កំពត៖ នៅសល់តែ១០ថ្ងៃទៀត ពិធីបុណ្យអុំទូក បណ្តែតប្រទីប និងសំពះព្រខែ អកអំបុក នៅខេត្តកំពត នឹងឈានចូលមកដល់ហើយ ដូច្នេះដើម្បីទាក់ទាញទេសចរជាតិ​ និងអន្តរជាតិ ឲ្យមកកម្សាន្តច្រើន​តាមការរំពឹងទុក អាជ្ញាធរខេត្ត ​បាននិងកំពុងខិតខំរៀបចំតុបតែងលម្អ​សោភ័ណភាព​ក្រុង ឱ្យ​ទាក់ទាញកាន់តែខ្លាំង។

អភិបាលក្រុងកំពត លោក លាង រឿនសុធី បានឲ្យដឹងថា ក្រោមការដឹកនាំ និងចង្អុលបង្ហាញពី ឯកឧត្តម ម៉ៅ ធនិន អភិបាលខេត្តកំពត អាជ្ញាធរខេត្ត បានត្រៀមលក្ខណៈរួចរាល់ក្នុងការរៀបចំ​ពិធីប្រណាំងទូក-ង ខ្នាតប្រពៃណី ​និងពិធីបណ្តែតប្រទីប សំពះព្រះខែ ​និងអកអំបុក រយៈពេល៣ថ្ងៃ នៅថ្ងៃទី៦-៨ ខែ វិច្ឆិកា ខាងមុខនេះ។

លោក បានបញ្ជាក់ថា ដើម្បីជាការទាក់ទាញចំណាប់អារម្មណ៍​ទេសចរឱ្យចូលរួមទស្សនាកម្សាន្តច្រើន ​អាជ្ញាធរខេត្ត ក្រុង និងសង្កាត់​បានរួមគ្នារៀបចំតុបតែង​លម្អគ្រប់​ទីតាំង​សំខាន់ៗ​ទាំងអស់​ក្នុងខេត្ត ​ដោយឡែនៅក្នុងក្រុង ​មានសកម្មភាពលាបថ្នាំពណ៌​ឡើងវិញ​តាម​ចិញ្ចើមផ្លូវ​ រង្វង់មូល​ ការតុបតែងលម្អ ​ភ្លើងពណ៌លម្អភ្លើងបំភ្លឺផ្លូវ ឧបករណ៍បាញ់ទឹក​នៅ​រង្វង់មូលទុរេន​ និងតាមបណ្តាសួនច្បារសំខាន់ៗ កាត់ មែកឈើ ​តុបតែងភ្លើងពណ៌តាមដើមឈើ តាមសួនច្បារមាត់ព្រែក ​តុបតែងភ្លើងនៅស្ពានឥន្ទធនូ និងស្ពាន ថ្មី ។ល។

លោកអភិបាលក្រុង បានបន្ថែមថា ពេលនេះ មន្ត្រីក្រុង និងសង្កាត់ កំពុងមមាញឹក ក្នុងសកម្មភាព រៀបចំសណ្តាប់ធ្នាប់ និងតុបតែងលម្អនៅតាមទីសាធារណៈ និងតុបតែងនៅកន្លែងធ្វើការរបស់ខ្លួន ដើម្បី អបអរបុណ្យអុំទូក។

តាមការបញ្ជាក់របស់ឯកឧត្តមអភិបាលខេត្ត នាពេលកន្លងមកថា រដ្ឋបាលខេត្ត បានរៀបចំតុប តែងភ្លើងលើស្ពានទាំងពីរក្នុងខេត្ត ដោយជួលអ្នកជំនាញផ្នែកអគ្គិសនី និងតុបតែង មកដំឡើង ធ្វើយ៉ាងណាឱ្យមានភាពស្រស់ស្អាត និងទាក់ទាញបំផុត។

ជាមួយគ្នានេះដែរ ​ឯកឧត្តមអភិបាលខេត្ត ក៏បានអំពាវនាវដល់ប្រជាពលរដ្ឋក្នុងខេត្តទាំងអស់ ឱ្យចូលរួម​សម្អាតអនាម័យបរិស្ថានជុំវិញផ្ទះរៀងៗខ្លួន ​ពិសេស ត្រូវទុកដាក់សំរាមឱ្យបានត្រឹមត្រូវ ហើយចូលរួមតុមតែងលម្អភ្លើងពណ៌តាម​គេហដ្ឋាន​របស់ខ្លួន ​ដើម្បីរួមចំ ណែកក្នុងការ​បង្កើន​សោភ័ណភាព​ក្រុង ​នាឱកាសនៃពិធីប្រណាំងទូក-ងខេត្តកំពត ​នាពេលខាងមុខនេះ ។

តាមការរំពឹងទុករបស់រដ្ឋបាលខេត្តកំពត ​រយៈពេលបីថ្ងៃនៃពីធីបុណ្យអុំទូកខាងមុខនេះ ​នឹងអាច ទាក់ទាញ​ភ្ញៀវទេសចរ ចន្លោះពី៤០ ​ទៅ៥០ម៉ឺននាក់៕ អត្ថបទ៖ អន សារឹម