ភ្នំពេញ៖ ប្រធានសហព័ន្ធស្រូវអង្ករកម្ពុជា រំពឹងថា អង្កររបស់កម្ពុជានឹងត្រូវនាំចេញទៅកាន់ទីផ្សារ អេមីរ៉ាតអារ៉ាប់រួម និងបណ្តាប្រទេសនៅមជ្ឈិមបូព៌ា កាន់តែច្រើន និងងាយស្រួលជាងមុន ស្របពេលកម្ពុជាបានកំពុងចរចារបើកទីផ្សារទៅកាន់ប្រទេសទាំងនោះ។
លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា បានថ្លែងប្រាប់ភ្នាក់ងារអ្នកយកព័ត៌មាន BTV ពីរដ្ឋធានីឌូបៃ, អេមីរ៉ាតអារ៉ាប់រួម នៅថ្ងៃទី២៦ ខែ តុលា ឆ្នាំ២០២២ នេះថា សហព័ន្ធស្រូវអង្ករកម្ពុជា បានខិតខំប្រឹងប្រែងយកចិត្តទុកដាក់ខ្ពស់ ដើម្បីជំរុញនាំចេញអង្កររបស់កម្ពុជា ឲ្យបានកាន់តែខ្លាំងក្លា ក្នុងគោលដៅលើកកម្ពស់ដល់សហគមន៍ និងកសិករ ដែលជាអ្នកដាំដុះស្រូវ ជាពិសេសគឺការចូលរួមចំណែកដល់សេដ្ឋកិច្ចជាតិយើង។
លោកឧកញ៉ា បន្តថា ការនាំចេញអង្ករ ទៅកាន់ប្រទេសអេមីរ៉ាតអារ៉ាប់រួម មានតិចតួចបំផុត ដូច្នេះតាមរយៈការចរចារ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា-អេមីរ៉ាតអារ៉ាប់រួម ជាឱកាសជាលើកដំបូង ធ្វើឲ្យសហព័ន្ធអារ៉ាបរួម បានស្គាល់កម្ពុជាកាន់តែទូលំទូលាយ។
លោកឧកញ៉ា លើកឡើងថា សហព័ន្ធស្រូវអង្ករកម្ពុជា បានកំពុងផ្តល់ឱកាសជជែក ពិភាក្សាជាមួយដៃគូរពាក់ព័ន្ធ ក្នុងការស្វែងរកដៃគូរពាណិជ្ជកម្ម សម្រាប់ការនាំចេញអង្កររបស់កម្ពុជា ទៅកាន់ប្រទេសទាំងនោះ។សូមបញ្ជាក់ថា៖ នៅវេទិកាធុរកិច្ចកម្ពុជា-អេមីរ៉ាតអារ៉ាប់រួម នៅថ្ងៃទី២៤ ខែតុលា ឆ្នាំ២០២២ នេះ លោកឧកញ៉ា សុង សារ៉ន ប្រធាន សហព័ន្ធស្រូវអង្ករកម្ពុជា ក៏បានធ្វើបទបង្ហាញអំពីសក្តានុពល និងវឌ្ឍនភាព របស់វិស័យស្រូវអង្ករកម្ពុជា។
រយៈពេល ៩ខែ ឆ្នាំ២០២២ នេះ កម្ពុជាមាននាំចេញជិត ៤៥ ម៉ឺនតោន គិតជាទឹកប្រាក់ជាង ២៨៦ លានដុល្លារសហរដ្ឋអាមេរិក ទៅកាន់គោលដៅចំនួន ៦០ប្រទេស ដែលក្នុងនោះមានតំបន់មជ្ឈឹមបូព៌ាផងដែរ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
