ភ្នំពេញ៖ ក្នុងជំនួបសម្តែងការគួរសម និងពិភាក្សាការងារនាទីសី្តការក្រសួង ព្រឹកថ្ងៃទី២៤ ខែតុលា ឆ្នាំ២០២២ លោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ ស្នើរកជំនួយពីលោកសាស្រ្តាចារ្យ Nicolas Fiévé (នីកូឡាស់ ផែវេ) នាយកសាលាបារាំង​ចុងបូព៌ាប្រទេស ទើបទទួលភារកិច្ចថ្មីលើកិច្ចការស្រាវជ្រាវបេតិកភណ្ឌរូបី និងអរូបី និងការរៀបចំពង្រីកសារមនី្ទរ ។

លោកជំទាវ បណ្ឌិតសភាចារ្យ រដ្ឋមន្រី្ត បានលើកឡើងទៀតថា វាជាការងារបន្ថែមដែលក្រសួង​វប្បធម៌ និងវិចិត្រសិល្បៈ កំពុងធ្វើការអំពាវនាវរកជំនួយផ្នែកបច្ចេកទេសពីសាលាបារាំងចុងបូព៌ា ប្រទេស ក្នុងការបណ្តុះបណ្តាល ស្រាវជ្រាវ ជួសជុល និងថែទាំប្រាសាទក្នុងតំបន់អង្គរ និង​កិច្ចការផ្នែកវប្បធម៌ផ្សេងៗទៀត ក្រៅពីការងារបេតិកភណ្ឌរូបី និងការងារស្រាវជ្រាវផ្នែក​បេតិកភណ្ឌអរូបី ដូចជា៖ នរវិទ្យា ជំនឿទំនៀបទម្លាប់ របាំ ជាពិសេសការងាររៀបចំពង្រីកសារមនី្ទរ។ ថាតើសាលាបារាំងចុងបូព៌ា ប្រទេស អាចផ្តល់ជាអ្នកជំនាញបច្ចេកទេស ក្នុងការរៀបចំសារមនី្ទរ​ឲ្យ​ក្លាយជាលក្ខណៈស្តង់ដារមួយ? ។

ជាការឆ្លើយតបលោកសាស្រ្តាចារ្យ Nicolas Fiévé (នីកូឡាស់ ផែវេ) បានបង្ហាញពីផែនការ ការងារ​ទៅថ្ងៃ​អនាគត រួមទាំងផែនការ ការងារជួសជុលប្រាសាទ ​និងការស្រាវជ្រាវទាក់ទង នឹងប្រវតិ្ត​សាស្រ្តបុរាណវិទ្យា​ និងតំបន់ផ្សេងៗ ក៏ដូចជាតំបន់អង្គរ រួមទាំង​ការងារដែលសាលាបារាំង​ចុង​បូព៌ាប្រទេស បានធ្វើការជាមួយក្រសួងវប្បធម៌នា​ពេលកន្លងមក និងកំពុងធ្វើទាក់ទង​នឹង​សារមនី្ទរជាតិ។

ទន្ទឹមនឹងនោះលោកសាស្រ្តាចារ្យ ក៏មានបំណងបន្តធ្វើកិច្ចសហប្រតិបតិ្តការនាពេលអនាគត លើការ​បណ្តុះ​បណ្តាល​ធនធាន​មនុស្ស ជាមួយសាកលវិទ្យាល័យភូមិន្ទវិចិត្រសិល្បៈ ​ក្នុងក្របខណ្ឌរួម ដែលធ្លាប់បានធ្វើការបណ្តុះបណ្តាលរួចមកហើយ ​អំពីកម្រិតអនុបណ្ឌិត នៅមហាវិទ្យាល័យ​បុរាណវិទ្យា។ នេះជាផែនការ ដែលទើបមកទទួលអណតិ្តថ្មីរបស់លោកសាស្រ្ត និងជាដំណើរលើក​ដំបូង​មកកាន់កម្ពុជា ដើម្បីស្វែងរកកិច្ចសហប្រតិបតិ្តការរវាងក្រសួងវប្បធម៌ ​និងវិចិត្រសិល្បៈ និងសាលាបារាំងចុងបូព៌ា៕អត្ថបទ រដ្ឋា