ភ្នំពេញ៖ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា នៅព្រឹកថ្ងៃទី២៧ ខែតុលា ឆ្នាំ២០២២នេះ បានទទួលជួបសវនាការ និងទទួលអំណោយជាថវិកាចំនួន៣ពាន់ដុល្លារអាមេរិក ពីក្រុមការងារសប្បុរសធម៌ នៃគ្រឹះស្ថានមីក្រូហិរញ្ញវត្ថុ អាក់ទីវភីភល ភីអិលស៊ី នៅ​អគារ​ទីស្នាក់​ការ​កណ្តាល កាកបាទក្រហមកម្ពុជា។

ក្នុងឱកាសទទួលជួបសវនាការនោះ លោកជំទាវអគ្គលេខាធិការ បានពាំនាំប្រសាសន៍របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ និង​ការថ្លែងអំណរគុណយ៉ាងជ្រាលជ្រៅ ចំពោះទឹកចិត្តសប្បុរសធម៌ របស់គ្រឹះស្ថានមីក្រូហិរញ្ញវត្ថុ អាក់ទីវភីភល ភីអិលស៊ី ដែលដឹកនាំដោយលោក Tatsuhiro Kurihara ជាអគ្គនាយក ដែល​បាន​បរិច្ចាគ​ថវិកា​ចំនួន៣ពាន់ដុល្លារជូនដល់ កាកបាទក្រហមកម្ពុជា សម្រាប់ប្រតិបត្តិការមនុស្សធម៌ ក្នុង​ជួយ​សម្រាលការលំបាកដល់ប្រជាពលរដ្ឋរងគ្រោះ និងងាយរងគ្រោះបំផុត នៅក្នុង​ប្រទេស​កម្ពុជា​។

លោក​ជំទាវអគ្គលេខាធិការឱ្យដឹងថា ជារៀងរាល់ឆ្នាំ កាកបាទក្រហមកម្ពុជា ទាំងថ្នាក់កណ្តាល និង​សាខាទាំងអស់ តែងតែធ្វើការកៀងគរ រកជំនួយពីសប្បុសជននានា ក្នុងឱកាសទិវា៨ឧសភា ដើម្បី​ទុកជួយទៅដល់ប្រជាពលរដ្ឋ ដែលត្រូវការជំនួយជាចាំបាច់។ លោកជំទាវបញ្ជាក់ថាការកៀងគររកជំនួយនេះដែរ បើសាខាណាមិនមានលទ្ឋភាពគ្រប់គ្រាន់ និង​ផ្តល់​ជំនួយ​ទៅដល់ប្រជាពលរដ្ឋបានទាន់ពេលវេលាទេ ថ្នាក់កណ្តាល និងយកទៅបំពេញបន្ថែម។ ជាក់​ស្តែង​នៅក្នុងឆ្នាំ២០២២នេះ កាកបាទក្រហមកម្ពុជា ទីស្នាក់ការកណ្តាល បានផ្តោត​ទៅ​លើ​ប្រជាពលរដ្ឋ​រង​គ្រោះដោយទឹកជំនន់ នៅភូមិភាគឦសាន រួមមានខេត្តមណ្ឌលគិរី រតនគីរី ស្ទឹងត្រែង និងក្រចេះ ដែលសាខានៅបណ្តាខេត្តទាំងនោះ មានធនធានតិចតួច ដែលត្រូវការ ការគាំទ្រ​ពីទីស្នាក់ការកណ្តាលបន្ថែម។ លោកជំទាវគូសបញ្ជាក់ថា អំណោយ​ដែល​ទទួល​បាន​ពី​សប្បុរស​នានា កាកបាទក្រហមកម្ពុជា នឹងយកទៅប្រើប្រាស់ឱ្យចំគោលដៅមនុស្សធម៌ ដោយ​មិន​ប្រកាន់​ពូជ​សាសន៍ ពណ៌សម្បុរ និងនិន្នាការនយោបាយណាមួយឡើយ។ ជាពិសេស​ជន​ចាស់​ជរា​ឥត​ទីពឹង និងកុមារកំព្រា ស្ត្រីមេម៉ាយកូនច្រើន និងផ្ទុកមេរោគអេដស៍ជាដើម។

លោក Tatsuhiro Kurihara អគ្គនាយក គ្រឹះស្ថានមីក្រូហិរញ្ញវត្ថុ អាក់ទីវភីភល ភីអិលស៊ី បាន​ដឹង​ថា លោកមានការពេញចិត្ត គោរពស្រឡាញ់ និងកោតសសើរយ៉ាងខ្លាំងក្លា ចំពោះ​កាក​បាទ​ក្រហម​កម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដែលតែង​តែ​ជួយ​ទៅ​ដល់​ប្រជាពលរដ្ឋ មានជីវភាពខ្សត់ខ្សោយ និងជួបទុក្ខលំបាកបានទាន់ពេលវេលា។ លោក Tatsuhiro បានឱ្យដឹងទៀតថា អ្វីដែលគ្រឹះស្ថានមីក្រូហិរញ្ញវត្ថុ អាក់ទីវភីភល ភីអិលស៊ី ជួយ​បាន​ និង​ជួយ​ទៅ​តាមលទ្ធភាពដែលអាចជួយបាន លោកឱ្យដឹងថាកន្លងមក គ្រឹះស្ថាន​មីក្រូហិរញ្ញវត្ថុ​របស់​លោក ក៏ធ្លាប់បានចុះទៅជួយប្រជាពលរដ្ឋនៅប៉ែកខាងភូមិភាគឦសានផងដែរ។

ដូច្នេះ​ដើម្បីជាការរួមចំនែកជាមួយនិងការងារសប្បុរសធម៌ដ៏ធំមួយនេះ ក្រុមការងារ​គ្រឹះ​ស្ថាន​មីក្រូហិរញ្ញវត្ថុ អាក់ទីវភីភល ភីអិលស៊ី និងចូលរួមជាមួយកាកបាទក្រហមកម្ពុជា ក្នុងការ​ចែក​រំលែក​ក្តី​ស្រឡាញ់ ទៅដល់ប្រជាពលរដ្ឋទីទាល់ក្រ ក្រោមការដឹកនាំរបស់សម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ជាបន្តបន្ទាប់ទៀត៕