មីយ៉ាន់ម៉ា៖ ជនស៊ីវិលនៅក្នុងសហភាពមីយ៉ាន់ម៉ា កំពុងអំពាវនាវកុំឲ្យប្រជាជនចូលរួមប្រារព្ធពិធីផ្សេងៗ ក្នុងអំឡុងថ្ងៃឈប់សម្រាកពិធីបុណ្យចូលឆ្នាំថ្មី ដែលនឹងមកដល់នៅថ្ងៃស្អែក ជំនួសដោយការកាន់មរណទុក្ខដល់អ្នកទាំងឡាយ ដែលបានស្លាប់ក្នុងការបង្ក្រាបថ្មីៗពីសំណាក់យោធាវិញ។
ចំនួនជនស៊ីលដែលត្រូវបានសម្លាប់ ដោយកងកម្លាំងសន្តិសុខចាប់តាំងពីរដ្ឋប្រហារថ្ងៃទី១ ខែកុម្ភៈមកបានកើនឡើងដល់ ៧០៦នាក់គិតត្រឹមថ្ងៃអាទិត្យម្សិលមិញ។ ក្រុមឃ្លាំមើលសិទ្ធិមនុស្សក្នុងស្រុកបាននិយាយថា នៅថ្ងៃសុក្រតែមួយថ្ងៃប៉ុណ្ណោះមនុស្សចំនួន ៨២នាក់ត្រូវបានសម្លាប់នៅក្នុងទីក្រុងបាហ្គោ ស្ថិតនៅភាគខាងជើងទីក្រុងធំបំផុតយ៉ាងហ្គោន នៅពេលដែលយោធា និងនគរបាលបានបើកការបាញ់ប្រហារ និងប្រើអាវុធធុនធ្ងន់ដូចជាកាំភ្លើងត្បាល់ជាដើម។
ថ្ងៃឈប់សម្រាប់ចូលឆ្នាំថ្មីមានរយៈពេល ១សប្ដាហ៍នឹងចាប់ផ្ដើមនៅថ្ងៃអង្គារស្អែកនេះ។ តាមធម្មតាប្រជាពលរដ្ឋអបអរពិធីបុណ្យនេះដោយការច្រៀង រាំ និងជះទឹកដាក់គ្នា ប៉ុន្តែនៅឆ្នាំនេះបែរជាមានការអំពាវនាវឲ្យ កាន់មរណទុក្ខជនរងគ្រោះនៃអំពើហិង្សាទៅវិញ។ ខណៈដែលក្រុមមនុស្សជាច្រើននៅតែបន្តចេញតវ៉ាតាមដងផ្លូវនានា ការព្រួយបារម្ភការបង្ក្រាបពីយោធា អាចនឹងបង្កើនការបង្ក្រាបរបស់ខ្លួន លើក្រុមអ្នកតវ៉ាអំឡុងថ្ងៃឈប់សម្រាក ដើម្បីបង្ហាញថាពួកគេអាចគ្រប់គ្រងស្ថានការបាន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
