ភ្នំពេញ ៖ កម្មសិក្សាការីវគ្គវិក្រឹតការមន្រ្តីជាន់ខ្ពស់ឆ្នាំ២០២២ថ្នាក់នគរភ្នំបានប្រគល់ថវិកាជូនសាលាភូមិន្ទរដ្ឋបាលចំនួន១៥០០០​ដុល្លាដើម្បីចូលរួមសាងសង់សាលាបឋមសិក្សា​ត្រពាំងទ្រាំងស្ថិតក្នុងភូមិត្រពាំងទ្រាំង ឃុំចង្រ្កង់ ស្រុក ចិត្ត្របុរីខេត្តក្រចេះ ព្រឹកថ្ងៃទី២៤តុលា២០២២ ក្រោមអធិបតីភាព ឯកឧត្ដម យក់ ប៊ុនណា​រដ្ឋលេខាធិការប្រចាំការនិងជានាយកសាលាភូមិន្ទរដ្ឋបាល ។ ក្នុងនាមថ្នាក់ដឹកនាំក្រសួងមុខងារសាធារណៈនិងមន្រ្តីរាជការទាំងអស់ ឯកឧត្ដម យក់ ប៊ុនណា​បាន​ថ្លែង​អំណរ​គុណ​យ៉ាង​ជ្រាល​ជ្រៅ​ចំពោះ​ទឹក​ព្រៈ​ទ័យ​និង​ទឹក​ចិត្តសទ្ធាជ្រៈថ្លារបស់កម្មសិក្សាការីវគ្គវិក្រឹត​ការមន្រ្តី​ជាន់ខ្ពស់ឆ្នាំ២០២២ថ្នាក់នគរភ្នំក្នុងការរួមចំណែកកសាងអគារសិក្សាសម្រាប់ប្អូនៗក្មួយៗ​ជាពិសេស​យុវជនជំនាន់ក្រោយ​ដែលជាសរសទ្រូង​នៃប្រទេសជាតិ​នៅតាមតំបន់​ដាច់ស្រយាលបានរៀនសូត្រ គ្រប់ៗគ្នា។ នេះជាលើកទី១ដែលកម្មសិក្សាការីវគ្គវិក្រឹតការមន្រ្តីជាន់ខ្ពស់ឆ្នាំ២០២២ថ្នាក់នគរភ្នំនៃសាលាភូមិន្ទរដ្ឋបាលបានចូលរួមការងារសង្គមក្នុងការចូលរួមសាងសង់អគារសិក្សាជាការចូលរួមចំណែកកសាងសមិទ្ធផល​ជាមួយប្រមុខរាជរដ្ឋាភិបាលកម្ពុជា។ ​

សូមបញ្ជាក់ថា បច្ចុប្បន្ននេះនៅក្នុងសាលាបឋមសិក្សាត្រពាំងមានតែអគារ១សង់ពីឈើប្រក់សង្កសី ដំបូលជញ្ជាំងធ្លុះធ្លាយ មាន៣បន្ទប់ តែប៉ុណ្ណោះ មានសិស្សកំពុងសិក្សាចំនួនជាង២០០នាក់​ត្រូវបែងចែក​រៀន២​វេន​ព្រឹក​​និង​ល្ងា​ច​មាន​​គ្រូចំនួន​៧នាក់។​ ​ឯកឧត្ដម យក់ ប៊ុនណា បានឱ្យដឹងថា សាលាភូមិន្ទរដ្ឋបាលបានបង្កើតឱ្យមានកម្មវិធីការងារសង្គមជូនកម្មសិក្សាការីវគ្គវិក្រឹតការមន្រ្តីជាន់ខ្ពស់ឆ្នាំ២០២២​ឱ្យកម្មសិក្សាការី​ចេះ​ចូល​រួម​កសាង​សមិទ្ធផល​សង្គមនានា ឱ្យយល់ដឹងពីជីវភាពរស់នៅ ស្គាល់សុខទុក្ខនិងការលំបាករបស់ប្រជាពលរដ្ឋ និងសិស្សនៅតាមសហគមន៍តំបន់ដាច់ស្រយាល​ដើម្បីចូលរួមជួយលើកស្ទួយជីវភាពរបស់លោកគ្រូអ្នកគ្រូនិងបង្កើតបំណិនជីវិតជួយផ្លាស់ប្តូរផ្នត់គំនិតប្រជាពលរដ្ឋនៅតំបន់នោះឱ្យចេះប្រកបរបរកសិកម្មដាំបន្លែ ដាំឬស្សីផ្អែមប្រែក្លាយជាតំបន់បៃតងដើម្បីជួយទ្រទ្រង់ជីវភាពគ្រួសារបន្ថែមទៀត។

សូមរំលឹកថា​កន្លងមកមានមូលនិធិជប៉ុនបានសន្យាថានឹង​ជួយ​កសាង​អគារ១ខ្នង​មាន៥បន្ទប់​រួម​បដិភាគ​ជាមួយ​សាលាភូមិន្ទរដ្ឋបាល​នៅ​ក្នុងសាលាបឋមសិក្សា​ត្រពាំង​ទ្រាំងនេះ​ក៍ ប៉ុន្តែ​ក្នុង​កាលៈទេសៈ​វិបត្តិជំងឺកូវីដ១៩​ជា​សាកល​បាន​ធ្វើឱ្យខាង​មូលនិធិ​ជប៉ុន​ជួប​វិបត្តិសេដ្ឋកិច្ច​អាច​មាន​លទ្ធភាព​ជួយ​សាង​សង់​បានអគារសិក្សាបាន១ខ្នង៣បន្ទប់នៅសល់២បន្ទប់ទៀតសាលាភូមិន្ទរដ្ឋបាល​ជាអ្នក​ទទួល​បន្ទុកជួយ​កសាង​បង្ហើយ​ឱ្យ​បាន​អគារសិក្សា១ខ្នង​មាន៥បន្ទប់ស្របតាមស្ដង់ដាដើម្បីតម្រូវការសិក្សារបស់សិស្សនៅតំបន់ដាច់ស្រយាល។ សូមបញ្ជាក់ថាផ្ទៃ​ដីទំហំជាង២ហិកតាដែលគ្រោងនឹងសាងសង់អគារសិក្សាជាកម្មសិទ្ធិរបស់សាលាភូមិន្ទរដ្ឋបាលដែលបានទិញប្រគល់ជូនសាលាបឋមសិក្សាទ្រាំង។ លោក អ៊ុន សាវន តំណាង កម្មសិក្សាការីវគ្គវិក្រឹតការមន្រ្តីជាន់ខ្ពស់ឆ្នាំ២០២២ថ្នាក់នគរភ្នំ បានចាប់អារម្មណ៍ ថា រាល់សកម្មភាព​និងទង្វើមនុស្សធម៌​កន្លងមកតាមរយៈ​ការងារសង្គមរបស់សាលាភូមិន្ទរដ្ឋបាល​បានបណ្ដុះគំនិតស្មារតីសាមគ្គីភាពឯកភាពជាតិស្រលាញ់ជាតិមាតុភូមិ ស្រលាញ់ប្រជាជន និងការស្រលាញ់ការសិក្សា ។ សាលាភូមិន្ទរដ្ឋបាលមិនត្រឹមតែបានបណ្ដុះបណ្ដាលនូវចំណេះដឹងមូលធនបញ្ញា នវានុវត្តន៍ដល់មន្រ្តីរាជការប៉ុណ្ណោះទេថ្នាក់ដឹកនាំសាលាបានគិតគូរជួយដល់ ការលំបាករបស់ប្អូនៗជាសិស្សនៅតំបន់ជនបទដាច់ស្រយាលថែមទៀត ដែលជាការចូលរួមអភិវឌ្ឍន៍បណ្ដុះបណ្ដាលធនធានមនុស្សជាមួយរាជរដ្ឋាភិបាល ៕