ភ្នំពេញ ៖ ពូជស្រូវ អង្ករ និងមី របស់សម្ដេចតេជោហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបានរដ្ឋបាលរាជធានីភ្នំពេញនាំយកទៅប្រគល់ជូនប្រជាពលរដ្ឋចំនួន៤២គ្រួសារ នៅសង្កាត់បឹងធំ។

ពូជស្រូវជាង៤តោន រួមមានទាំងអង្ករ និងមីមួយចំនួន ដែលជាអំណោយរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នារសៀលថ្ងៃទី២៤ ខែតុលា ឆ្នាំ២០២២ ត្រូវបាន ឯកឧត្តម ឃួង ស្រេង អភិបាលរាជធានីភ្នំពេញ នាំយកទៅប្រគល់ជូនប្រជាពលរដ្ឋចំនួន ៤២គ្រួសារ នៅក្នុងបរិវេណសាលាសង្កាត់បឹងធំ ខណ្ឌកំបូល ដើម្បីបានបង្កបង្កើនផលឡើងវិញ ក្រោយពីស្រូវ ស្រែរបស់ប្រជាពលរដ្ឋបានទទួលរងផលប៉ះពាល់ដោយទឹកជំនន់នារដូវវស្សា។

លោក ឃឹម ស៊ុនសូដា អភិបាលខណ្ឌកំបូលបានឲ្យដឹងថា នៅខណ្ឌកំបូលមានផ្ទៃដីសម្រាប់ធ្វើកសិកម្មចំនួន ២០៥២ហិកតា ហើយក្នុងចំនួននេះផ្ទៃដីសម្រាប់ធ្វើស្រែមានចំនួន ៥៤០ហិកតា ។ ក្នុងចំណោមផ្ទៃដីធ្វើស្រែចំនួន ៥៤០ហិកតានេះត្រូវបានបំផ្លាញដោយជំនន់ទឹកភ្លៀងចំនួន ៣៤ហិកតាស្មើនិង៤២គ្រួសារ ក្នុងភូមិចំនួន២ គឺភូមិខ្ចៅ និងភូមិដូនកុក សង្កាត់បឹងធំ។

ឯកឧត្តម ឃួង ស្រេង បានមានប្រសាសន៍ថា យើងពិតជាមានភ័ព្វសំណាងណាស់ ដែលមានសម្ដេចអគ្គមហាសេនាបតីតេជោ ហ៊ុន សែន ជាអ្នកដឹកនាំប្រទេស ដោយសម្តេច ជាថ្នាក់ដឹកនាំដែលតែងតែគិតគូរពីសុខទុក្ខប្រជាពលរដ្ឋជានិច្ច ពោលគឺទីណាមានការលំបាកទីនោះគឺមានមុខសម្តេចតេជោចុះជួយជានិច្ច។ ជាក់ស្តែងសម្រាប់ពេលនេះ សម្ដេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចែកពូជស្រូវ អង្ករ និងមី ជូនប្រជាពលរដ្ឋនៅសង្កាត់បឹងធំនេះតាមរយៈរដ្ឋបាលរាជធានីភ្នំពេញ។

អំណោយដែលប្រគល់ជូនប្រជាពលរដ្ឋរងគ្រោះទាំង៤២គ្រួសារនេះ ដោយក្នុងមួយគ្រួសារទទួលបានស្រូវពូជចំនួន១០០គីឡូក្រាម អង្ករ១បាវ និងមី។ ឯកឧត្តម ឃួង ស្រេង សង្ឃឹមថា ស្រូវពូជដែលបានប្រគល់ជូននេះ ប្រជាពលរដ្ឋនឹងយកទៅបង្កបង្កើនផលបានទិន្នផលខ្ពស់ ដើម្បីឲ្យជីវភាពគ្រួសារកាន់តែប្រសើរឡើងវិញ៕ អត្ថបទ ៖ ប្រាក់ វ៉ាន់ដា