ភ្នំពេញ៖ ក្នុងពិធីជួបសំណេះសំណាលចែកស្រូវពូជ និងស្បៀងជូនប្រជាពលរដ្ឋនៅខេត្តកំពង់ឆ្នាំង ដែលរងគ្រោះដោយទឹកជំនន់ នាព្រឹកថ្ងៃទី២៦តុលានេះ ជាមួយនឹងការពាំនាំ​ព្រះរាជ​បណ្ដាំសួរសុខ​ទុក្ខ​ពី ព្រះករុណា ព្រះមហាក្សត្រ និងសម្តេចព្រះវររាជមាតាជាតិខ្មែរ ដែល​តែងតែ​យកព្រះទ័យទុក​ដាក់នូវសុខទុក្ខរបស់ប្រជាពលរដ្ឋ និងថ្លែងសរសើរដល់ការខិតខំទាំងឡាយរបស់អាជ្ញាធរ ថ្នាក់ដឹក​នាំ​និងកងកម្លាំងគ្រប់ថ្នាក់ ដែលបានជួយប្រជាពលរដ្ឋ សម្តេចតេជោ​ ហ៊ុន សែន នាយករដ្ឋមន្ត្រី​បានកោតសរសើរ​ប្រជាពលរដ្ឋដែលបាន​ខិតខំ​រើ​បំរាស់ចេញពីវិបត្តិគ្រោះទឹកជំនន់ និងវិបត្តិនៃជំងឺ​ឆ្លងរាតត្បាតកូវីដ១៩ ផងដែរ។

សម្ដេចតេជោ នាយករដ្ឋមន្ត្រី បាន​បង្ហាញ​ដោយ​មោទនភាព​ថា​ ស្ថានភាព​ជំងឺ​ឆ្លង​ កូវីដ១៩ គឺនៅសល់តែប៉ុន្មានខែទៀតទេ ​គម្រប់៣ឆ្នាំហើយនៃការកើតឡើងនូវជំងឺដ៏កាចសាហាវនេះ។ សម្តេចបន្តថា ​ដោយសារការខិតខំរបស់បងប្អូនប្រជាពលរដ្ឋយើង ក្រោម​ការ​គ្រប់គ្រងរបស់​រាជ​រដ្ឋាភិបាល ​កូវីដគឺយើងគ្រប់គ្រងបាន​ ប៉ុន្តែ​ទោះ​ជា​យ៉ាងណា សម្តេច​ក៏​បានផ្តាំផ្ញើ​បងប្អូន​ប្រជា​ពលរដ្ឋ ​ត្រូវបន្តការប្រុងប្រយ័ត្ន ​បើបងប្អូនណា​ដែលមិនទាន់​បាន​ចាក់វ៉ាក់សាំងដូសជំរុញ​ត្រូវទៅទទួល​យក​វ៉ាក់សាំង​ដូសជំរុញ ​ព្រោះកូវីដ ​វាមិនភ្លេចយើងទេ។

សម្ដេចតេជោ បានបញ្ជាក់ថា ជិត៧ ខែហើយ ដែលប្រទេសកម្ពុជា គ្មានអ្នកស្លាប់ដោយ​សារ​កូវីដ១៩។ នេះគឺជាជោគជ័យធំណាស់ ​ប៉ុន្តែសម្ដេច​ក៏បានផ្ដាំផ្ញើដល់បងប្អូនប្រជាពលរដ្ឋរបស់យើង​ថា យើង​អាចភ្លេចកូវីត ​ក៏ប៉ុន្តែ​កូវីត​វាអត់ភ្លេចយើងទេ​ គឺវាអត់ទៅណាឆ្ងាយទេ​ កាលណាយើង​ប្រហែស​តែបន្តិចយើងកើតកូវីត ​ហើយប្រសិន​បើយើង​យក ​វ៉ាក់សាំង​មិន​គ្រប់វានឹងនាំ​ទៅ​ដល់សភាពធ្ងន់ធ្ងរ។ដូច្នេះ​សម្ដេច បានអំពាវនាវដល់​ប្រជាពលរដ្ឋរបស់យើងចូលរួម​ជាមួយ​រាជរដ្ឋាភិបាល​ដើម្បីបន្តការប្រយុទ្ធប្រឆាំងជាមួយកូវីដ១៩ ជាបន្តទៀត៕ អត្ថបទ៖ មុត​ សុទ្ធ