ភ្នំពេញ៖ សមាគម ស្ថាប័នបោះឆ្នោតពិភពលោក ហៅកាត់ (A-WEB) បានកោតសរសើរកម្ពុជា ដែលបានរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់កន្លងទៅប្រកបដោយជោគជ័យ ទោះស្ថិតក្នុងស្ថានភាពរីករាលជំងឺកូវីដ១៩។

ថ្លែងប្រាប់អ្នកសារព័ត៌មាន ​បន្ទាប់ពីអញ្ជើញចូលរួមមហាសន្និបាតលលើកទី៥របស់​សមាគមស្ថាប័ន​បោះឆ្នោត​ពិភពលោក (A-WEB) និងសន្និសីទអន្តរជាតិ "កិច្ចការពារស្ថាប័នគ្រប់គ្រងការបោះឆ្នោត ក្នុង​សម័យកាលដែល​លទ្ធិប្រជាធិបតេយ្យ​សកល​លោកមានការធ្លាក់ចុះ នៅប្រទេស​អាហ្វ្រិក​ខាងត្បូង ឯកឧត្តម ឌឹម សុវណ្ណារុំ សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា សមាគម (A-WEB) បានត្រួតពិនិត្យមើលការអនុវត្តសេចក្តីសម្រេច​លើ​គោល​នយោបាយ ដែលបានលើកឡើងដោយមហាសន្និបាត ការពិចារណា និងផ្តល់អនុសាសន៍​ដល់អង្គសន្និបាតទៅលើបញ្ហាណាមួយ ដើម្បីបង្កើនប្រសិទ្ធភាពនៃតួនាទីរបស់មហាសន្និបាត រួមទាំង​ធានាដល់ការទុកដាក់ និងត្រួតពិនិត្យមូលនិធិរបស់សមាគម ក៏ដូចជាផ្តល់ការអនុម័ត​វិសោធនកម្ម​ធម្មនុញ្ញ​ភាព​របស់សមាគម។

ឯកឧត្តម ឌឹម សុវណ្ណារុំ បញ្ជាក់ថា នាឱកាសនោះ សមាគម (A-WEB) បានកត់សម្គាល់ ដោយ​កោតសរសើរ​កម្ពុជា អាចរៀបចំការបោះឆ្នោតឃុំ-សង្កាត់ ទៅបានក្នុងបរិបទរីករាលដាល​ដោយ​ជំងឺកូវីដ១៩។

ទន្ទឹមគ្នានេះ ក្នុងមហាសន្និបាតនោះ ឯកឧត្តម ឌឹម សុវណ្ណារុំ ក៏លើកឡើងថា ចំពោះការអនុវត្ត​លទ្ធិប្រជាធិបតេយ្យ សេរីពហុបក្ស របស់ប្រទេសនីមួយៗ ដោយកម្ពុជាបានរៀបចំការបោះឆ្នោត​ទៀងទាត់​ទៅ​តាម​អាណត្តិ​ដែល​បង្កើតឡើងដោយច្បាប់។

ជារៀងរាល់៥ឆ្នាំម្តង គណៈកម្មាធិការជាតិរៀបចំការបោះឆ្នោត បានដំណើរការបោះឆ្នោតជ្រើស​តាំង​តំណាងរាស្រ្ត និងការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងមានប្រជាពលរដ្ឋ​គ្រប់​អាយុបោះឆ្នោតបានចូលរួមយ៉ាងច្រើន ​សំដៅ​បង្ហាញ​ពី​សិទ្ធិសេរីភាព​របស់ប្រជាពលរដ្ឋគ្រប់រូប។

គួរបញ្ជាក់ថា កម្ពុជា ​ជាសមាជិកមួយ​ ក្នុង​ចំណោម​សមាជិកសមាគមស្ថាប័ន​បោះឆ្នោត ​ពិភពលោក A-WEB ​សរុបទាំងអស់១១៩រូប មកពី ១០៩ប្រទេសលើពិភពលោក៕ អត្ថបទ សេក ឧត្តម