បាត់ដំបង៖ អគ្គព្រះរាជអាជ្ញាសាលាសាលាឧទ្ធរណ៍ខេត្តបាត់ដំបង លោក នួន សាន ចូលរួមថវិកាចំនួន ១០លានរៀល ជូនសម្ដេចតេជោ ហ៊ុន សែន នាយករដ្ឋមន្ដ្រី សម្រាលក្នុងការដោះស្រាយបញ្ហាគ្រោះទឹកជំនន់។

លោកអគ្គព្រះរាជអាជ្ញាសាលាឧទ្ធរណ៍ បានឱ្យដឹងថា សម្តេចតេជោ នាយករដ្ឋមន្រ្តីនៃកម្ពុជា បាន​ខិតខំយកចិត្តទុកដាក់គិតគូរខ្ពស់ពីបញ្ហាប្រឈមនានារបស់ពលរដ្ឋនៅតាមបណ្តាលខេត្ត ដែល​ទទួល​រងបញ្ហាទឹកជំនន់ធ្វើប្រជាពលរដ្ឋនៅតាមតំបន់​ដែល​រងការជន់លិចមួយ​ចំនួនត្រូវបាន​អាជ្ញាធរ​ធ្វើការ​ជម្លៀស​មក​ទីទួលមាន​សុវត្ថិភាព​ និងបាន​ផ្គត់ផ្គង់នូវបញ្ហាខ្វះខាតនានា​ជូន​ពលរដ្ឋ​ក្នុងគ្រា​លំបាកនេះផងដែរ។

សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅព្រឹកថ្ងៃទី២២ ខែតុលា ឆ្នាំ២០២២នេះ បានថ្លែង​អំណរព្រះគុណ សម្ដេចសង្ឃ ​នៃគណៈសង្ឃមហានិកាយ និងអរគុណដល់​សប្បុរសជន​នានា ដែលចូលរួមឧបត្ថម្ភស្បៀង ព្រមទាំងថវិកាដល់រាជរដ្ឋាភិបាលកម្ពុជា សម្រាប់ដោះស្រាយ​ការលំបាក​របស់ប្រជាពលរដ្ឋដែលរងគ្រោះដោយសារទឹកជំនន់។

សម្ដេចតេជោ ហ៊ុន សែន ធ្លាប់បានបញ្ជាក់ថា ក្នុងចំណោមប្រជាពលរដ្ឋប្រមាណ ១០ម៉ឺនគ្រួសារ មានអ្នកដែលទទួលផលប៉ះពាល់ពីគ្រោះទឹកជំនន់ ​ប្រមាណ១៨ភាគរយ ស្មើនឹង ប្រមាណជិត ២ម៉ឺនគ្រួសារ ដែលនឹងត្រូវទទួលបានការអន្ដរាគមន៍។

ជាមួយគ្នានេះ សម្ដេចតេជោ ហ៊ុន សែន ក៏អំពាវនាវឲ្យបន្ដការយកចិត្ដទុកដាក់ តាមរយៈយុទ្ធការ​ក្រុមការងារ​របស់រាជរដ្ឋាភិបាល ​ចុះជួយមូលដ្ឋាន, ក្រុមការងារគណបក្សប្រជាជនកម្ពុជា ចុះជួយ​មូលដ្ឋាន, កាកបាទក្រហមកម្ពុជា ​និងសប្បុរសជន ជួយដល់បញ្ហាស្បៀង នៅទីកន្លែងដែល​មានការខូចខាតធ្ងន់ និងអ្នកទីទ័លផងដែរ។

សម្តេចតេជោ ហ៊ុន សែន បានណែនាំឲ្យសិក្សាស្ថិតិប្រជាពលរដ្ឋរងគ្រោះដោយទឹកជំនន់ ហើយ​ផ្តល់ការ​ឧបត្ថម្ភរយៈពេល៣ខែ ​ដែលអាចចំណាយជាង២លានដុល្លារ៕