងស្នាក់នៅ។

ជាក់ស្ដែងនៅព្រឹកនេះ ប្រជាពលរដ្ឋដែលបានមកចុះឈ្មោះបោះឆ្នោត ​នៅទីតាំងការិយាល័យគជប នៅក្នុងសង្កាត់និរោធ ​ខណ្ឌច្បារអំពៅ ​គឺមានចម្រុះវ័យ ​និងមានទាំងអ្នកមិនធ្លាប់បោះឆ្នោត និងអ្នក​ដែល​ផ្លាស់ទីលំនៅថ្មី សុំចុះឈ្មោះបោះឆ្នោតនៅសង្កាត់ និរោធ ​។ ពួកគាត់លើកឡើងថា ការចុះឈ្មោះបោះឆ្នោត គឺដើម្បីមានសិទ្ធិក្នុងការបោះឆ្នោត ។

ការបោះឆ្នោត ជាភាពចាំបាច់ ​ដែលប្រជាពលរដ្ឋគ្រប់អាយុទាំងអស់ អាចមានសិទ្ធិជ្រើសរើស​តំណាង​រាស្រ្ត ជ្រើសរើសថ្នាក់ដឹកនាំដែលខ្លួនពេញចិត្ត ​ក្នុងរយៈពេលមួយអណត្តិ ៥ឆ្នាំ។

កំឡុងពេលផ្ដល់សេវា ក្នុងដំណើរការចុះឈ្មោះបោះឆ្នោតនេះ លោកស្រី ម៉ក់ ច័ន្ទតុលា ជាប្រធាន គជប សង្កាត់និរោធ​ លើកឡើងប៉ុន្មានថ្ងៃមកនេះ គឺមានប្រជាពលរដ្ឋមកចុះឈ្មោះបោះឆ្នោតជា​បន្ត​បន្ទាប់។ លោក ស្រីបន្តថា ការចុះឈ្មោះបោះឆ្នោត គឺទាមទារនូវ ​អត្តសញ្ញាណប័ណ្ណ​សញ្ជាតិខ្មែរ និងលិខិតបញ្ជាក់ទីលំនៅចំពោះ ​ប្រជាពលរដ្ឋដែលផ្លាស់ទីលំនៅ។

ពាក់ព័ន្ធនឹងចុះឈ្មោះបោះឆ្នោតនេះ ​កាលពីថ្ងៃចាប់ផ្ដើមដំបូង ឯកឧត្តម ប្រាជ ចន្ទ ​ជាប្រធានគជប លើក​ឡើងដែរថា ​ការចុះបោះឆ្នោតគឺសម្រាប់ប្រជាពលរដ្ឋគ្រប់គ្នា ​គឺមិនប្រកាន់អ្នកគាំទ្រគណបក្ស​ខាង​ណានោះទេ​ គ្រប់គ្នាគឺមានសិទ្ធិដូចគ្នា។ ​ឯកឧត្តម បានលើកឡើងដែរថា ការចុះឈ្មោះ​បោះឆ្នោត​ថ្មីនេះ តាមការប៉ាន់ស្មាន​គឺអាចមានចំនួនប្រមាណ ៤០ម៉ឺននាក់៕ អត្ថបទ៖ គឹមហុក