កំពង់ចាម៖ ពូជស្រូវ ត្រូវបានអភិបាលខេត្តកំពង់ចាម ឯកឧត្តម អ៊ុន ចាន់ដា និងឯកឧត្តម អ៊ុង សំអាត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ចែកជូនប្រជាកសិករ ចំនួន ១៣៥១គ្រួសារ នៅឃុំចំនួន៥ឃុំ ក្នុងស្រុកស្រីសន្ធរ កាលពីថ្ងៃទី២៥ ខែតុលា ម្សិលមិញ ដើម្បីស្ដារការដាំដុះឡើងវិញ ។

ឯកឧត្ដម អ៊ុន ចាន់ដា អភិបាលខេត្តកំពង់ចាម បានឱ្យដឹងថា ពូជស្រូវ ដែលបានចែកជូនប្រជា​កសិករ​នៅពេលនេះ គឺជាពូជស្រាលមិនប្រកាន់រដូវ ​(តាមរយៈប្រព័ន្ធស្បៀងបម្រុងកម្ពុជា) ហើយ​ឯកឧត្ដម បានជំរុញប្រជាកសិករឱ្យ​ខិតខំ​ប្រឹងប្រែង​យកស្រូវពូជនេះ ទៅធ្វើការសាបព្រោះ​ដកស្ទូង​ស្តារឡើងវិញ បន្ទាប់ពីជំនន់ទន្លេមេគង្គ ​និងជំនន់ទឹកភ្លៀង ​បានស្រកអស់។

ឯកឧត្ដម បានបញ្ជាក់ថា ស្រូវពូជដែលផ្តល់នៅពេលនេះ គឺដើម្បីឲ្យប្រជាពលរដ្ឋ មានលទ្ធភាព​ក្នុង​បង្កបង្កើនផលបានទាន់ពេលវេលា​ និងបង្កើនសេដ្ឋកិច្ចគ្រួសារឡើងវិញ។

ប្រជាកសិករ ​បានថ្លែងអំណរគុណដល់រាជរដ្ឋាភិបាល ដែលបានផ្ដល់ពូជស្រូវសម្រាប់ការ​ដាំដុះ​ស្ដារឡើងវិញ​ ក្រោយទឹកជំនន់ ដែលនេះជាការជួយសម្រួលដល់ការចំណាយរបស់ពួកគេ បន្ទាប់​ពីរងគ្រោះដោយសារទឹកជំនន់។

ទឹកជំនន់ទន្លេ និងទឹកភ្លៀង នៅឆ្នាំនេះ ​បានបង្កការប៉ះពាល់ដល់ដំណាំស្រូវ ​និងដំណាំផ្សេងៗទៀត រាប់ម៉ឺនហិកតា ​នៅក្នុងខេត្តជាច្រើន ។ រាជរដ្ឋាភិបាល ​បាននឹងកំពុងបញ្ចេញស្រូវពូជ ដើម្បីផ្ដល់​ជូនកសិករ ​ដើម្បីស្ដារការដាំដុះឡើងវិញ ៕អត្ថបទ៖ ថុង សីហា