​បាល់ទាត់​៖ ​សមាគម​បាល់ទាត់​អឺរ៉ុប UEFA បាន​បញ្ជាក់​ថា មក​ទល់​ពេល​នេះ​មាន​កីឡដ្ឋាន ៨ ក្នុង​ចំណោម​ទីក្រុង​ម្ចាស់ផ្ទះ​ទាំង ១២ នៅ Euro ២០២០ បាន​ធានា​ថា​នឹង​មាន​អ្នកគាំទ្រ​ចូល​ទស្សនា​។ ​​នៅសល់​ទីក្រុង ៤ ទៀត​រួមមាន​ទីក្រុង Munich ប្រទេស​អាល្លឺម៉ង់, Rome ប្រទេស​អ៊ីតាលី, Bilbao ប្រទេស​អេ​ស្ប៉ា​ញ និង Dublin សាធារណរដ្ឋ​អៀក​ឡង់ នៅ​មិនទាន់​ផ្តល់​ព័ត៌​មាន​នៃ​គំរោង​ផែនការ​ជាក់លាក់​របស់​ខ្លួន​ថា​ តើ​អាច​ឲ្យ​មាន​អ្នកគាំទ្រ​ចូល​ទស្សនា​បាន​ រឺ​អត់​។

​​ទីក្រុង​ទាំង ៤ ខាងលើ​នៅសល់​ពេលវេលា​ដល់​ថ្ងៃ​ទី១៩ ខែ​មេសា​ដើម្បី​ផ្តល់​ព័ត៌មាន​ចុងក្រោយ​​។ ​​ព្រឹត្តិការណ៍​បាល់ទាត់​ទ្វីប​អឺរ៉ុប Euro ២០២០ ដែល​លើក​មក ២០២១ ដោយសារ​មេរោគ​រាតត្បាត Covid-19 នេះនឹង​ចាប់ផ្ដើម​នៅ​ថ្ងៃ​ទី​១១ ខែ​មិថុនា​ដល់​ថ្ងៃ​ទី​១១ ខែ​កក្កដា​ខាងមុខ​។​ ​ទីក្រុង​ម្ចាស់ផ្ទះ​ផ្សេងទៀត​ដូចជា​ទីក្រុង Budapest ប្រទេស​ហុង​គ្រី​បាន​ធានា​ថា ​នឹង​បើក​ឲ្យ​មាន​អ្នក​គាំទ្រ​ចូល​ទស្សនា​ពេញ​កីឡដ្ឋាន​តែ​ម្តង ស្រប​ពេល​ទីក្រុង​ Baku ​ប្រទេស​អា​ស៊ែ​បៃ​សង់អាច​បើកឲ្យ​អ្នកគាំទ្រ​ដល់ ៥០% ខណៈ​ទីក្រុង St. Petersburg ប្រទេស​រុស្ស៊ី​នឹង​បង្កើន​ឲ្យ​មាន​អ្នកគាំទ្រ​លើស​ពី ៥០%​។ ​ប្រទេស​ទាំង៣ ​ខាង​លើ​នេះ​សុទ្ធតែ​កំពុង​ព្យាយាម​ងើប​ចេញពី​វិបត្តិ Covid-19 និង​ចាប់ផ្ដើម​ទទួល​ភ្ញៀវ​ទេសចរណ៍ឡើងវិញ​។

​​ចំណែក​ឯ​ទីក្រុង Amsterdam ប្រទេស​ហូ​ឡង់, ទីក្រុង Bucharest ប្រទេស​រ៉ូ​ម៉ា​នី និង​ទីក្រុង Glasgow ប្រទេស​ស្កុ​ត​ឡេ​ន បាន​បញ្ជាក់​ពី​សមត្ថភាព​ទទួល​អ្នក​គាំទ្រ​ត្រឹម ២៥-៣៣% ប៉ុណ្ណោះ​នៃ​ចំណុះ​កីឡ​ដ្ឋាន​។ ​ដោយឡែក​ទីក្រុង​ London ​ចក្រភព​អង់គ្លេស​កីឡដ្ឋាន Wembley សមាគម​បាល់ទាត់ FA រំពឹង​ត្រឹម ២៥% ប៉ុណ្ណោះ​នៃ​ចំនួន​កៅអី​សរុប ៩ម៉ឺន​៕

​អត្ថបទ​៖​នាង សុភា​វុ​ធ