​ភ្នំពេញ​៖ ក្រុមហ៊ុន​ចំនួន​បី នៅ​ព្រឹក​ថ្ងៃទី ២៦ ខែតុលា ឆ្នាំ ២០២២​នេះ បាន​ចុះហត្ថលេខា​លើ​កិច្ចព្រមព្រៀង​ត្រីភាគី​ស្តីពី​ការប្រមូលប្រាក់​នៃ​ផ្លូវ​ល្បឿន​លឿន ភ្នំពេញ​-​ព្រះសីហនុ នៅ​អាគារ​កាណាឌីយ៉ា​។​ ​ក្រុមហ៊ុន​ចំនួន​បី ដែល​បាន​ចុះហត្ថលេខា​ព្រមព្រៀងគ្នា​លើ​ការប្រមូលប្រាក់​នៃ​ផ្លូវ​ល្បឿន​លឿន ភ្នំពេញ ព្រះសីហនុ​នោះ ទី​១ ក្រុមហ៊ុន ខេ​ម​បូ​ឌា​ន ភីភី​អេស​អេ​ច​វី អិ​ច​ប្រេ​ស​វ៉េ ចុះហត្ថលេខា​ដោយ លោក MO KUN ជា អ្នកគ្រប់គ្រង​ទូទៅ ទី​២ ធនាគារ អាយ ស៊ី ប៊ី ស៊ី (ICBC) សាខា​ភ្នំពេញ​ចុះហត្ថលេខា​ដោយ លោក DENG YEN ជា​អនុប្រធាន និង​ទី​៣ ធនាគារ កាណាឌីយ៉ា ចុះហត្ថលេខា​តំណាង​ដោយ​លោក Raymond Sia ជា​នាយក​ប្រតិបត្តិ​។​

​តាម​សេចក្តីប្រកាស​ព័ត៌មាន បាន​ឲ្យ​ដឹងថា ផ្លូវ​ល្បឿន​លឿន​ភ្នំពេញ​-​ព្រះសីហនុ​គឺជា​ផ្លូវ​ល្បឿន​លឿន​ដំបូង​គេ របស់​កម្ពុជា ដែល​បាន​ផ្តើម​បើក​ដំណើរការ​ដំបូង នៅ​ថ្ងៃទី0១ ខែតុលា ឆ្នាំ​២០២២ ហើយ​ចាប់តាំងពី​ពេល​នោះមក ចរាចរណ៍​នៅលើ​ផ្លូវ​ល្បឿន​លឿន គឺ​បានទទួល​កំណើន​យានយន្ត​បើកបរ​មាន​កំណើន​កើន​ឡើងជា​លំដាប់​ពីថ្ងៃ​ទៅ​មួយថ្ងៃ​ដោយ​មិនមាន​យកប្រាក់​កម្រៃ និង​បាន​កាត់បន្ថយ​ពេលវេលា​ការធ្វើដំណើរ​ភ្នំពេញ ក្រុងព្រះសីហនុ ៦​ម៉ោង មក​នៅត្រឹម​ជាង​ត្រឹម​២​ម៉ោង​តែប៉ុណ្ណោះ ហើយ​ផ្តល់ជូន​នូវ​ភាព​រហ័ស 　​សុវត្ថិភាព និង​ជំនឿ​ទុកចិត្ត​ក្នុងការ​ធ្វើដំណើរ​របស់​ប្រជាពលរដ្ឋ ហើយ​នាំមក​នូវ​ការផ្លាស់ប្តូរ​ដល់​ជីវិត​ប្រជាជន​កម្ពុជា និង​ការអភិវឌ្ឍន៍​សេដ្ឋកិច្ចសង្គម​ផងដែរ​។​

​តាម​ការគ្រោងទុក ផ្លូវ​ល្បឿន​លឿន​ភ្នំពេញ ក្រុងព្រះសីហនុ នឹង​ចាប់ផ្តើម​បើកបរ​ឆ្លងកាត់​យក​ថ​វិកា​ចាប់ពី​ថ្ងៃទី​១ ខែវិច្ឆិកា​ឆ្នាំ​២០២២​នេះ​តទៅ​។​ លោក ហ៊ាង សុទ្ធា​យុ​ត្តិ អ្នកនាំពាក្យ​ក្រសួង​សាធារណការ និង​ដឹកជញ្ជូន​បាន​បញ្ជាក់ថា ក្នុង​រយៈពេល​៣​សប្តាហ៍​ដំបូង​នៅក្នុង​ខែតុលា​នេះ ផ្លូវ​ល្បឿន​លឿន​ភ្នំពេញ ព្រះសីហនុ បានទទួល​រថយន្ត​បើកបរ​ឆ្លងកាត់​ជាង​២០​ម៉ឺន​គ្រឿង ហើយ ផ្លូវ​ល្បឿន​លឿន​នេះ​បាន​សាងសង់​ប្រវែង ១៨៧ គីឡូម៉ែត្រ បានចាប់ផ្តើម​នៅក្នុង​ខែមិថុនា​ឆ្នាំ​២០១៩ ក្នុងតម្លៃ ២ ពាន់​លាន​ដុល្លារ​អា​មេ​រិច​៕ អត្ថបទ​៖ ស៊ុម សុខ​ជា​