ភ្នំពេញ ៖ ដើម្បីចូលរួមចែករំលែកទៅដល់ប្រជាពលរដ្ឋ ដែលមានជីវភាពខ្វះខាតនៅតាមទីជនបទ កាលពីព្រឹកថ្ងៃទី២៥ ខែតុលា ២០២២នេះ ឯកឧត្តម សៀង បូរិទ្ធ អគ្គនាយកមូលនិធិនាគរាជ០១ បានដឹកនាំសប្បុរសជន ព្រមទាំងថ្នាក់ដឹកនាំ សមាជិក សមាជិការ សហការី នាំយកថវិការ និងអំណោយសម្ភារៈ មានគ្រឿង ឧបភោគបរិភោគមួយចំនួន ជូនដល់ទីស្នាក់កណ្តាល កាកកាបាទក្រហមកម្ពុជា ដើម្បីទុកចែកជូនដល់បងប្អូនប្រជាជនពលរដ្ឋ ដែលកំពុងជួបការលំបាក។​

​មានប្រសាសន៍ក្នុងឱកាសជួបសំណេះសំណាលជាមួយមន្រ្តីថ្នាក់ដឹកនាំ កាកបាទក្រហមកម្ពុជា ឯកឧត្តម សៀង បូរិទ្ធ អគ្គនាយកមូលនិធិនាគរាជ០១ បានជម្រាបជូនអំពីគោលបំណងនិងទិសដៅ នៃការបង្កើតមូលនិធិនាគរាជ០១នេះ គឺ ដើម្បីចូលរួមចំណែកជាមួយរាជរដ្ឋាភិបាល ដែលមានសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាបិតាស្ថាបនិកសន្តិភាព តាមរយៈធ្វើសកម្មភាពសប្បុរសធម៌ ចុះជួយបងប្អូនប្រជាពលរដ្ឋដែលខ្វះខាត គ្មានទីពឹង ចាស់ជរា ព្រះសង្ឃ និងក្មេងៗកុមារកំព្រា និងរួមចំណែកជាមួយកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ជាប្រធាន ដើម្បីចុះជួយដល់បងប្អូនប្រជាពលរដ្ឋ ចាស់ជរាគ្មានទីពឹង ដោយមិនប្រកាន់ពី និន្នាការនយោបាយ រើសអើង ពូជសាសន៍ ពណ៌សម្បុរ ក្នុងន័យរួមចំណែកកាត់បន្ថយភាពក្រីក្រនៅកម្ពុជា និងចូលរួមផ្សព្វផ្សាយ គោលនយោបាយ ភូមិ ឃុំ មានសុវត្ថិភាព អោយបងប្អូនប្រជាពលរដ្ឋយល់ដឹងកាន់តែច្បាស់។

ជាកិច្ចឆ្លើយតបលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា តំណាងសម្តេចកិត្តិព្រឹទ្ឋិបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានថ្លែងអំណរគុណយ៉ាងជ្រាលជ្រៅបំផុត និងគាំទ្ររាល់សកម្មភាព សប្បុរសធម៌ និងទឹកចិត្តបេះដូងមនុស្សធម៌ របស់ឯកឧត្តម សៀង បូរិទ្ធ អគ្គនាយកមូលនិធិនាគរាជ០១ ដើម្បីប្រជាជនកម្ពុជា ព្រមទាំងសប្បុរសជន សមាជិក សមាជិការ សហការី ទាំងអស់ ដែលបាននាំយកថវិការ និងសម្ភារៈរួមមានគ្រឿងបរិភោគ ឧបភោគ មួយចំនួនជូនដល់ កាកកាបាទក្រហមកម្ពុជា សម្រាប់ទុកចែកជូនដល់ប្រជាពលរដ្ឋ ដែលកំពុងជួបការលំបាក ដោយសារទឹកជំនន់ ឬគ្រោះមហន្តរាយផ្សេងៗដើម។

លោកជំទាវឱ្យដឹងទៀតថា ជំនួយសប្បុរសជននាឱកាសនេះ គឺជាការប្រពៃណាស់ សម្រាប់ជួយទៅដល់ប្រជាពលរដ្ឋដែលកំពុងខ្វះខាតក្នុងជីវភាព ជាពិសេសអ្នកដែលបាន​លិចលុងដោយសារជំនន់ទឹកភ្លៀង។ ខណៈនៅរយៈពេលប៉ុន្មានថ្ងៃនេះដែរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ក៏បានចុះចែកអំណោយជាស្បៀងអាហារ និងគ្រាប់ពូជស្រូវ ទៅដល់ប្រជាពលរដ្ឋ នៅក្នុងខេត្តមួយចំនួន ដើម្បីជួយសម្រាលការលំបាកខ្លះ ទៅដល់ប្រជាពលរដ្ឋដែលបានលិចលុង ៕ អត្ថបទ ៖ សំ ងីម