​បាល់ទាត់៖ ​អ្នកគាំទ្រ​សញ្ជាតិ​អេ​ស្ប៉ា​ញ​ម្នាក់​ដែល​ធ្វើដំណើរ​ដោយ​ថ្មើរជើង​ពី​ទីក្រុង Madrid ទៅកាន់​ទីក្រុង​ដូ​ហា​ប្រទេស​កាតា ដើម្បី​ទស្សនា​ព្រឹត្តិការណ៍​បាល់ទាត់​ពិភពលោក FIFA World Cup 2022 នោះបាន​ស្ងាត់បាត់​ដំណឹង​សូន្យឈឹង ​តាំងពី​គាត់​បាន​ចូលដល់​ទឹកដី​អ៊ីរ៉ង់​កាលពី ៣សប្តាហ៍​មុន​។

​​ក្រុមគ្រួសារ​លោក Santiago Sanchez កំពុងមាន​ក្តីបារម្ភ​ពី​សុខ​សុវត្ថិភាព​របស់គាត់​ ជុំវិញ​វិបត្តិ​នៅ​ប្រទេស​អ៊ីរ៉ង់​ដែល​កំពុងមាន​បាតុកម្ម​ពេញ​ប្រទេស​។ ​​បុរស​វ័យ ៤១ឆ្នាំ​រូបនេះ​ត្រូវបាន​គេ​ទទួលដំណឹង​ចុងក្រោយ​បំផុត​ នៅពេល​លោក​បាន​ទៅដល់​ទឹកដី​អ៊ីរ៉ាក់ បន្ទាប់ពី​ធ្វើដំណើរ​ដោយ​ថ្មើរជើង​ឆ្លងកាត់​ប្រទេស​ចំនួន ១៥ រួចហើយ​។ ​​ឪពុកម្តាយ​របស់លោក Santiago Sanchez តែងតែ​តាមដាន​កូនប្រុស​ពី​ការ​បង្ហោះ​នៅលើ​បណ្តាញ​សង្គម តែ​រយៈពេល​មួយ​សប្តាហ៍​ពេញ​មិនឃើញ​បង្ហោះ និង​បាត់​ទំនាក់ទំនង​តាំងពី​ថ្ងៃទី១៧ ខែតុលា តែ Sanchez ក៏​ធ្លាប់​ប្រាប់​ឪពុកម្តាយ​ដែរ​ថា អាច​នឹង​ពិបាក​ទាក់ទង​គ្នា​នៅពេល​ចូលដល់​ទឹកដី​អ៊ីរ៉ង់​។​

សូមបញ្ជាក់ថា ​លោក Santiago Sanchez បានធ្វើ​ដំណើរ​ពី​ទីក្រុង Madrid ក្នុង​ដំណើរ​រយៈពេល ១០ខែ​ឱ្យដល់​ទឹកដី​កាតា​ទាន់​ការប្រកួត​ទីមួយ​របស់​អេ​ស្ប៉ា​ញ ដោយ​ក្នុង​មួយថ្ងៃ​ដើរ​បាន ១០ ទៅ ១៥គីឡូម៉ែត្រ​ជា​រៀងរាល់ថ្ងៃ ហើយ​មាន​ថ្ងៃ​ខ្លះ​ដើរ​បាន​ដល់​ទៅ ៣០គីឡូម៉ែត្រ អម​ជាមួយនឹង​រទេះ​ចង​សន្តោង​នឹង​ចង្កេះ​ដឹក​វ៉ា​លីដា​ក់​ឥ​វ៉ាន់ និង​ចំនី​អាហារសម្រន់​មួយចំនួន​៕

​អត្ថបទ​៖​នាង សុភា​វុ​ធ