កែប៖ មន្ត្រីជំនាញ បានឱ្យដឹងថា រហូតមកដល់ពេលនេះ ការតភ្ជាប់បណ្តាញមេទឹកស្អាតក្នុងខេត្តកែប គ្របដណ្តប់ប្រមាណ៨៥%ហើយ ប៉ុន្តែពលរដ្ឋទើបប្រើប្រាស់ទឹកស្អាត រង្វង់៤០ ទៅ៥០ភាគរយប៉ុណ្ណោះ ដោយសារបណ្តាលមកពីកត្តាផ្សេងៗ។

ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ខេត្តកែប លោក ប៊ុន យោង បានឲ្យដឹងថា ខេត្តកែប ចាប់ផ្តើមមានទឹកស្អាតប្រើប្រាស់នៅឆ្នាំ២០២០ ចែកចាយដោយ​ក្រុមហ៊ុនឯកជន​ចំនួនពីរ ដែ​លមួយសម្រាប់ក្រុងកែប ​និងមួយទៀត ​សម្រាប់ស្រុកដំណាក់ចង្អើរ។

លោក បានបញ្ជាក់ថា ការផ្គត់ផ្គងទឹកស្អាតនៅខេត្តកែប ​គ្មានបញ្ហាចោទទេ ​ហើយតាមពិតទៅ ការតភ្ជាប់ប្រព័ន្ធទឹកស្អាត (បណ្តាញមេ) បានចន្លោះពី៨០ទៅ៩០ភាគារយហើយ ​នៅទូទាំងខេត្ត ប៉ុន្តែប្រជាពលរដ្ឋមួយចំនួន ​មិនប្រើប្រាស់ ​ដោយសារទម្លាប់ ​កត្តាជីវភាព និង​កម្រិតនៃការយល់ដឹង។

យ៉ាងណាក៏ដោយលោកបានបញ្ជាក់ថា ទៅថ្ងៃមុខ ប្រជាពលរដ្ឋពិតជាងាកមក​ប្រើប្រាស់ទឹកស្អាត​ជាក់​ជាមិនខាន ​ហើយក៏មិនបង្កឲ្យប៉ះពាល់ដល់​គោល​នយោបាយ​ទឹកស្អាត ដែលមានតម្លៃ​២០០០រៀល​ក្នុងមួយម៉ែត្រត្រីគុណ ​ខណៈគ្រួសារ ​ដែលមានគ្នាពីរនាក់ ​ក្នុងមួយខែ ប្រើទឹកអស់​ត្រឹម​តែ៧ទៅ៨ម៉ែត្រត្រីគុណប៉ុណ្ណោះ ​ពោលគឺមិនដល់២ម៉ឺនរៀលផងទេ​ ក្នុងមួយខែ៕ អត្ថបទ៖ អន សារឹម