​កំពង់ឆ្នាំង៖ ​សម្តេច​អគ្គមហាសេនាបតី​តេ​ជោ ហ៊ុន សែន ប្រមុខ​រាជរដ្ឋាភិបាល​កម្ពុជា នៅ​រសៀល​ថ្ងៃទី២៥ ខែតុលា ឆ្នាំ​២០២២ នេះ បាន​អញ្ជើញ​ជួប​សំណេះសំណាល​ជាមួយ​ក្រុមប្រឹក្សា​ខេត្ត ក្រុង ស្រុក ឃុំ សង្កាត់ មន្ត្រីរាជការ​និង​កងកម្លាំងប្រដាប់អាវុធ នៅ​ខេត្ត​កំពង់ឆ្នាំង​ជាង​១ ពាន់​នាក់​។​

​នៅ​ក្នុង​ពិធី​នោះ សម្តេច​តេ​ជោ​នាយករដ្ឋមន្ត្រី បាន​វាយតម្លៃ​ខ្ពស់​ចំពោះ​ការងារ​របស់​ថ្នាក់ដឹកនាំ​ខេត្ត មន្ត្រីរាជការ កងកម្លាំង​និង​អាជ្ញាធរ​ពាក់ព័ន្ធ នៅក្នុង​ខេត្តកំពង់ឆ្នាំង ដែល​ខិតខំ​បំពេញ​ការ​បាន​យ៉ាង​ល្អ​ប្រសើរ ជាពិសេស​ការប្រយុទ្ធប្រឆាំង​កូ​វីដ​១៩ និង​ការជួយ​សង្គ្រោះ​ដល់​ប្រជាជន​ដែល​រង​ផល​ប៉ះពាល់​ដោយសារ​គ្រោះទឹកជំនន់​។​

បន្ថែម​ពីស​ម្តេច​តេ​ជោ​នាយករដ្ឋមន្ត្រី​បាន​រំលឹក​ដល់​មន្ត្រី​ទាំងអស់ ត្រូវ​បន្ត​យកចិត្តទុកដាក់​រក្សា​សន្តិសុខ​សណ្ដាប់ធ្នាប់​សង្គម ដោយ​អនុវត្ត​គោលនយោបាយ​ភូមិ ឃុំ មាន​សុវត្ថិភាព រួមមាន ការបង្ក្រាប​នូវ​បទល្មើស​ផ្សេងៗ ដូចជា ចោរកម្ម ប្លន់ ការជួញដូរ​គ្រឿងញៀន​ជាដើម ដើម្បី​ផ្តល់​ភាពកក់ក្តៅ និង​ធានា​ដល់​សុវត្ថិភាព​នៃ​ការរស់នៅ និង​ការប្រកប​របរការ​ងា​រ​ផ្សេងៗ​របស់​ប្រជាពលរដ្ឋ​។​

ទន្ទឹមនេះ សម្តេច​ក៏​ជំ​រុញអោយ​មន្ត្រី យកចិត្តទុកដាក់​ការ​ផ្តល់នូវ​សេវាសាធារណៈ រួមមាន​សេវា​តម្រូវ​ការចាំបាច់​ទាំងឡាយ និង​សេវា​សំណូមពរ​នានា​ជូន​ប្រជាពលរដ្ឋ អោយបាន​លឿន និង​មាន​ប្រសិទ្ធិភាព ហើយ​ត្រូវខិតខំ​បំបាត់​អោយអស់​នូវ​ភាព​អសកម្ម​នានា​។​

សូមបញ្ជាក់ថា ការជួប​សំណេះសំណាល​មន្ត្រីរាជការ​និង​កងកម្លាំង​នៅ​ក្នុង​ខេត្តកំពង់ឆ្នាំង​ពេលនេះ ធ្វើឡើង​បន្ទាប់ពី​សម្តេច​តេ​ជោ​នាយករដ្ឋមន្ត្រី​បាន​ជួប​សំណេះសំណាល​ជាមួយ​ក្រុមប្រឹក្សា​ខេត្ត ក្រុង ស្រុក ឃុំ សង្កាត់ មន្ត្រីរាជការ និង​កងកម្លាំងប្រដាប់អាវុធ នៅ​ក្នុង​ខេត្តសៀមរាប និង​បន្ទាយមានជ័យ បាត់ដំបង និង​ខេត្តពោធិ៍សាត់​៕​