ឃីកបុកស៊ីង៖ លោក ហេង សុខឃន ប្រធានសហព័ន្ធកីឡាឃីកបុកស៊ីងកម្ពុជា បានបង្ហាញសុទិដ្ឋិនិយមខ្ពស់ក្នុងការត្រៀមលក្ខណៈរៀបចំស៊ីហ្គេមឆ្នាំ២០២៣ ឲ្យទទួលបានជោគជ័យ បន្ទាប់ពីបញ្ចប់វគ្គបណ្ដុះបណ្ដាលអាជ្ញាកណ្ដាល ចៅក្រម និងមន្ដ្រីបច្ចេកទេសអន្ដរជាតិលើកដំបូង ដែលបង្រៀនផ្ទាល់ដោយគ្រូឧទ្ទេសជាប្រធានសហព័ន្ធកីឡាឃីកបុកស៊ីងអាស៊ីលោក Nasser Nassiri។
ការលើកឡើងនេះ បន្ទាប់ពីសហព័ន្ធបានរៀបចំវគ្គបណ្ដុះបណ្ដាលនេះរយៈពេល ៣ថ្ងៃដែលទើបបញ្ចប់កាលពីថ្ងៃទី២៤ ខែតុលានៅសណ្ឋារគាភ្នំពេញ ក្រោមការឧបត្ថម្ភគាំទ្ររបស់គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) និងក្រសួងអប់រំ យុវជន និងកីឡា។ ពិធីបិទវគ្គនេះធ្វើឡើងក្រោមវត្តមានឯកឧត្តម តែម ម៉ឺន អគ្គលេខាធិការរងនៃគណៈកម្មាធិការជាតិអូឡាំពិកកម្ពុជា។ ក្នុងនាមអាជ្ញាធរកីឡា ឯកឧត្តម តែម ម៉ឺន បានវាយតម្លៃខ្ពស់ចំពោះការរៀបចំវគ្គបណ្ដុះបណ្ដាលនេះឡើង ស្របពេលកម្ពុជាត្រៀមធ្វើម្ចាស់ផ្ទះស៊ីហ្គេមនាឆ្នាំក្រោយ។ តាមរយៈនេះ ឯកឧត្តមបានជំរុញឲ្យសិក្ខាកាមដែលបានចូលរួមបណ្ដុះបណ្ដាល ត្រូវយកចំណេះដឹងទៅប្រើប្រាស់ឲ្យមានប្រយោជន៍ ពិសេសការត្រៀមខ្លួនរៀបចំព្រឹត្តិការណ៍ប្រវត្តិសាស្ដ្រនាឆ្នាំ២០២៣ ឲ្យទទួលបានជោគជ័យ ដូចអ្វីដែលកីឡាករ-កីឡាការិនីឃីកបុកស៊ីងធ្លាប់ដណ្ដើមបានមេដាយមាស ប្រាក់ និងសំរឹទ្ធក្នុងព្រឹត្តិការណ៍ស៊ីហ្គេមនាពេលកន្លងមកដែរ។
បន្ថែមលើនេះ លោក ហេង សុខឃន បានបង្ហាញការជឿជាក់យ៉ាងមុតមាំ បន្ទាប់ពីមានអ្នកជំនាញអន្ដរជាតិមកចែករំលែកចំណេះដឹងផ្ទាល់ដល់មន្ដ្រីបច្ចេកទេសកម្ពុជា ដោយលោកសង្ឃឹមថា ការគាំទ្រពីស្ថាប័នជាតិ និងអន្ដរជាតិនេះ ស្ដែងឲ្យឃើញពីសញ្ញាណវិជ្ជមានក្នុងដំណើរឆ្ពោះទៅរកភាពជោគជ័យ នៃការរៀបចំការប្រកួតកីឡាស៊ីហ្គេមនាឆ្នាំ២០២៣ ខាងមុខ។ គួរដឹងថា វគ្គបណ្ដុះបណ្ដាលអាជ្ញាកណ្ដាល ចៅក្រម និងមន្ដ្រីបច្ចេកទេសអន្ដរជាតិលើកដំបូងនេះ មានសិក្ខាកាមចូលរួមសរុប ៣៨រូប ហើយត្រូវបានវាយតម្លៃខ្ពស់ពីគ្រូឧទ្ទេសលោក Nasser Nassiri បន្ទាប់ពីឆ្លងកាត់ការសិក្សានាពេលកន្លងមក។ ក្រោយបញ្ចប់វគ្គនេះ សិក្ខាកាមទាំងអស់នឹងត្រូវចូលរួមរៀបចំ និងកាត់សេចក្ដីក្នុងការប្រកួតកីឡាជាតិលើកទី៣ នាចុងខែវិច្ឆិកាខាងមុខដើម្បីពង្រឹងសមត្ថភាពបន្ថែម មុនឈានទៅរៀបចំព្រឹត្តិការណ៍ជាប្រវត្តិសាស្ដ្រនាឆ្នាំក្រោយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
