ភ្នំពេញ៖ ក្រសួងការពារជាតិកម្ពុជា នៅថ្ងៃទី២៧ ខែតុលា បានបញ្ជូនសម្ភារៈគ្រឿង​បំពាក់បំរើ​ឲ្យ​ការងារ​ដោះមីនប្រមាណជិត ៧០គ្រឿង ​ទៅសាធារណរដ្ឋអាហ្រ្វឹកកណ្តាលបន្ថែមទៀត​ក្រោយ​ពីមានស្នើសុំពីភាគីអង្គការសហប្រជាជាតិ UN ​និងមានកិច្ចព្រមព្រៀងរវាងកម្ពុជា និងUNរួចហើយ ។

នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រងកងម្លាំងរក្សាសន្តិភាព ថ្លែងថា​ សម្ភារគ្រឿងបំពាក់បំរើការងារដោះមីន​ដែលមានចំនួន៩ប្រភេទ​ សរុបជិត ៧០គ្រឿង​ទាំងនោះ ​គឺមានដូចជា​ រថយន្តហាំម័រ ១១គ្រឿង រថយន្ត Toyota, Nissan, Ford, រថយន្ត Kammas, រថយន្តធុនធំMpv – I, កុងតេណ័រ, រម៉ក, ស៊ីទែនទឹក និងសម្ភារបច្ចេកវិទ្យាទំនើបសម្រាប់បំពាក់​រ៉ាវរកមីន កំទិចគ្រឿងផ្ទុះជាច្រើនកំប្លេទៀត។

ឯកឧត្តមនាយឧត្តមសេនីយ៍ សែម សុវណ្ណនី បន្តថា បន្ទាប់ពីសម្ភារគ្រឿងបំពាក់ បញ្ជូន​សម្ភារបំពាក់​បំរើការឲ្យការងារដោះមីន ​បញ្ជូនទៅដល់សាធារណរដ្ឋអាហ្រ្វិក​កណ្តាលរួចហើយ ក្រសួង​ការពារជាតិ នឹងបញ្ជូនកងកម្លាំងរក្សាសន្តិភាពUNពីកម្ពុជា ៩៨រូបបន្ថែមទៀត ទៅកាន់​សាធារណរដ្ឋអាហ្វ្រឹក​កណ្តាល​នៅពេលឆាប់ៗនេះ។

លោកស្រីវរៈសេនីយឯក គឹម ប៊ុនរ៉ានី ក្នុងនាមមេបញ្ជាការកងកម្ទេចគ្រឿងផ្ទុះEOD ដែលមាន​កង​កម្លាំង​សរុប៩៨រូបនេះ ​បាន​ត្រៀមខ្លួន ​និងបាន​បង្ហាញ​ការប្តេជ្ញាចិត្តបំពេញ​បេសកកម្មរក្សា​សន្តិភាព​ការងារដោះមីន ផ្តល់ដីសុវត្ថិភាពជូនប្រជាជនអាហ្វ្រឹកកណ្តាល។

សូមបញ្ជាក់ថា ​បច្ចុប្បន្នកម្ពុជា ​មានកងកម្លាំងមួកខៀវ​ចំនួន ​២១៩នាក់បាន​និងកំពុងបំពេញ​បេសកកម្ម​រក្សា​សន្តិភាពUN ​នៅសាធារណៈរដ្ឋអាហ្រឹ្វកកណ្តាល ។

ក្រៅពីនេះ​កងកម្លាំងកម្ពុជា ​ក៏នឹងបង្កើនរៀបចំសង់ទីតាំងចត្តាឡីស័ក​ ស្ថាបនារបងបន្ទាយ, ស្តារប្រឡាយ​ រាយបន្លាលួសព័ទ្ធជុំវិញទីបញ្ជាការUN ​នៅតំបន់អូបូ ​តំបន់ហ្សេមីញូ ព្រមទាំង​ចុះខួងអណ្តូង ​និងផលិតទឹកស្អាតចែក​ជូន​ពលរដ្ឋ ​និងបន្ទាយអង្គភាពទ័ព​មួកខៀវមក​ពី​ប្រទេស​ផ្សេងៗ​ផងដែរ៕ អត្ថបទ ស៊ុម សុខជា