កំពង់ឆ្នាំង៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នាថ្ងៃទី២៧ ខែតុលា ឆ្នាំ២០២២​នេះ បានបញ្ជាក់អោយដឹងថា រដ្ឋបាលខេត្ត និងក្រុងកំពង់ឆ្នាំង បាន និងកំពុងសហការ​រៀបចំ​ភ្លើងពណ៌ ការកែលម្អសួនច្បារ ការជួសជុលផ្លូវកៅស៊ូ កសាងផ្លូវបេតុងខ្វាត់ខ្វែង រៀបចំទីតាំង​លេងទឹក(តំបន់ត្រជាក់) ក្នុងក្រុងកំពង់ឆ្នាំង ដើម្បីផ្តល់ក្តីសប្បាយរីករាយក្រោមម្លប់សុខសន្តិភាព ជូនដល់ប្រជាពលរដ្ឋ និងភ្ញៀវទេសចរដែលមកកំសាន្ត។

ឯកឧត្តមបានបន្តថា ការរៀបចំតុបតែងលម្អក្រុងកំពង់ឆ្នាំង គឺមាន៥ទីតាំង ក្នុងនោះ​មាន​នៅ​សួន​សម្តេច​ចៅ​ហ្វាវាំង គង់ សំអុល, សួនច្បារវិមានឯករាជ្យ និងសួនច្បារពុទ្ធិសែននាងកង្រី, សួនច្បារ​បាញ់​ទឹក​មុខសាលាខេត្តកំពង់ឆ្នាំង, សួនច្បារមាត់ទន្លេផ្សារក្រោម, និងកន្លែងកំសាន្តពីស្ពានថ្ម រហូតដល់​វត្តយាយទេព(តំបន់ត្រជាក់) ទីតាំងកំសាន្តទាំង៥កន្លែងនេះ គឺត្រូវរៀបចំជា​ភ្លើង​ពណ៌​លម្អ​គ្រប់ទីតាំង មានទាំងក្លោងទ្វាភ្លើងពណ៌ជាច្រើនកន្លែងតាមដងផ្លូវទៀតផង ។ ចំណែក​ផ្លូវ​មួយ​ចំនួន មានផ្លូវក្រាលកៅស៊ូ និងផ្លូវបេតុងដែលប្រជាពលរដ្ឋកំពុងធ្វើដំណើរ និងជា​សេចក្តី​ត្រូវការ​របស់​ប្រជាពលរដ្ឋនោះ គឺអាជ្ញាធរខេត្ត និងក្រុងកំពង់ឆ្នាំង បានជួសជុល​កែ​លម្អ​ជា​បន្ត​បន្ទាប់​ដោយ​មិន​អោយប្រជាពលរដ្ឋរិះគន់នោះឡើយ ។ ចំពោះក្លោងទ្វាសម្រាប់ប្រារព្វពិធីប្រណាំងទូក អក​អំបុក សំពះព្រះខែវិញ គឺបានធ្វើឡើងចំនួន២ទីតាំង គឺនៅមុខ​ទី​បញ្ជាការ​កង​រាជ​អាវុធ​ហត្ថ​ខេត្ត​កំពង់ឆ្នាំង និងនៅចំណុចច្រមុះជ្រូកផ្លូវទៅសង្កាត់ខ្សាម ដោយបាន​តុប​តែង​ជា​រចនា​បទ​ប្រពៃណី​ខ្មែរទាំងអស់។ នៅពីមុខវត្តលោកយាយទេពវិញ គឺត្រូវរៀបស្តង់​លក់​ដូរ​នូវ​ទំនិញ​គ្រប់​ប្រភេទ មានការប្រគុំតន្រ្តីរាំលេងកំសាន្ត ជូនដល់​ប្រជាពលរដ្ឋ​បាន​សប្បាយ​ក្នុង​ពិធី​បុណ្យ​ផង​ដែរ​។ ដោយឡែកផ្សារលើ និងផ្សារឆ្នាំងវិញ អាជ្ញាធរក្រុងកំពង់ឆ្នាំង បានរៀប​ចំ​សណ្តាប់​ធ្នាប់​របៀប​រៀប​រយ និងលាងសម្អាតបានស្អាតល្អរួចហើយដែរ។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានបន្ថែមថា​ ដោយសារប្រទេសកម្ពុជាយើង មានសុខសន្តិភាពពេញលេញ សេដ្ឋកិច្ចប្រជាពលរដ្ឋបានធូរធារ បងប្អូន​ប្រជាពលរដ្ឋតែង​តែរ​ក​កន្លែង​កំសាន្ត​លេងអោយសប្បាយជាមួយក្រុមគ្រួសារ មិត្តភ័ក្រ ។ ដូចនេះ ក្នុងនាមអាជ្ញាធរ​មាន​សមត្ថ​កិច្ច ត្រូវតែរៀបចំសណ្តាប់ធ្នាប់ សន្តិសុខ អនាម័យ សោភ័ណភាព ដោយឆ្លើយ​តប​អោយ​បាន​ទៅ​នឹង​សេចក្តីត្រូវការរបស់ពួកគាត់៕ ហុង វាស្នា