ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាទៅក្រសួង និងអាជ្ញាធរ ពាក់ព័ន្ធ ត្រូវដោះស្រាយកាត់ឆ្វៀលដីនៅតំបន់២ និងតំបន់៣ នៃខេត្តនៅជុំវិញបឹង​ទន្លេសាប ឲ្យចប់រួចរាល់ជូនប្រជាពលរដ្ឋ នៅមុនពិធីបុណ្យចូលឆ្នាំថ្មីប្រពៃណីជាតិខ្មែរ ប៉ុន្តែត្រូវយកមកវិញនូវដី ដែលអ្នកមានអំណាច និងជនខិលខូចមួយចំនួន បានរំលោភកាន់កាប់ ។

ក្នុងពិធីផ្ដល់ស្រូវពូជ និងស្បៀងដល់ប្រជាពលរដ្ឋរងគ្រោះដោយទឹកជំនន់ ចំនួនជាង ៣០០០ គ្រួសារ នៅក្នុងខេត្តកំពង់ឆ្នាំង នៅព្រឹកថ្ងៃទី២៦ ខែតុលា នេះ សម្ដេចតេជោ ហ៊ុន សែន សម្ដេចតេជោ បានជំរុញឲ្យថ្នាក់ដឹកនាំខេត្ត និងអាជ្ញាធរត្រូវមានការយកចិត្តទុកដាក់រៀបចំ​ពលរដ្ឋរស់នៅ​តំបន់ទន្លេសាប ។

សម្ដេចតាជោ បានបញ្ជាក់ថា ពលរដ្ឋរស់នៅតំបន់បឹងទន្លេសាប ខ្លះបានរស់នៅច្រើនជំនាន់​មកហើយ ​ដែលមានចូលដល់រយឆ្នាំក៏មាន ​ដូច្នេះ តំបន់២​ និងតំបន់៣ ត្រូវសម្រួលឲ្យពលរដ្ឋ​បានរស់នៅ កន្លែងនោះ ហើយបន្ថែមទៅដោយការគិតគូតំបន់៣ខ្លះ កាត់ចេញមកជាតំបន់២ ហើយតំបន់២ខ្លះ កាត់ មកជាតំបន់១ ដែលការងារនេះក្រសួងរៀបចំដែនដី នគរូបនីយកម្ម និងសំណង់ និងអាជ្ញាធរពាក់ព័ន្ធ ត្រូវធ្វើឲ្យរួចរាល់ នៅមុនបុណ្យចូលឆ្នាំ ។

សូមរំលឹកថា ការបង្រ្កាបការទន្ទ្រានដីរដ្ឋក្នុងដែនព្រៃលិចទឹកនៃតំបន់ទន្លេសាប ​ក្នុងខេត្តចំនួន៦ រួមមានខេត្តកំពង់ឆ្នាំង ​ពោធិ៍សាត់ បាត់ដំបង បន្ទាយមានជ័យ ខេត្តសៀមរាប ​និងខេត្តកំពង់ធំ កាលពីពេល កន្លងមក ដកហូតបានដីជាច្រើនម៉ឺនហិកតា។

ពាក់ព័ន្ធនឹងបញ្ហាដីព្រៃលិចទឹកនេះ រាជរដ្ឋាភិបាល បានសម្រេចកាត់ដីតំបន់២ និងតំបន់៣ មួយចំនួន ​ទៅឱ្យប្រជាពលរដ្ឋ ​ដែលបានអាស្រ័យផលយូរឆ្នាំមកហើយ ​ដោយក្រសួង និង​អាជ្ញាធរពាក់ព័ន្ធ បាននិងកំពុងវាស់វែង ​និងកាត់ជូនប្រជាពលរដ្ឋ ​បានមួយចំនួនហើយ៕ អត្ថបទ៖ បាន សុខរិទ្ធិ