ភ្នំពេញ៖ ការប្រឡងមធ្យមសិក្សាបឋមភូមិ ឬហៅថា ឌីប្លូម ត្រូវបានរៀបចំគ្រប់គ្រង តាមសាលានីមួយៗ ដោយពុំមែនជាការរៀបចំជារួម ដូចការប្រឡងសញ្ញាបត្រ បាក់ឌុបនោះទេ។ ទោះការប្រឡងថ្នាក់ទី៩ ជាការរៀបចំដោយសាលាផ្ទាល់យ៉ាងណាក្ដី ​ការប្រឡងនេះ នៅតែរក្សាគោលការណ៍ ​ចេះគឺជាប់ ​និងមានការដាក់ចេញវិន័យតឹងរឹង ដូចការប្រឡងថ្នាក់ទី ១២ផងដែរ។

ថ្ងៃទី២៤ ថ្ងៃទី ២៥ ខែតុលា ឆ្នាំ ២០២២ ជាការប្រព្រឹត្តិទៅនៃការប្រឡង សញ្ញាបត្រឌីប្លូម​សិស្ស​ថ្នាក់ទី ៩ ទូទាំងប្រទេស។ ក្រសួងអប់រំ យុវជន និងកីឡា ផ្ដល់សិទ្ធិដល់សាលានី​មួយៗក្នុងការ​រៀបចំទាំងស្រុង ទាំងដំណាក់កាលមុនសំណេរ ​ដំណាក់កាលសំណេរ និងដំណាក់កាល​ក្រោយសំណេរ។

ពាក់ព័ន្ធនឹងការប្រឡងថ្នាក់ទី៩នេះ លោក ទី ណាដា នាយកវិទ្យាល័យហ៊ុនសែនតាខ្មៅ លើកឡើងថា ​ការរៀបចំការប្រឡងនេះ ​គឺរក្សាគោលការណ៍ ​ចេះគឺជាប់ ដូចការណែនាំរបស់​ក្រសួងអប់រំ យុវជន និងកីឡា។ ​សិស្សមិនអាចយកទូរស័ព្ទ មិនអាចយកសំណៅឯកសារ​ចូល​បន្ទប់ប្រឡង មិនអាចលួចចម្លងគ្នានោះទេ។​ ក្នុងករណីបំពាន សិស្សប្រឈមនឹងការធ្លាក់​ដោយស្វ័យប្រវត្តិ។

ការអនុវត្តគោលការណ៍ តឹងរឹងចំពោះការប្រឡងនេះ គឺទទួលបានការគាំទ្រពីបេក្ខជន​ប្រឡងដោយ​ផ្ទាល់។ ពួកគេលើកឡើងថា ​ការប្រឡងដែលតឹងរឹងបែបនេះ ​គឺធ្វើឱ្យសិស្សគ្រប់រូប មានការ​ខិតខំរៀនសូត្រ ​និងមានយុត្តិធ៌មសម្រាប់សិស្សគ្រប់គ្នា។

បេក្ខជនប្រឡងសញ្ញាបត្រមធ្យមសិក្សាបឋមភូមិ ​សម័យប្រឡង ២៤ តុលា ២០២២ ​មានចំនួនសរុប ជាង១៧ម៉ឺននាក់ ​ក្នុងនោះក៏មានសិស្ស គថ្លង់ ២៩ នាក់ ​ពិការភ្នែក ១៩ នាក់ និងមានមណ្ឌល​ប្រឡងសរុប ១ ៧២៣ បន្ទប់សរុប ៧ ៨១៦៕ អត្ថបទ៖ គឹមហុក