​ជឺ​ជិត​ស៊ូ៖ លោក​បណ្ឌិត សេង ប៊ុន​សុង ប្រធាន​សហព័ន្ធ​កីឡា​ជឺ​ជិត​ស៊ូ​កម្ពុជាបាន​ណែនាំ​ឲ្យ​មន្ដ្រី​បច្ចេកទេស ក៏ដូចជា​មន្ដ្រីក្រោមឱវាទត្រូវមាន​ភាពជា​គំរូ រាល់​គ្រប់​សកម្មភាព និង​ទង្វើ​របស់ខ្លួន ដើម្បី​បង្ហាញ​ភាពជា​អ្នកដឹកនាំ​ល្អ ហើយ​ជំរុញ​វិស័យ​កីឡា​មួយ​នេះ​ឲ្យ​កាន់តែ​រីកចម្រើន។​

​ការគូសបញ្ជាក់​ដូច្នេះធ្វើឡើង​ក្នុង​ពិធី​បិទ​វគ្គ​បណ្ដុះបណ្ដាល​អាជ្ញាកណ្ដាល គ្រូបង្វឹក និង​មន្ដ្រី​បច្ចេកទេស​កីឡា​ជឺ​ជិត​ស៊ូ​កម្រិត​មូលដ្ឋានឆ្នាំ​២០២២ កាលពី​ល្ងាច​ថ្ងៃទី​២៤ ខែតុលា ឆ្នាំ​២០២២ នៅ​ទីស្នាក់ការ​គណៈកម្មាធិកា​រ​ជាតិ​អូឡាំពិក​កម្ពុជា ខណៈ​ថ្នាក់ដឹកនាំបានចាត់ទុក​វគ្គ​នេះគឺជា​ផ្នែក​មួយ​ដ៏​សំខាន់ ក្នុងការ​អភិវឌ្ឍ​ធនធានមនុស្ស​ត្រៀម​ឆ្ពោះទៅ​រៀបចំ​ស៊ី​ហ្គេមឆ្នាំ​២០២៣។​ ​ឆ្លៀតឱកាស​នេះ ប្រធាន​សហព័ន្ធ​ដដែលបាន​លើកទឹកចិត្ត​សិក្ខាកាម​ទាំងអស់ ត្រូវ​បន្ត​ការខិតខំ​អភិវឌ្ឍ​សមត្ថភាព​បន្ថែមដើម្បី​ត្រៀម​ចូលរួម​ដឹកនាំ និង​រៀបចំ​ការប្រកួត អំឡុងពេល​កម្ពុជា​ទទួល​ធ្វើ​ម្ចាស់ផ្ទះ​ស៊ី​ហ្គេម បន្ទាប់ពី​កម្ពុជា​រង់ចាំ​អស់​រយៈពេល ៦៤​ឆ្នាំ​។ លោក​សង្ឃឹមថា អ្នកពាក់ព័ន្ធ​ក្នុង​វិស័យ​កីឡា​នេះ​ទាំងអស់នឹង​ចាប់ដៃគ្នា​ប្រឹងប្រែង​ឲ្យ​អស់ពី​លទ្ធភាព ដើម្បី​ស្វែងរក​សមិទ្ធផល​ល្អ និង​កិត្តិយស​ជូន​ជាតិ​មាតុភូមិ។​

​បន្ថែម​ពីលើ​នេះ លោក​បាន​ជំរុញ​ឲ្យ​សិក្ខាកាម​ទាំងអស់​គោរព​ឲ្យ​បាន​នូវ​វិន័យ សកម្មភាព​របស់ខ្លួន និង​ទង្វើ​របស់ខ្លួន ក្នុងនាម​ជា​អ្នកដឹកនាំ​ត្រូវធ្វើ​ឲ្យ​បានល្អ​ប្រសើរ ដើម្បី​ជា​គំរូ​ល្អ​ដល់​អ្នក​ក្រោម​ឱវាទ ព្រោះ​ទាំង​អាជ្ញាកណ្ដាល គ្រូបង្វឹក និង​មន្ដ្រី​បច្ចេកទេស​ទាំងអស់គឺ​ត្រូវបាន​ចាត់ទុកជា​អ្នកដឹកនាំ​ហើយ ពិសេស​ក្នុងនាម​អ្នក​កាត់សេចក្ដីត្រូវមាន​ស្មារតី​ប្រកបដោយ​សុក្រឹតភាព យុត្តិធម៌ឲ្យ​ស្របតាម​ស្មារតី​កីឡា។​ ​លោក សៀន សុភ​ក្ត្រ អគ្គលេខាធិការ​សហព័ន្ធបាន​បញ្ជាក់ថា វគ្គ​បណ្ដុះបណ្ដាល​មូលដ្ឋាន​លើកដំបូង​នេះមាន​រយៈពេល ៤​ថ្ងៃពីថ្ងៃ​ទី​២១ ដល់​ថ្ងៃទី​២៤ ខែតុលា ដោយមាន​សិក្ខាកាម ៤៩​រូប​ចូលរួមដែល​បង្រៀន និង​ចែក​រំ​លែ​បទពិសោធន៍​ដោយ​គ្រូឧទ្ទេស ៥​រូបរួមមាន​គ្រូឧទ្ទេស​ខ្មែរ ២​នាក់ ថៃ​ម្នាក់ ហូ​ឡង់​ម្នាក់ និង​អាមេរិក​ម្នាក់ ដោយ​ផ្តោត​សំខាន់​លើ ៥​មុខ​សំខាន់ៗ រួមមាន​អាជ្ញាកណ្តាល​ Ne-Waza ​គ្រូបង្វឹក​ Coach Fighting System ​អាជ្ញាកណ្តាល​ Duo Show ​គ្រូបង្វឹក​ Coach Duo Show ​និង​មេរៀន​ Sport Data៕

​អត្ថបទ៖ លី ឈុន​ឡា