ភ្នំពេញ៖ នាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ និងជាប្រធានសមាគមមិត្តភាពកម្ពុជា-ឡាវ បានដឹកនាំប្រតិភូកម្ពុជាទៅបំពេញទស្សនកិច្ចជាផ្លូវការនៅប្រទេសឡាវរយៈពេលមួយសប្តាហ៍ ដើម្បីពង្រឹងកិច្ចសហប្រតិបត្តិការរវាងសមាគមមិត្តភាពកម្ពុជា-ឡាវ និងសមាគមឡាវ-កម្ពុជាឲ្យកាន់តែល្អ ប្រសើបន្ថែមទៀតស្របទៅតាមគោលនយោបាយរបស់ថ្នាក់ដឹកនាំនៃប្រទេសទាំងពីរ។

 នៅក្នុងអំឡុងដំណើរទស្សនកិច្ចនេះ នាយឧត្តមសេនីយ៍ នាង ផាត បានជួបពិភាក្សាការងារជា ច្រើនជាមួយរដ្ឋមន្រ្តីការពារប្រទេសឡាវ ជួបជាមួយឯកឧត្តម Sinlavong Khutphaythoun សមាជិកការិយាល័យនយោបាយមជ្ឈិមបក្ស និងជាប្រធានគណៈកម្មាធិការមជ្ឈិមរណសិរ្សឡាវកសាងជាតិ ជួបជាមួយប្រធានសមាគមឡាវ-កម្ពុជា និងមន្រ្តីជាន់ខ្ពស់នៃប្រ ទេសឡាវជាច្រើនទៀត ដើម្បីធ្វើយ៉ាងណាលើកកម្ពស់ទំនាក់ទំនងទ្វេភាគីរវាងកងទ័ព និងប្រជាជនប្រ ទេសទាំងពីរឲ្យកាន់តែល្អប្រសើរបន្ថែមទៀត។

 ថ្លែងនៅក្នុងកិច្ចជំនួបជាមួយនាយឧត្តមសេនីយ៍ ចាន់សាម៉ន ចាន់ញ៉ាឡាត ឧបនាយករដ្ឋមន្ត្រី រដ្ឋមន្ត្រីក្រសួងការពារប្រទេស នៃសាធារណរដ្ឋប្រជាធិបតេយ្យប្រជាមានិតឡាវ នាយឧត្តមសេនីយ៍ នាង ផាត បានលើកឡើងថា ដំណើរទស្សនកិច្ចរបស់ឯកឧត្តម និងប្រតិភូមកប្រទេសឡាវនេះ គឺមានគោលបំណងធំៗមួយចំនួនដូចជា ពង្រឹង និងពង្រីកកិច្ចសហប្រតិបត្តិការផ្លាស់ប្តូរ និងចែករំលែកបទពិសោធន៍រវាងសមាគមមិត្ត ភាពនៃប្រទេសទាំងពីរគឺ(កម្ពុជា-ឡាវ)។និងចូលរួមកិច្ចប្រជុំ និងចុះហត្ថលេខាលើអនុស្សរណៈយោគយល់គ្នា ស្តីពីកិច្ចសហប្រតិបត្តិការរវាងសមាគមមិត្តភាពកម្ពុជា-ឡាវនៃព្រះរាជាណាចក្រកម្ពុជា ជាមួយសមាគមិត្តភាពឡាវ-កម្ពុជានៃសាធារណរដ្ឋប្រជាធិបតេយ្យប្រជាមានិតឡាវ។

 ជាមួយគ្នានោះដែរភាគីឡាវក៏បានលើកឡើងផងដែរ អំពីទំនាក់ទំនងកិច្ចសហប្រតិបត្តិការដ៏ជិតស្និទ្ធរវាងកងទ័ពកម្ពុជា-ឡាវ ដែលមានសកម្មភាពជាច្រើន ទាំងការអប់រំបណ្តុះបណ្តាលធនមនុស្ស, ការផ្លាស់ប្តូរគណៈប្រតិភូ, លំហាត់ហ្វឹកហ្វឺនរួម, ការផ្តល់ជំនួយយោធា និងសម្ព័ន្ធមេត្រីភាពជាដើមនោះ។ ដោយឡែការទំនាក់ទំនងរវាងប្រជាជនិងប្រជាជននៃប្រទេសទាំងពីរក៏កាន់តែរីកចំរើនទៅមុខជានិច្ច ជាក់ ស្តែងដូចកិច្ចសហប្រតិបត្តិការរវាងសមាគមមិត្តភាពនៃប្រទេសទាំងពីរនេះ គឺធ្វើឡើងដើម្បីផលប្រយោជន៍ របស់ប្រជាជន និងប្រទេសទាំងពីរ។

 សូមបញ្ជាក់ថា នៅក្នុងដំណើរទស្សនកិច្ចនេះ ប្រធានគណៈកម្មាធិការមជ្ឈិមរណសិរ្សឡាវកសាងជាតិ ក៏បានបំពាក់មេដាយស្ថាបនាក៏សាងជាតិនៃប្រទេសឡាវ៦០ឆ្នាំជូនដល់គណៈប្រតិភូកម្ពុជាផងដែរ៕ អត្ថបទ៖ បាន ចក់