ស្ទឹងត្រែង៖ ក្រសួងបរិស្ថាន និងរដ្ឋបាលខេត្តស្ទឹងត្រែង កាលពីថ្ងៃទី២៤ ខែតុលា ម្សិលមិញ បានធ្វើសិក្ខាសាលាផ្សព្វផ្សាយច្បាប់ពាក់ព័ន្ធនឹងវិស័យបរិស្ថាន និងធនធានធម្មជាតិដល់​អង្គភាព​ពាក់ព័ន្ធ ដែលជាតួអង្គសំខាន់ក្នុងការចូលរួមសហការការពារតំបន់​ការពារធនធានធម្មជាតិ។

ឯកឧត្តម ផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថាន ​បានឱ្យដឹងថា ក្រោមការ​ផ្ដួចផ្ដើម​គំនិតរបស់ឯកឧត្តម សាយ សំអាល់ ​រដ្ឋមន្ត្រីក្រសួងបរិស្ថាន បានរៀបចំឱ្យមានសិក្ខាសាលា​ផ្សព្វផ្សាយ​ច្បាប់​ពាក់ព័ន្ធនឹងវិស័យបរិស្ថាន ​និងធនធានធម្មជាតិ ​ដល់មន្ត្រីរាជការ កងកម្លាំង​ប្រដាប់អាវុធ ​មន្ត្រីឧទ្យាននុរក្ស ​មន្ត្រីអនុវត្តច្បាប់ ​និងអាជ្ញាធរដែនដីពាក់ព័ន្ធ ក្នុងគោលបំណង​អនុវត្តគោល​នយោបាយ គាំទ្រដល់ការអភិវឌ្ឍប្រកបដោយចីរភាព ​ការការពារធនធានធម្មជាតិ និង​អភិរក្សយ៉ាងម៉ឺងម៉ាត់បំផុត ដើម្បីជាឧត្តមប្រយោជន៍ជាតិ ​និងមនុស្សជំនាន់ក្រោយ។

ឯកឧត្តម បានបញ្ជាក់ថា ​វាពិតជាមានសារសំខាន់ណាស់​ ក្នុងការពង្រឹងសមត្ថភាព ចំណេះដឹង​ដល់​ភាគីពាក់ព័ន្ធ ​អំពីច្បាប់ពាក់ព័ន្ធនឹងវិស័យបរិស្ថាន​ និងធនធានធម្មជាតិ​។

មន្ត្រីអនុវត្តន៍ច្បាប់ទាំងអស់ ​ដែលពាក់ព័ន្ធទៅនឹងវិស័យបរិស្ថាន ​និងធនធានធម្មជាតិ គឺជា​តួអង្គយ៉ាងសំខាន់​ក្នុងការចូលរួមសហការការពារតំបន់ការពារធនធានធម្មជាតិ ​ស្របតាមច្បាប់ និង​លិខិតបទដ្ឋានគតិយុត្តិ៕អត្ថបទ៖ មាស ផល្លា