បង់ក្លាដែស៖ យោងតាមក្រុមមន្ត្រី និងប្រព័ន្ធផ្សព្វផ្សាយបានរាយការណ៍ថា ចំនួនអ្នកស្លាប់ដោយសារព្យុះស៊ីក្លូន Sitrang បានកើនឡើងដល់ ៣៥នាក់ ហើយលំនៅឋានជាច្រើនខ្នងត្រូវបានបំផ្លាញ ខណៈព្យុះនេះបានបោកបក់មកលើឆ្នេរសមុទ្រភាគខាងត្បូង និងផ្នែកកណ្តាលរបស់ប្រទេសបង់ក្លាដែស។
សារព័ត៌មានបានរាយការណ៍ថា ព្យុះ Sitrang បានធ្វើឲ្យមានបំណាក់ដី ហើយបានចុះខ្សោយទៅវិញជាព្យុះត្រូពិចនៅប្រទេសបង់ក្លាដែសកាលពីថ្ងៃអង្គារ។ សារព័ត៌មានបានរាយការណ៍ថា ព្យុះស៊ីក្លូនបានឆក់យកជីវិតមនុស្ស ៣៥នាក់ ព្រមទាំងបានបំផ្លាញលំនៅឋាន និងហេដ្ឋារចនាសម្ព័ន្ធផ្សេងទៀត រម្លើងដើមឈើ និងកាត់ផ្តាច់ប្រព័ន្ធទំនាក់ទំនង ផ្លូវថ្នល់ និងការផ្គត់ផ្គង់ថាមពល។
ប្រជាជនប្រមាណ ១០លាននាក់គ្មានថាមពលប្រើប្រាស់នៅក្នុងស្រុកជាច្រើន នៅតាមឆ្នេរសមុទ្រកាលពីថ្ងៃអង្គារ។ ព្យុះស៊ីក្លូនបានបោកបក់មកលើឆ្នេរភាគនិរតីនៃប្រទេសបង់ក្លាដែស ប៉ុន្តែរបាយការណ៍ប្រព័ន្ធផ្សព្វផ្សាយបានបញ្ជាក់ថា ការស្លាប់ខ្ពស់បំផុតត្រូវបានគេរាយការណ៍នៅឆ្នេរសមុទ្រ Chattogram ភាគនិរតី ជាកន្លែងដែលនាវាបូមខ្សាច់ដែលដឹកខ្សាច់បានលិចនៅឈូងសមុទ្រ Bengal បណ្តាលឲ្យកម្មករ ៨នាក់លង់ទឹក ខណៈខ្យល់បក់បោកខ្លាំង៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
