ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធ នឹងជំងឺអេដស៍ ឯកឧត្តមបណ្ឌិត ឈឹម ឃិនដារ៉េត អគ្គលេខាធិការ អាជ្ញាធរជាតិប្រយុទ្ធ នឹងជំងឺអេដស៍ និងជាប្រធានក្រុមប្រឹក្សាបច្ចេកទេស បានដឹកនាំកិច្ចប្រជុំក្រុមប្រឹក្សាបច្ចេកទេសលើកទី១០ ឆ្នាំ២០២២ តាមប្រព័ន្ធ ZOOM និងដោយផ្ទាល់នៅអាជ្ញាធរជាតិប្រយុទ្ធនឹងជំងឺអេដស៍ ក្រោមប្រធានបទ “រួមគ្នាដើម្បីកម្ពុជាគ្មានអេដស៍”។

កិច្ចប្រជុំនេះប្រារព្ធឡើងនាព្រឹកថ្ងៃទី២៥ ខែតុលា ឆ្នាំ២០២២នេះ ជាមួយគ្នានោះដែរ ឯកឧត្តមបណ្ឌិត ឈឹម ឃិន ដារ៉េត បានលើកឡើងអំពីការអនុវត្តន៍ប្រព័ន្ធប្រមូលព័ត៌មានត្រឡប់ពីសហគមន៍” (Community-Led Monitoring (CLM)) គឺជាប្រព័ន្ធមួយ ដើម្បីប្រមូលព័ត៌មានត្រឡប់ពី​សហគមន៍​តាមរយៈប្រព័ន្ធអនឡាញ ​ជាពិសេសពីក្រុមប្រជាជនផ្ទុកមេរោគអេដស៍ ​ក្រុមបំប្លែងភេទ ក្រុម​បុរសរួម​ភេទជាមួយបុរស ​និងក្រុមប្រើប្រាស់/ចាក់គ្រឿងញៀន។

ការអនុវត្តន៍ប្រព័ន្ធប្រមូលព័ត៌មានត្រឡប់ពីសហគមន៍ ​បានចាប់ផ្តើមអនុវត្តតាំងពីដើមឆ្នាំ២០២១ ការ​ប្រមូល​ព័ត៌មាន​ត្រឡប់​ពី​សហគមន៍​ត្រូវបាន​សម្រួល​ជាប្រព័ន្ធផ្តល់ព័ត៌មាន​ត្រឡប់តាម​អនឡាញ និងជាប្រចាំ។

ទន្ទឹមនឹងនោះអ្នកអនុវត្តផ្ទាល់ រួមមាន៖ តំណាង ​និងសមាជិកសហគមន៍នៃវេទិកហ្វុនប៉ាម និងឌីហ្វុនប៉ាម។

សូមបញ្ជាក់ផងដែរថា ការផ្តួចផ្តើមនិងរៀបចំអនុវត្ត CLM ការអនុវត្តន៍ប្រព័ន្ធប្រមូលព័ត៌មាន​ត្រឡប់​ពីសហគមន៍ ត្រូវបានរៀបចំ តាមដំណាក់កាលដូចខាងក្រោម៖ ១.រៀបចំផែនការ៖ ក្រុមអ្នក​សម្រប​សម្រួល, ក្រុមការងារបច្ចេកទេស, កំណត់ទំហំការងារ, ​រៀបចំឧបករណ៍ និងបែងចែកអ្នក​ទទួលខុសត្រូវ។ ២. ប្រមូលព័ត៌មានពីសហគមន៍៖ ផ្តល់សំណួរតាមរយៈតំណភ្ជាប់(លីង)​ទៅដល់​ក្រុមគោលដៅ, តាមដានការបំពេញសំណួរ,​ ជំរុញអោយមានការចែកចាយលីងបន្ត និងរៀបចំ​តារាងលទ្ធផលសហគមន៍។ ៣. ជួបជាមួយអ្នកផ្តល់សេវាពាក់ព័ន្ធ៖ ពិនិត្យ និងប្រើតារាង​លទ្ធផល​សហគមន៍ ដើម្បីស្នើដល់អ្នកពាក់ព័ន្ធឱ្យមានការផ្លាស់ប្តូរឱ្យកាន់តែល្អប្រសើរ ​និង៤. អនុវត្ត ផែនការ និងពិនិត្យតាមដាន៖ តាមដាន និងពិនិត្យសេវាពាក់ព័ន្ធថាមាន ​ការកែលម្អហើយឬនៅ ពិនិត្យ​ទិន្នន័យ (តារាងលទ្ធផល) ដើម្បីវាស់វែងនិងតាមដានការអនុវត្ត។

ការអនុវត្តន៍ប្រព័ន្ធប្រមូលព័ត៌មានត្រឡប់ពីសហគមន៍“ មានឧបករណ៍ប្រមូលទិន្នន័យ ដូចខាងក្រោម៖ផ្នែកទី១ ៖ ព័ត៌មានទាក់ទងសេវាបង្ការ (Prevention), ផ្នែកទី២៖ សេវាពិនិត្យនិងព្យាបាលជំងឺកាមរោគ (STI), ផ្នែកទី៣ ៖ ផែ្នកថែទាំ ព្យាបាល និងគាំទ្រសហគមន៍ (Care and Treatment), ផ្នែកទី៤៖ កិច្ចគាំពារសង្គម (Social Protection), ផែ្នកទី៥៖ សិទ្ធិ និងអំពើហិង្សាលើយេនឌ័រ (GBV) និងផ្នែកទី៦៖ ការមាក់ងាយ និងការរើសអើង (Stigma and Discrimination)៕ អត្ថបទ រដ្ឋា